ອີກບໍ່ດົນກໍຈະຮອດບຸນເຂົ້າພັນສາແລ້ວເດ (5 ກໍລະກົດປີນີ້) ແນ່ນອນໃນມື້ນັ້ນ ຄົງມີຫຼາຍຄົນອະທິຖານສາບານວ່າ ຈະງົດສິ່ງອະບາຍຍະມຸກທີ່ຕົນເຄີຍເຮັດມາ ໃນນັ້ນ ລວມທັງຄຳໝັ້ນສັນຍາວ່າ ຈະງົດເຫຼົ້າເຂົ້າພັນສາ ! ການສັນຍາສາບານດັ່ງນີ້ ຖືເປັນເລື່ອງດີ ພຽງແຕ່ຂໍໃຫ້ປະຕິບັດໄດ້ແທ້ ດີໄປກວ່ານັ້ນ ກໍຄື ເມື່ອອອກພັນສາກໍສາມາດລາເຫຼົ້າເລີຍ ຫຼື ຢ່າງໜ້ອຍກໍຫຼຸດຜ່ອນໄດ້ ຂໍຢ່າເຮັດແບບວ່າ “ເຂົ້າພັນສາລາຈອກ ອອກພັນສາຄວາໃສ່ແກ້ວ” ແນວນີ້ແມ່ນບໍ່ດີດອກນາ.
ເມື່ອໄດ້ເລີ່ມຕົ້ນບົດກ່ຽວກັບເຫຼົ້າແລ້ວ ກໍເລີຍຢາກໃຫ້ບັນດາທ່ານໄປເບິ່ງບົດຮຽນຂອງຫວຽດນາມ ແລະ ຣັດເຊຍ ໃນການຄວບຄຸມເຄື່ອງດື່ມປະເພດມຶນເມົາ.
ທີ່ຫວຽດນາມ: ການຄວບຄຸມເຄື່ອງດື່ມປະເພດມຶນເມົາ ເຊັ່ນ: ເຫຼົ້າ ແລະ ເບຍ ຢູ່ຫວຽດນາມນັ້ນ ເພິ່ນເຮັດໄປພ້ອມໆດຽວກັບການຄວບຄຸມຢາສູບ ເພາະທັງເຫຼົ້າທັງຢາສູບລ້ວນແຕ່ແມ່ນສິ່ງເສບຕິດທີ່ແຜ່ຫຼາຍ ແລະ ມີການບໍລິໂພກກັນຢ່າງເປີດແປນ ມາດຕະການຂອງຫວຽດນາມ ໃນການຄວບຄຸມເຄື່ອງດື່ມປະເພດມຶນເມົາ ແລະ ຢາສູບນັ້ນມີກົດໝາຍ ແລະ ລະບຽບກາເປັນເຄື່ອງມືຈັດຕັ້ງປະຕິບັດຄັກແນ່ ແຕ່ສຳລັບບົດນີ້ຜູ້ຂຽນຂໍເວົ້າແຕ່ສະເພາະກ່ຽວກັບ ວິທີຄວບຄຸມດ້ວຍການປັບຂຶ້ນພາສີການຈຳໜ່າຍເຫຼົ້າ ເບຍ ແລະ ຢາສູບ ການປັບຂຶ້ນພາສີການຈຳໜ່າຍນີ້ເລີ່ມປະຕິບັດມາແຕ່ປີ 2015 ພຸ້ນ ສຳລັບຢາສູບແມ່ນໄດ້ປັບພາສີຈຳໜ່າຍຂຶ້ນໃນອັດຕາ 75% ໃນປີ 2015 ຈາກ 15% ໃນເມື່ອກ່ອນ ແລະ ໄດ້ເພີ່ມຂຶ້ນເປັນ 85% ນັບແຕ່ປີ 2018 ເປັນຕົ້ນມາ ການປັບຂຶ້ນພາສີຢາສູບນີ້ ເຮັດໃຫ້ພວກສິງອົມຄວັນຕ້ອງໄດ້ຄຶດໜັກ ກ່ອນຈະຈົກເງິນຊື້ຢາສູບ ເພາະມັນແພງຂຶ້ນແບບກະໂດດຂັ້ນ ຂ່າວບອກວ່າ ລາຍຮັບຂອງລັດຈາກການປັບຂຶ້ນພາສີການຈຳໜ່າຍຢາສູບນັ້ນເກັບໄດ້ 