ຫາກເພື່ອນຜູ້ອ່ານສັງເກດ ຈະເຫັນວ່າການຈັດຕັ້ງປະຕິບັດນິຕິກຳລຸ່ມກົດໝາຍ ເປັນຕົ້ນແມ່ນແຈ້ງການ ຄຳສັ່ງ ຫຼື ຂໍ້ຕົກລົງຕ່າງໆຢູ່ນະຄອນຫຼວງວຽງຈັນເຮົານີ້ ບໍ່ຄ່ອຍເຂັ້ມງວດ ຫຼື ວ່າບໍ່ບັນລຸຜົນສູງສຸດ ສະນັ້ນ ມັນຈຶ່ງຄ່ອຍເກີດມີປາກົດການຫຍໍ້ທໍ້ຕາມມາ ຍ້ອນວ່າຄົນບໍ່ປະຕິບັດເຂັ້ມງວດ ໝາຍວ່າມີການລະເມີດ ຫຼື ເປັນຍ້ອນວ່າການກວດກາບໍ່ເຄັ່ງບໍ ? ຈຶ່ງຄ່ອຍມີຜູ້ລະເມີດ ຈາກສະພາບນີ້ ຈຶ່ງເກີດມີຄົນເວົ້າແບບຢິກແກມຢອກວ່າ: “ຜີບ້ານພ້ອມຜີປ່າ” ວ່າຊັ້ນ !!.
ຜູ້ຂຽນຄິດວ່າ: ຫາກພວກເຮົາເບິ່ງຄວາມຈິງ ກໍຈະເຫັນວ່າມີສ່ວນຖືກນໍ ? ແຕ່ບໍ່ໄດ້ໝາຍຄວາມວ່າທັງໝົດເປັນແນວນັ້ນໝົດ ເຊັ່ນວ່າ: ໃນເວລາພວກເຮົາສູ້ກັບການແຜ່ລະບາດຂອງພະຍາດໂຄວິດ-19 ຈະເຫັນວ່າທົ່ວສັງຄົມປະຕິບັດຄຳສັ່ງເລກທີ 06/ນຍ ຢ່າງເຄັ່ງຄັດ ຈົນພວກເຮົາສາມາດມີໄຊຊະນະໃນເບື້ອງຕົ້ນ ເຊິ່ງຕໍ່ມາພວກເຮົາກໍບໍ່ໄດ້ປະໝາດ ຍັງສືບຕໍ່ປະຕິບັດແຈ້ງການຈາກຄະນະສະເພາະກິດຢ່າງເຂັ້ມງວດ ແນ່ນອນກໍມີບາງອັນທີ່ຊ້າແດ່ ແຕ່ໃນທີ່ສຸດກໍຖືກແກ້ໄຂນັ້ນຄື: ກໍລະນີລາຄາກະແສໄຟຟ້າ ຢາກໃຫ້ເຂົ້າໃຈໃຫ້ຖືກຕ້ອງວ່າ: ບັນດາມາດຕະການຈັດຕັ້ງປະຕິບັດນັ້ນ ມີຢູ່ໃນທຸກກົດໝາຍ ທຸກນິຕິກຳ ແຕ່ພວກເຮົາກໍຕ້ອງຍອມຮັບວ່າມີບາງອັນຈັດຕັ້ງປະຕິບັດບໍ່ສຳເລັດຮ້ອຍເປີເຊັນ ຫຼື ວ່າຢາກຊ້າແດ່ ? ອັນນີ້ພວກເຮົາຕ້ອງເບິ່ງຄວາມເປັນຈິງໃນເວລາຈັດຕັ້ງປະຕິບັດ ເພາະວ່າໃນແຕ່ລະບ່ອນ ແຕ່ລະທ້ອງຖິ່ນມັນບໍ່ຄືກັນນໍ ? ມັນມີຍາກງ່າຍແຕກຕ່າງກັນ ແຕ່ທັງໝົດນັ້ນກໍຈະຖືກຈັດຕັ້ງປະຕິບັດແນ່ນອນ.
ຫາກເພື່ອນຜູ້ອ່ານຕິດຕາມກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດຊຸດທີ VIII ທີ່ພວມດຳເນີນຢູ່ໃນຂະນະນີ້ ຈະເຫັນວ່າມີຫຼາຍບັນຫາທີ່ເພິ່ນຕັ້ງຂຶ້ນ ແລະ ມີຫຼາຍບັນຫາທີ່ເພິ່ນຊີ້ແຈງໃນກອງປະຊຸມ ໂດຍສະເພາະ ຄຳເຫັນຂອງທ່ານນາຍົກລັດຖະມົນຕີ ໃນການແກ້ໄຂບັນຫາຕ່າງໆຂອງລັດຖະບານແມ່ນຈະແຈ້ງທີ່ສຸດ ໂດຍມີບາງບັນຫາເພິ່ນຕັ້ງເປັນຄຳຖາມມອບຄວາມຮັບຜິດຊອບໃຫ້ແຕ່ລະຂະແໜງການ.
ຢາກສັງລວມວ່າ: ການຈັດຕັ້ງປະຕິບັດນີ້ມັນຍາກຫຼາຍ ເພາະມັນພົວພັນຫຼາຍພາກສ່ວນ ຈະຕ້ອງໄດ້ພ້ອມກັນເຮັດແທ້ທຳຈິງ ຈຶ່ງຄ່ອຍໄດ້ຮັບຜົນສຳເລັດ ໝາຍຄວາມວ່າຕ້ອງບຸກທະລຸເຖິງຈະມີເຈ້ຍຂາວ-ເຈ້ຍເຫຼືອງ ຫຼື ສຽງໂທລະສັບເຂົ້າມາລົບກວນກໍຕາມ.
ຢາກເດ !! ຢາກໃຫ້ການຈັດຕັ້ງປະຕິບັດບັນລຸຜົນສຳເລັດສູງສຸດ.
ໂດຍ: ແນວລາວ