ວັນທີ 26 ເດືອນມິຖຸນາຂອງທຸກໆປີ ແມ່ນວັນຕ້ານຢາເສບຕິດລະດັບສາກົນ ເພື່ອຫວນຄືນວັນສຳຄັນດັ່ງກ່າວ ທີ່ຜ່ານໄປຍັງບໍ່ທັນເຫິງນີ້ ຜູ້ຂຽນມີເລື່ອງກ່ຽວກັບຢາເສບຕິດຢູ່ບາງປະເທດມາໃຫ້ອ່ານ ເພື່ອເບິ່ງບົດຮຽນບ້ານເຂົາ.
ທີ່ຟີລິບປິນ: ໜຶ່ງໃນຫຼາຍໆມາດຕະການປາບປາມການຄ້າຢາເສບຕິດນັ້ນ ທາງການຟີລິບປິນ ເນັ້ນການສຶກສາອົບຮົມຄົນໃນໄວເຍົາວະຊົນ ແລະ ຊາວໜຸ່ມ ໃຫ້ຮູ້ກົນອຸບາຍລາຍລ່ຽມຂອງພວກທີ່ມີສ່ວນພົວພັນກັບອາຊະຍາກຳຢາເສບຕິດ ຂ່າວບອກວ່າ ລັດຖະບານຟີລິບປິນ ພາຍໃຕ້ການນຳຂອງທ່ານປະທານາທິບໍດີ ໂຣດິໂກ ດູເຕີເຕ ທີ່ບໍ່ໄວ້ໜ້າພວກຄ້າຢາເສບຕິດນີ້ ນັກຮຽນທີ່ມີອາຍຸແຕ່ 10 ປີຂຶ້ນໄປ ບໍ່ພຽງແຕ່ຕ້ອງໄດ້ຮຽນຮູ້ກ່ຽວກັບຜົນຮ້າຍຂອງການຄ້າ ແລະ ການຕົກເປັນທາດຂອງຢາເສບຕິດເທົ່ານັ້ນ ແຕ່ຍັງຕ້ອງໄດ້ຮຽນຮູ້ກົນອຸບາຍລາຍລ່ຽມຂອງຜູ້ຄ້າຢາເສບຕິດ ທີ່ນຳໃຊ້ເພື່ອລາກແກ່ເຍົາວະຊົນ ແລະ ຊາວໜຸ່ມເຂົ້າສູ່ແຫຼ່ງອະບາຍະມຸກ ຮຽນຮູ້ວິທີປະຕິເສດຕໍ່ການຊັກຊວນຂອງພວກຄົນບໍ່ດີ ທີ່ຕ້ອງການໃຫ້ເດັກກາຍເປັນລູກຄ້າ ຫຼື ເປັນຕົວແທນຄ້າຢາເສບຕິດ ທ່ານນາງ ບຼີອອນເນັດ ລັດຖະມົນຕີກະຊວງສຶກສາຟີລິບປິນ ໄດ້ມີຄຳເຫັນເມື່ອປະມານ 4 ປີຜ່ານມາແລ້ວວ່າ ທາງກະຊວງຈະເນັ້ນການຮຽນ-ການສອນເລື່ອງບັນຫາຢາເສບຕິດຢູ່ຫຼັກສູດ ໂດຍແຍກເປັນຫົວຂໍ້ຮຽນສະເພາະ ທັງນີ້ກໍເພື່ອໃຫ້ສອດຄ່ອງກັບແນວທາງຂອງທ່ານປະທານາທິບໍດີ ໃນການປາບປາມຢາເສບຕິດຜິດກົດໝາຍໃນໄລຍະຜ່ານມາ ຫຼັກສູດສຳລັບນັກຮຽນຊັ້ນ ປ4 ຢູ່ຟີລິບປິນນັ້ນ ໄດ້ບັນຈຸວິຊາກ່ຽວກັບຜົນຮ້າຍຂອງຢາເສບຕິດຢູ່ແລ້ວ ແຕ່ຍັງຂາດວິຊາປ້ອງກັນຕົວ ບໍ່ໃຫ້ເດັກຕົກເປັນເຫຍື່ອຂອງພວກຄ້າຢາເສບຕິດ ຢູ່ຟີລິບປິນ ພວກຄ້າຢາເສບຕິດໄດ້ເລັງເປົ້າເອົາໂຮງຮຽນໃນເຂດຕົວເມືອງໃຫຍ່ ເປັນບ່ອນຈຳໜ່າຍຢາເສບຕິດຫຼາຍກວ່າຢູ່ໂຮງຮຽນໃນເຂດຊົນນະບົດ.