2.900 ຕື້ກວ່າດົງ ໃນປີ 2016 ແລະ 7.700 ຕື້ດົງ ໃນປີ 2017 ສຳລັບພາສີ ສຳລັບເຄື່ອງດື່ມປະເພດມຶນເມົາ (ເຫຼົ້າ-ເບຍ) ນັ້ນ ແມ່ນອີງໃສ່ລະດັບຄວາມແຮງຂອງທາດເຫຼົ້າ ຄື: ປະເພດທີ່ມີຄວາມແຮງແຕ່ 20 ອົງສາຂຶ້ນໄປ ໄດ້ປັບຂຶ້ນຈາກ 50% ເປັນ 65% ສ່ວນປະເພດທີ່ມີຄວາມແຮງຕ່ຳກວ່າ 20 ອົງສານັ້ນ ໄດ້ປັບຂຶ້ນຈາກ 25% ເປັນ 35% ເຫັນບໍລະ ການເຮັດໃຫ້ລາຄາເຄື່ອງດື່ມປະເພດມຶນເມົາມີລາຄາແພງຂຶ້ນນັ້ນ ນອກຈາກຈະສາມາດຫຼຸດຜ່ອນຈຳນວນຜູ້ດື່ມແລ້ວ ລັດກໍຍັງມີເງິນເຂົ້າຖົງເພີ່ມຂຶ້ນເປັນເງົາຕາມໂຕ.
ທີ່ຣັດເຊຍ: ແຕ່ໃດໆມາ ປະເທດຣັດເຊຍ ໄດ້ຂຶ້ນຊື່ລືຊາວ່າ ເປັນແດນ “ໂວນກາ” ເຫຼົ້າເດັດຕົ້ມກັ່ນຈາກເຂົ້າທີ່ເປັນເອກະລັກຂອງຊາວຣັດເຊຍແຕ່ສະໄໝບູຮານ ແຕ່ການຂຶ້ນຊື່ລືຊາດ້ານນີ້ ຜັດໄດ້ເສື່ອມຄວາມໝາຍລົງໃນຍຸກທ່ານ ວະລາດີເມຍ ປູຕິນ ເປັນປະທານາທິບໍດີ ເພາະທ່ານເປັນຄົນຫຼິ້ນກີລາ ຮັກສາສຸຂະພາບ ທີ່ຍາກຈະຫາຜູ້ນຳປະເທດອື່ນທຽບທັນໄດ້ ດັ່ງນັ້ນ ຈຶ່ງບໍ່ແປກທີ່ຣັດເຊຍໃນຍຸກຂອງທ່ານນີ້ ໄດ້ເອົາມາດຕະການຫຼາຍຢ່າງເພື່ອຫຼຸດການບໍລິໂພກເຫຼົ້າພາຍໃນປະເທດ ໄປພ້ອມກັບການປາບປາມການຜະລິດເຫຼົ້າເຖື່ອນທີ່ແຜ່ຫຼາຍ ແລະ ເປັນອັນຕະລາຍຮ້າຍແຮງຕໍ່ສຸຂະພາບຂອງຄົນພາຍໃນປະເທດ ມາດຕະການທີ່ວ່ານີ້ ລວມມີການຈຳກັດສະຖານທີ່ ແລະ ເວລາຂາຍເຫຼົ້າ ການປັບຂຶ້ນລາຄາຂາຍຍ່ອຍ ເຫຼົ້າ-ເບຍ ອອກແຮງໂຄສະນາກ່ຽວກັບຄຸນນະພາບຂອງຊີວິດທີ່ປອດຈາກເຫຼົ້າ ໝາກຜົນທີ່ໄດ້ຈາກການຈຳກັດການບໍລິໂພກເຫຼົ້າ ໄດ້ເຮັດໃຫ້ອາຍຸຍືນສະເລ່ຍຂອງຄົນຣັດເຊຍ ເພີ່ມຂຶ້ນເປັນ 78 ປີ ສຳລັບເພດຍິງ 68 ປີ ສຳລັບເພດຊາຍ (ສະຖິຕິປີ 2018) ເມື່ອຊຸມປີຕົ້ນໆຂອງທົດສະວັດ 1990 ນັ້ນ ອາຍຸສະເລ່ຍຂອງຜູ້ຊາຍຣັດເຊຍ ມີພຽງ 57 ປີເທົ່ານັ້ນ.