ໂດຍ: ສ.ແສງງາມ
ເດັກຈະສາມາດຢູ່ລອດ ເຕີບໃຫຍ່ ແລະ ພັດທະນາໄດ້ ຂຶ້ນກັບ ຄຸນນະພາບຂອງການເບີ່ງແຍງ ລວມທັງສຸຂະພາບ ແລະ ໂພ ຊະນາການສຳບູນ ເຊິ່ງສາມປັດໄຈຫຼັກກໍຄື ການໃຫ້ເຂົາເຈົ້າໄດ້ຮັບສານອາຫານພຽງພໍ ໄດ້ຮັບການລ້ຽງດູພຽງພໍ ແລະ ໄດ້ນັບການປົກປ້ອງຈາກການເຈັບເປັນ ດັ່ງນັ້ນ ວຽກງານໂພຊະນາການໃນໂຮງຮຽນແມ່ນມີຄວາມສຳຄັນເພື່ອສ້າງເງື່ອນໄຂໃຫ້ເດັກໄດ້ເຂົ້າເຖິງບັນດາປັດໄຈດັ່ງກ່າວ.
ຊຽງຂວາງ ກໍເປັນແຂວງໜຶ່ງທີ່ໄດ້ເອົາໃຈໃສ່ຕໍ່ວຽກງານໂພຊະນາການໃນໂຮງຮຽນ ເຊິ່ງໃນໄລຍະຜ່ານມາໄດ້ເອົາໃຈໃສ່ໃນການຈັດຕັ້ງປະຕິບັດວຽກງານດັ່ງກ່າວຢ່າງຕັ້ງໜ້າ ໂດຍໄດ້ມີໂຄງການອາຫານທ່ຽງໃນໂຮງຮຽນໃນທ້ອງຖິ່ນຕ່າງໆ ເພື່ອໃຫ້ເດັກໄດ້ຮັບສານອາຫານຄົບໝູ່ ຂະນະທີ່ການຈັດຕັ້ງປະຕິບັດວຽກງານດັ່ງກ່າວນັ້ນ ຍັງປະສົບກັບຂໍ້ຫຍຸ້ງຍາກຫຼາຍດ້ານທີ່ຕ້ອງໄດ້ສືບຕໍ່ແກ້ໄຂ.
ທ່ານ ນາງ ດາວອນ ເດດວົງສອນ ຮອງຫົວໜ້າພະແນກສຶກສາ ແລະ ກີລາ ໄດ້ໃຫ້ສໍາພາດຕໍ່ສື່ມວນຊົນຈາກສູນກາງວ່າ: ຢູ່ ໃນແຂວງຊຽງຂວາງ ຂອງພວກເຮົາ ວຽກໂດຍລວມກ່ຽວກັັບວຽກງານໂພສະນາການ ແລະ ການໃຫ້ອາຫານແກ່ເດັກນ້ອຍ ໃນບັນດາໂຮງຮຽນ ເຊິ່ງທາງເຂດພວກເຮົາກໍໄດ້ມີທີມງານລົງໄປກະຕຸກຊຸກຍູ້ຢູ່ໃນຂັ້ນໂຮງຮຽນເພື່ອເຮັດໃຫ້ລູກ ຫຼານຂອງ ພວກເຮົາໄດ້ຮັບອາຫານການກິນໃຫ້ຖືກຕ້ອງຕາມຫຼັກໂພສະນາການ ໂດຍສະເພາະແມ່ນສົ່ງເສີມໃຫ້ລູກຫຼານພວກເຮົາໄດ້ ກິນອາຫານຄົບໝູ່ ເພື່ອເຮັດໃຫ້ຮ່າງກາຍສົມບູນ ແລະ ແຂງແຮງ ໂດບສະເພາະເມືອງໜອງແຫດ ເພາະໄດ້ຮັບໂຄງການອາ ຫານທ່ຽງຈາກທະນາຄານໂລກ ທີ່ໄດ້ສະໜອງທຶນໃຫ້ມີ 40 ແຫ່ງໂຮງຮຽນ.