ທີ່ປານາມາ: ປະເທດແດນໄກໃນທະວີບອາເມຣິກາ ທີ່ມີຊື່ວ່າ ປານາມາ ນີ້ ມີບົດຮຽນກ່ຽວກັບການແກ້ໄຂບັນຫາຢາເສບຕິດທີ່ຄວນເບິ່ງໄວ້ ຂ່າວຕ່າງປະເທດເມື່ອປະມານ 5 ປີຢ້ອນຫຼັງໃຫ້ຮູ້ວ່າ: ທາງການຂອງປະເທດນີ້ ໄດ້ປະກາດໃຫ້ອະໄພຍະໂທດແກ່ບັນດາອະດີດສະມາຊິກ ແລະ ສະມາຊິກທີ່ຍັງເຄື່ອນໄຫວກັບກຸ່ມຄ້າຢາເສບຕິດ ນະໂຍບາຍອະໄພຍະໂທດນີ້ ເຮັດໄປພ້ອມໆກັບການເປີດໂຄງການເຝິກວິຊາຊີບໃຫ້ເຫຼົ່າອາຊະຍາກອນ ເພື່ອພວກເຂົາຈະໄດ້ກາຍເປັນພົນລະເມືອງດີໃນສັງຄົມ ເງື່ອນໄຂຂອງຜູ້ທີ່ຈະໄດ້ຮັບອະໄພຍະໂທດ ແລະ ເຂົ້າຮ່ວມໂຄງການເຝິກວິຊາຊີບ ຄື: ກ່ອນອື່ນຕ້ອງຍອມປົດອາວຸດ ແລະ ມອບອາວຸດທັງໝົດໃຫ້ທາງການ ໃນເບື້ອງຕົ້ນ ທາງໂຄງການມີແຜນໃຊ້ເວລາພຽງ 1 ເດືອນ ສຳລັບຈົດທະບຽນຜູ້ສະໝັກເຂົ້າເຝິກອົບຮົມ ແຕ່ເນື່ອງຈາກມີຜູ້ສະໝັກຫຼາຍເກີນຄາດ ຈຶ່ງແກ່ຍາວການຈົດທະບຽນແບບບໍ່ມີກຳນົດ ນັບແຕ່ມື້ດຳເນີນໂຄງການໃນຕົ້ນເດືອນມັງກອນ 2015 ຫາທ້າຍເດືອນມິຖຸນາປີດຽວກັນນັ້ນ ໄດ້ມີຜູ້ເຂົ້າຮ່ວມໂຄງການນີ້ເຖິງ 2.500 ຄົນ ແລະ ໄດ້ເພີ່ມຂຶ້ນເປັນ 5.000 ຄົນ ໃນທ້າຍປີດຽວກັນນັ້ນ ນີ້ກໍເປັນອີກບົດຮຽນໜຶ່ງໃນການແກ້ໄຂບັນຫາຢາເສບຕິດ ດ້ວຍ “ໄມ້ອ່ອນ” ປານາມາ ເປັນ 1 ໃນບັນຫາປະເທດທີ່ມີອາຊະຍາກອນຄ້າຢາເສບຕິດຫຼາຍທີ່ສຸດໃນໂລກ.