ການພັດທະນາການສຶກສານັ້ນ ຖືເປັນໜ້າທີ່ຂອງໝົດທຸກຄົນໃນສັງຄົມ ບໍ່ແມ່ນເປັນໜ້າທີ່ສະເພາະຂອງຄູ-ອາຈານພາຍໃນໂຮງຮຽນພຽງຢ່າງດຽວ ເພາະການສ້າງພື້ນຖານປະຖົມປັດໄຈຕ່າງໆພາຍໃນໂຮງຮຽນນັ້ນ ຕ້ອງໄດ້ອາໃສການຮ່ວມມືສະໜັບສະໜູນຈາກພາກສ່ວນຂອງສັງຄົມ ທີ່ມີໜ້າທີ່ພັນທະຮ່ວມກັນ ເພື່ອອະນາຄົດຂອງລູກຫຼານລາວ ຖ້າຄົນລາວບໍ່ຊ່ວຍກັນ ແລ້ວ ຈະລໍໃຫ້ໃຜມາຊ່ວຍ ເພາະຢາກໃຫ້ປະເທດຊາດຮັ່ງມີເຂັ້ມແຂງ ກ່ອນອື່ນໝົດເຮົາຕ້ອງສ້າງຄວາມເຂັ້ມແຂງດ້ວຍຕົນເອງກ່ອນ.
ດັ່ງນັ້ນ ພັກ-ລັດຖະບານ ຈຶ່ງຫາທຸກວິທີທາງໃນການປຸກລະດົມຂົນຂວາຍ ການຊ່ວຍເຫຼືອ ເພື່ອສະໜັບສະໜູນໃຫ້ແກ່ຂະແໜງການສຶກສາ ທັງລະດົມທຶນຮອນພາຍໃນປະເທດ ທີ່ມີນັກທຸລະກິດທັງພາຍໃນ ແລະ ຕ່າງປະເທດ ລວມທັງອົງການຈັດຕັ້ງສາກົນຕ່າງໆ ໃນການປະກອບສ່ວນພັດທະນາເຂົ້າໃນຂະແໜງການສຶກສາຂອງ ສປປ ລາວ ໃນຫຼາຍຮູບແບບ ແລະ ຫວ່າງບໍ່ດົນຜ່ານມາ ເປັນອີກໜຶ່ງໂຄງການທີ່ສຳຄັນ ຄື: ໂຄງການກໍ່ສ້າງໂຮງຮຽນປະຖົມສົມບູນເມືອງຫົງສາ ແຂວງໄຊຍະບູລີ ໃນຕົ້ນເດືອນພຶດສະພາ 2020 ຜ່ານມາ ໂດຍແມ່ນບໍລິສັດ ຈັນທະວົງ ກໍ່ສ້າງຂົວທາງ ແລະ ສ້ອມແປງເຄຫະສະຖານ ຈຳກັດ ເປັນຜູ້ຮັບເໜົາກໍ່ສ້າງ.
ທ່ານ ທອງສຸກ ປ້ອງຄຳ ຫົວໜ້າຫ້ອງການສຶກສາທິການ ແລະ ກີລາເມືອງຫົງສາ ກ່າວວ່າ: ພາຍຫຼັງໄດ້ຮັບອະນຸຍາດໃຫ້ເມືອງຫົງສາ ກໍ່ສ້າງໂຮງຮຽນປະຖົມສົມບູນ ເມືອງຫົງສາ ໃນທ້າຍເດືອນທັນວາ 2019 ຜ່ານມາ ເພື່ອເຮັດໃຫ້ການຈັດຕັ້ງປະຕິບັດໂຄງການດັ່ງກ່າວໄດ້ຮັບຜົນດີ ຮັບປະກັນທາງດ້ານຄຸນນະພາບ ແລະ ສຳເລັດຕາມກຳນົດເວລາ ທາງຄະນະຮັບຜິດຊອບໂຄງການ ໄດ້ຈັດພິທີເຊັນສັນຍາຮ່ວມກັບທາງບໍລິສັດຮັບເໝົາກໍ່ສ້າງ ໂດຍແມ່ນບໍລິສັດ ຈັນທະວົງ ກໍ່ສ້າງຂົວທາງ ແລະ ສ້ອມແປງເຄຫະສະຖານ ຈຳກັດ ເປັນຜູ້ຮັບເໜົາກໍ່ສ້າງ
ໂຄງການດັ່ງກ່າວ ມີມູນຄ່າໃນການກໍ່ສ້າງທັງໝົດ 995 ລ້ານກວ່າກີບ ໂດຍນຳໃຊ້ແຫຼ່ງທຶນພັດທະນາຊຸມຊົນ ໂຄງການໄຟຟ້າພະລັງງານຄວາມຮ້ອນຫົງສາ ເປັນອາຄານຊັ້ນດຽວ ມີລວງກວ້າງ 8 ແມັດ ລວງຍາວ 4,23 ແມັດ ໂຄງສ້າງເຮັດດ້ວຍເບຕົງເສີມເຫຼັກ ໂຄງຫຼັງຄາເສີມດ້ວຍເຫຼັກມຸງດ້ວຍກະເບື້ອງ ພື້ນປູດ້ວຍເບຕົງເສີມເຫຼັກ ມີ 7 ຫ້ອງຮຽນ ຫ້ອງນ້ຳນອກ 7 ຫ້ອງ ຝາກໍ່ດ້ວຍດິນບ໊ອກ ໃຊ້ໄລຍະເວລາໃນການກໍ່ສ້າງເປັນເວລາ 6 ເດືອນນັບແຕ່ມື້ເຊັນສັນຍາເປັນຕົ້ນໄປ.