ສໍາລັບ ການຕິດຕາມແມ່ນຈະມີທີມງານຂະແໜງສາມັນລົງໄປຕິດຕາມການນຳໃຊ້ອາຫານທ່ຽງໃນໂຮງຮຽນນັ້ນແມ່ນໄດ້ດຳ ເນີີນໄປໄດ້ຕາມແຜນທີ່ກຳນົດໄວ້ ເພາະໃນ 40 ບ້ານ ທີ່ໄດ້ຮັບໂຄງການອາ ຫານທ່ຽງນີ້ເພິ່ນໄດ້ເຝິກອົບຮົມການປຸງແຕ່ອາຫານໃຫ້ກັບແມ່ຄົວ ແລະ ໄດ້ມີທີມງານຂັ້ນແຂວງໄດ້ລົງຕິດ ຕາມເປັນແຕ່ລະໄລຍະ.
ໃນໄລຍະຜ່ານມາແມ່ນທາງກອງເລຂາຂອງພວກເຮົາໄດ້ໄປສົມທົບກັບທາງພະແນກສາທາລະນະສຸກ ເພື່ອສ້າງແຜນທາງ ດ້ານໂພຊະນາການຮ່ວມກັນ ເຊິ່ງເລີ່ມສ້າງແຕ່ປີ 2021 ສ້າງແຜນໄລຍະຍາວ 5 ປີ ແລ້ວກໍໄດ້ຮ່ວມກັນເຮັດວຽກກັບກອງເລຂາ ເພາະມັນຈະມີຫຼາຍພາກສ່ວນເຊັ້ນ: ສາທາ ສຶກສາ ແລະ ກະຊິກຳ ໂດຍໄດ້ເຮັດວຽກຮ່ວມກັນເພື່ອວ່າຈະກະຈາຍ ວຽກຂອງ ແຕ່ລະພາກສ່ວນໃຫ້ໄປໃນທິດທາງດຽວກັນກ່ຽວກັບວຽກງານໂພສະນາການ.
ສຳລັບການຈັດຕັ້ງປະຕິບັດວຽກງານໃນໄລຍະຜ່ານມາ ແມ່ນໄດ້ພົບກັບຂໍ້ຫຍຸ້ງຍາກ ໂດຍສະເພາະການປ່ຽນແປງພຶດຕິກຳຂອງຊຸມຊົນ ເຊິ່ງປະຊາຊົນສ່ວນໃຫຍ່ແມ່ນປະຕິບັດຕາມຮີດຄອງປະເພນີ ລະດັບການສຶກສາ ເຮັດໃຫ້ຄວາມຮັບຮູ້ເຂົ້າໃຈຂອງເຂົາເຈົ້າແມ່ນບໍ່ເລິກເຊິ່ງເທົ່າທີ່ຄວນ.
ຢ່າງໃດກໍຕາມ ເພື່ອເຮັດໃຫ້ການຈັດຕັ້ງປະຕິບັດວຽກງານດັ່ງກ່າວບັນລຸຕາມຈຸດປະສົງຄາດໝາຍທີ່ວາງໄວ້ ຕ້ອງໄດ້ມີການປັບປຸງກອງເລຂາຂອງແຕ່ລະພາກສ່ວນມີການປະສານງານກັນຫຼາຍຂຶ້ນ ພ້ອມນັ້ນ ສະເໜີຂໍຄວາມການຊ່ວຍເຫຼືອເພີ່ມຈາກອົງການຈັດຕັ້ງສາກົນເພື່ອສະໜັບສະໜູນເຂົ້າໃນການໂຄງການສະໜອງອາຫານທ່ຽງໃນໂຮງຮຽນໃຫ້ມີການຂະຫຍາຍຕົວ ໂດຍສະເພາະໃນເຂດຫ່າງໃກສອກຫຼີກ.
