ຊຸດເຝິກອົບຮົມກຳມະການຕັດສິນ ເພື່ອກຽມຄວາມພ້ອມຕັດສິນການແຂ່ງຂັນບານເຕະ ເປບຊີ ລາວລີກ 1 ປະຈຳປີ 2020 ຈັດຂຶ້ນວັນທີ 1 ກໍລະກົດ 2020 ຢູ່ສະຫະພັນບານເຕະແຫ່ງຊາດລາວ (ສຕລ) ໂດຍມີທ່ານ ຄຳແພງ ວົງຂັນຕີ ຮອງປະທານ ສຕລ ຫົວໜ້າອະນຸກຳມະການຕັດສິນ ສຕລ ທ່ານ ທອງປະເສີດ ພອນສິຣິຍະວົງ ຫົວໜ້າຄູເຝິກສອນກຳມະການຕັດສິນ ທ່ານ ໄຊປະເສີດ ພົງຊະນິດ ຫົວໜ້າພະແນກກຳມະການຕັດສິນ ຜູ້ປະເມີນກຳມະການຕັດສິນ ພ້ອມດ້ວຍສຳມະນາກອນ 36 ຄົນ ທີ່ມາຈາກພາກສ່ວນຕ່າງໆເຂົ້າຮ່ວມ.
ທ່ານ ຄຳແພງ ວົງຂັນຕີ ກ່າວວ່າ: ການເຝິກອົບຮົມຄັ້ງນີ້ ເພື່ອກະກຽມການແຂ່ງຂັນບານເຕະ ເປບຊີ ລາວລີກ 1 ປະຈຳປີ 2020 ຂໍຮຽກຮ້ອງໃຫ້ກຳມະການຕັດສິນ ໃຫ້ເອົາໃຈໃສ່ໃນການເຝິກອົບຮົມ ສຶກສາກົດລະບຽບທີ່ຟີຟາປັບປຸງໃໝ່ໃຫ້ລະອຽດ ພາຍຫຼັງສຳເລັດການເຝິກອົບຮົມແລ້ວ ຂໍໃຫ້ຕັດສິນໃຫ້ມີຄວາມເປັນທຳໃນທຸກໆນັດ ການເຝິກອົບຄັ້ງນີ້ດຳເນີນແຕ່ວັນທີ 1-3 ກໍລະກົດ 2020 ໂດຍຈະລົງເລິກທັງທິດສະດີ ແລະ ການປະຕິບັດຕົວຈິງ.
ການແຂ່ງຂັນລາຍການ ເປບຊີ ລາວລີກ 1 ລະດູການ 2020 ມີ 7 ສະໂມສອນເຂົ້າຮ່ວມ ເຊິ່ງຈະເປີດແຂ່ງຂັນວັນທີ 11 ກໍລະກົດ-3 ຕຸລາ 2020 ນອກນີ້ ຍັງມີອີກ 1 ລາຍການໃຫຍ່ ກໍຄື ການແຂ່ງຂັນບານເຕະຊີງຂັນ ສຕລ ປະຈຳປີ 2020 ກຳນົດເອົາທີມຈາກລາວລີກ 1 ແລະ ລາວລີກ 2 ລວມ 21 ທີມ ມາຈັບສະຫຼາກແຂ່ງຂັນ ທີມໃດເສຍຕົກຮອບ ລາຍການດັ່ງກ່າວ ຄາດວ່າຈະຈັດຂຶ້ນເດືອນສິງຫານີ້.
ສ່ວນການແຂ່ງຂັນໃນປີນີ້ ຈະໃຊ້ 2 ສະໜາມຄື: ສະໜາມກີລາແຫ່ງຊາດ ຫຼັກ 16 ສະໜາມໃນ ແລະ ສະໜາມນອກ ໂດຍນັດທຳອິດ ມີການແຂ່ງຂັນ 2 ຄູ່ ເວລາ 16:00 ໂມງ ສະໂມສອນ ມາສເຕີ້ ເຊເວັ້ນ ເອັຟຊີ ພົບ ສະໂມສອນ ລາວໂຕໂຢຕ້າ ເອັຟຊີ ແຂ່ງຂັນສະໜາມໃນ ສ່ວນສະໂມສອນ ຊ້າງນ້ອຍ ເອັຟຊີ ພົບ ສະໂມສອນ ເອສະຣາ ເອັຟຊີ ແຂ່ງຂັນຢູ່ສະໜາມນອກ ສ່ວນວັນທີ 12 ກໍລະກົດ 2020 ເວລາ 16:00 ໂມງ ສະໂມສອນ ປກສ ເອັຟຊີ ພົບ ສະໂມສອນ ວຽງຈັນ ເອັຟຊີ ແຂ່ງຂັນຢູ່ສະໜາມໃນ.