ທ່ານ ທອງສຸກ ປ້ອງຄຳ ກ່າວຕື່ມວ່າ: ໂຄງການດັ່ງກ່າວມີຄວາມສຳຄັນຫຼາຍ ເພາະກ່ອນໜ້ານີ້ ເຂດດັ່ງກ່າວພົບກັບຫຼາຍບັນຫາກ່ຽວກັບອາຄານຮຽນ ເພາະຫ້ອງຮຽນບໍ່ໄດ້ມາດຕະຖານ ເຮັດປະຖົມປະຖານ ຕາມເງື່ອນໄຂສະພາບທີ່ມີ ຕ້ອງຂໍຂອບໃຈແຫຼ່ງທຶນພັດທະນາຊຸມຊົນ ໂຄງການໄຟຟ້າພະລັງງານຄວາມຮ້ອນຫົງສາ ກໍຄືພັກ-ລັດຖະບານ ອຳນາດການປົກຄອງທີ່ໃຫ້ການເອົາໃຈໃສ່ ຊຸກຍູ້ ສົ່ງເສີມ ເຮັດໃຫ້ໂຄງການດີໆແບບນີ້ເກີດຂຶ້ນ ກາຍເປັນທ່າແຮງອັນສຳຄັນ ໃນການປະກອບສ່ວນຊຸກຍູ້ການພັດທະນາຂະແໜງການສຶກສາ ພາຍໃນເມືອງຫົງສາ ໂດຍສະເພາະ ເຮັດໃຫ້ລູກຫຼານນັກຮຽນໄດ້ມີອາຄານຮຽນທີ່ແໜ້ນໜາຖາວອນ ໄດ້ມາດຕະຖານ ບໍ່ເຮັດໃຫ້ນັກຮຽນທີ່ເກນອາຍຸເຂົ້າຮຽນ ຕ້ອງລຳບາກເດີນທາງໄປຮຽນຢູ່ໂຮງຮຽນທີ່ໄກຈາກເຮືອນ ປະກອບສ່ວນເຂົ້າໃນການເພີ່ມອັດຕາເຂົ້າຮຽນ ແລະ ການປະລະການຮຽນ ເພີ່ມປະສິດທິພາບໃນການພັດທະນາຄຸນນະພາບການສຶກສາ ພ້ອມທັງເຮັດໃຫ້ພໍ່ແມ່ຜູ້ປົກຄອງໄດ້ມີໂອກາດໃນການເພີ່ມພູມຜະລິດຜົນ ແລະ ປະຕິບັດໜ້າທີ່ວຽກງານວິຊາສະເພາະໄດ້ເຕັມຄວາມສາມາດ ປະກອບສ່ວນເຂົ້າໃນການພັດທະນາຄຸນນະພາບຊີວິດຄອບຄົວໃຫ້ດີຂຶ້ນ ທີ່ສຳຄັນຄືການປະກອບສ່ວນເຂົ້າໃນການພັດທະນາຊັບພະຍາກອນມະນຸດ ເຮັດໃຫ້ປະເທດຊາດຫຼຸດພົ້ນອອກຈາກຄວາມທຸກຍາກ ແລະ ດ້ວຍພັດທະນາ.
ນຳສະເໜີໂດຍ: ແວ່ນຂາວ