ກອງປະຊຸມກວດຜ່ານເນື້ອໃນ ແລະ ຮັບຮອງເອົາ 3 ປະເພດກີລາ ຄື: ປິ່ງປ່ອງ ເປຕັງ ແລະ ກະຕໍ້ ກຽມສ້າງເປັນປື້ມຄູ່ມືການຮຽນ-ການສອນ ແລະ ການເຝິກແອບໃຫ້ນັກກີລາຮຸ່ນສືບທອດ ຈັດຂຶ້ນວັນທີ 29 ມິຖຸນາ-3 ກໍລະກົດ 2020 ຢູ່ພະແນກສຶກສາທິການ ແລະ ກີລາ ແຂວງສະຫວັນນະເຂດ ມີທ່ານ ສົມພູ ພົງສາ ຜູ້ຊ່ວຍລັດຖະມົນຕີ ກະຊວງສຶກສາທິການ ແລະ ກີລາ (ສສກ) ຮອງປະທານ ແລະ ເລຂາທິການຄະນະກຳມະການໂອແລັມປິກແຫ່ງຊາດລາວ ທ່ານ ແສງພອນ ພົນອາມາດ ຫົວໜ້າກົມກີລາລະດັບສູງ ພ້ອມດ້ວຍພາກສ່ວນກ່ຽວຂ້ອງ ເຂົ້າຮ່ວມ.
ທ່ານນາງ ຄຳຫຼ້າ ເພັງສີດາລາ ຫົວໜ້າພະແນກກວດກາ ຕິດຕາມ ປະເມີນ ແລະ ປະກັນຄຸນນະພາບ ສະຖາບັນກີລາ-ກາຍຍະກຳ ກ່າວວ່າ: ໂຮງຮຽນພອນສະຫວັນກີລາ-ກາຍຍະກຳ (ຮພກ) ເປັນໂຮງຮຽນມັດທະຍົມສຶກສາປະສົມວິຊາຊີບດ້ານການສຶກສາ ເປັນໂຮງຮຽນກິນ-ນອນ ສ້າງຕັ້ງປີ 2013 ພາຍໃຕ້ການຊີ້ນຳດ້ານວິຊາການ ແລະ ສາຍສາມັນສຶກສາຂຶ້ນກັບພະແນກ ສສກ ນະຄອນຫຼວງວຽງຈັນ ແລະ ດ້ານສາຍກີລາຂຶ້ນກັບກົມກີລາລະດັບສູງ ປັດຈຸບັນຂຶ້ນກັບສະຖາບັນກີລາ-ກາຍະກຳ ມີຈຸດປະສົງເພື່ອສ້າງຊັບພະຍາກອນມະນຸດໃຫ້ໄປຕາມ 3 ລັກສະນະ 5 ຫຼັກມູນການສຶກສາ ສ້າງນັກກີລາຮຸ່ນສືບທອດໃຫ້ມີຄວາມຮູ້-ຄວາມສາມາດ ແລະ ມີຄຸນນະທຳ ກາຍເປັນນັກກີລາທີມຊາດ ແລະ ນັກກີລາອາຊີບໃນອະນາຄົດ.
ຮພກ ໄດ້ຈັດການຮຽນ-ການສອນ ຊັ້ນ ມ5-ມ7 ຕາມຫຼັກສູດ ທີ່ກະຊວງ ສສກ ວາງອອກ 60% ແມ່ນສາຍສາມັນສຶກສາ 40% ແມ່ນສາຍກີລາ ສົກຮຽນ 2017-2018 ມີ 9 ປະເພດກີລາ ສົກປີ 2018-2019 ໄດ້ເພີ່ມອີກ 2 ປະເພດກີລາ ກ່ອນສົກຮຽນ 2019-2020 ໄດ້ເພີ່ມມາຕື່ມອີກ 1 ປະເພດກີລາ ລວມ 13 ປະເພດກີລາ ໄລຍະສົກຮຽນ 2014-2015 ໄດ້ສ້າງປື້ມຄູ່ມື 8 ປະເພດກີລາ ແລະ ຖືກຮັບຮອງໃຫ້ນຳໃຊ້ພາຍໃນໂຮງຮຽນໄດ້ຮັບຜົນເປັນຢ່າງດີ ມາຮອດສົກຮຽນ 2018-2019 ວິຊາການ ຮພກ ຮ່ວມກັບສະຫະພັນກ່ຽວຂ້ອງໄດ້ສ້າງປຶ້ມຄູ່ມືອີກ 3 ປະເພດກີລາດັ່ງກ່າວ ໂດຍໄດ້ຮອງຮັບດ້ານໂຄງສ້າງຂອງປື້ມແຕ່ສົກຮຽນ 2014-2015 ສ່ວນດ້ານເນື້ອໃນໄດ້ຮັບການເປັນເອກະພາບຕາມແຜນການກຳນົດໄວ້ ໃນຫຼັກສູດວິຊາຊີບ ປັດຈຸບັນ ຮພກ ຈຶ່ງໄດ້ເຊີນພາກສ່ວນໆກ່ຽວຂ້ອງ ກວດກາຄວາມຖືກຕ້ອງຄືນ ແລະ ຮັບຮອງ ເພື່ອຈະນຳໃຊ້ເຂົ້າໃນການຮຽນ-ການສອນ.