ທ່ານ ນາງ ພຸດສະດີ ດຳມະນາວົງ ຜູ້ອຳນວຍການໂຮງຮຽນອະນຸບານ ເມືອງແປກ ແຂວງຊຽງຂວາງ ໃຫ້ສຳພາດວ່າ: ໂຮງຮຽນຂອງພວກເຮົາປະກອບມີ 3 ຊັ້ນ ອພນຸບານ 1-2 ແລະ 3 ເຊິ່ງໃນໄລຍະຜ່ານມາກໍໄດ້ຮັບການຊີ້ນຳຈາກຫ້ອງການສຶກສາທິການ-ກີລາເມືອງ ກໍຄື ພະແນກສຶກສາທິການ ແລະ ກີລາ ແຂວງຊຽງຂວາງ ໄດ້ເອົາໃຈໃສ່ຕໍ່ດ້ານໂພຊະນາການຂອງເດັກນ້ອຍນັກຮຽນ ເຊິ່ງທາງໂຮງຮຽນກໍໄດ້ເອົາໃຈໃສ່ໃນການປຸກລະດົມພໍ່ແມ່ຜູ້ປົກຄອງໃຫ້ມີສ່ວນຮ່ວມຕໍ່ການຈັດຕັ້ງປະຕິບັດວຽກງານດັ່ງກ່າວ ໂດຍໃຫ້ເຂົາເຈົ້າເປັນຫຼັກໃນການຈັດຫາອາຫານທີ່ຄົບໝູ່ເພື່ອເປັນອາຫານທ່ຽງໃຫ້ກັບເດັກ ເຊິ່ງຜ່ານການຈັດຕັ້ງປະຕິບັດເຫັນໄດ້ວ່າມີພໍ່ແມ່ຜູ້ປົກຄອງຫຼາຍຄົນກໍປະຕິບັດໄດ້ເປັນຢ່າງດີ ແຕ່ກໍຍັງມີອີກຫຼາຍຄອບຄົວທີ່ຍັງບໍ່ສາມາດປະຕິບັດໄດ້ ເນື່ອງຈາກວ່າສະພາບເສດຖະກິດຄອບຄົວ ເຮັດໃຫ້ອາຫານທີ່ນ້ອງນັກຮຽນນຳມາກໍຍັງເປັນອາຫານຊື້ຕາມຮ້ານຂາຍຂອງກິນສຸກ ທີ່ອາດຍັງບໍ່ໄດ້ຕາມໂພຊະນາການ ແລະ ຍັງບໍ່ຖືກສຸຂະອະນາໄມ.
ຕໍ່ກັບສະພາບການດັ່ງກ່າວຮຽກຮ້ອງໃຫ້ພໍ່ແມ່ຜູ້ປົກຄອງສືບຕໍ່ເປັນເຈົ້າການໃນການສັດຫາອາຫານຄົບໝູ່ໃຫ້ກັບລູກຫຼາຍ ພ້ອມນັ້ນກໍຮຽກຮ້ອງໃຫ້ພາກສ່ວນຕ່າງໆໃນສັງຄົມ ຍືນມືໃຫ້ການຊ່ວຍເຫຼືອຕື່ມອີກ ເພື່ອປະກອບສ່ວນເຂົ້າໃນການຈັດຕັ້ງປະຕິບັດດັ່ງກ່າວໃຫ້ບັນລຸຕົວເລກຄາດໝາຍທີ່ວາງໄວ້.
ສຳລັບການເຄື່ອນໄຫວຂອງຄະນະສື່ມວນຊົນ ນຳພາໂດຍ ສູນສະຖິຕິ ແລະ ຂ່າວສານສາທາລະນະສຸກ ກະຊວງສາທາລະນະສຸກ ໄດ້ຮັບການສະໜັບສະໜູນຈາກ ສະຫະພາບເອີຣົບ ໂດຍຜ່ານ ອົງການ Unicef.