ສຳນັກຂ່າວຕ່າງປະເທດລາຍງານວ່າ ບໍລິສັດຕ່າງໆໃນສະຫະລັດອາເມຣິກາ ໃຊ້ຫຸ່ນຍົນໃນບ່ອນເຮັດວຽກກັນໜ້ອຍລົງໃນໄລຍະປີ 2019 ເມື່ອທຽບກັບປີກ່ອນໜ້ານັ້ນ ຊຶ່ງນັບວ່າເປັນການຫຼຸດລົງຄັ້ງທຳອິດຂອງການສັ່ງຊື້ຫຸ່ນຍົນຕັ້ງແຕ່ປີ 2015.
ການສັ່ງຊື້ຫຸ່ນຍົນເມື່ອປີທີ່ຜ່ານມາຫຼຸດລົງ ຢູ່ທີ່ລະດັບ 23.758 ເຄື່ອງ ຊຶ່ງຫຼຸດລົງຈາກປີກ່ອນໜ້ານັ້ນເຖິງ 16% ຂໍ້ມູນດັ່ງກ່າວ ມາຈາກສະມາຄົມ Advancing Automation ຊຶ່ງເປັນກຸ່ມອຸດສາຫະກຳໃນເມືອງແອນຮາເບີ ລັດມິຊິແກນ.
ນອກຈາກນີ້ ການສັ່ງຊື້ຫຸ່ນຍົນໃນເມັກຊິກ ເມື່ອປີທີ່ຜ່ານມາກໍຫຼຸດລົງ 25% ເປັນ 3.263 ເຄື່ອງ ສ່ວນການສັ່ງຊື້ໃນການາດາ ກໍໃກ້ຄຽງກັນຢູ່ທີ່ລະດັບປະມານ 3.000 ເຄື່ອງ.
ເປົ້າໝາຍສຳຄັນຂອງການບໍລິຫານງານຂອງລັດຖະບານປະທານາທິບໍດີ ໂດນັລ ທຣຳ ຄືການໃຫ້ບັນດາບໍລິສັດຜູ້ຜະລິດກັບມາສ້າງງານໃນສະຫະລັດ ໂດຍຫຸ່ນຍົນຮຸ່ນໃໝ່ໆ ເຮັດໃຫ້ບໍລິສັດຕ່າງໆໃນສະຫະລັດອາເມຣິກາ ສາມາດແຂ່ງຂັນກັບແຮງງານຕົ້ນທຶນຕ່ຳໃນປະເທດຈີນ ແລະ ປະເທດອື່ນໆໄດ້.
ຢ່າງໃດກໍຕາມ ຜູ້ຊ່ຽວຊານບາງຄົນເຊື່ອວ່າ ເວລານີ້ ມີການອ່ອນຕົວລົງໃນດ້ານການຜະລິດທີ່ຕ້ອງໃຊ້ຫຸ່ນຍົນ.