ສະຖານທູດສະຫະລັດອາເມຣິກາ ປະຈຳ ສປປ ລາວ ຈັດງານສະເຫຼີມສະຫຼອງ ວັນປະກາດເອກະລາດ ສະຫະລັດອາເມຣິກາ ຄົບຮອບ 247 ປີ ຂຶ້ນໃນຕອຍຄ່ຳຂອງວັນທີ 8 ມິຖຸນາ 2023 ທີ່ໂຮງແຮມຄຣາວພລາຊາ ນະຄອນຫຼວງວຽງຈັນ ໂດຍການເຂົ້າຮ່ວມຂອງ ທ່ານ ດຣ ບຸນແຝງ ພູມມະໄລສິດ ລັດຖະມົນຕີ ກະຊວງສາທາລະນະສຸກ ທ່ານ ບຸນເຫຼືອ ພັນດານຸວົງ ຮອງລັດຖະ ມົນຕີ ກະຊວງການຕ່າງປະເທດ ມີບັນດາລັດຖະມົນຕີ ຮອງລັດຖະມົນຕີ ທູດທູຕານຸທູດ ແລະ ແຂກຖືກເຊີນ.
ທ່ານ ປີເຕີ ເຮມອນ ເອກອັກຄະລັດຖະທູດສະຫະລັດອາເມຣິກາ ກ່າວວ່າ: ປີນີ້ ສປປ ລາວ ແມ່ນກຳລັງປະເຊີນໜ້າກັບຄວາມ ທ້າທາຍຫລາຍຢ່າງ ໃນການຟື້ນຟູເສດຖະກິດພາຍໃນ ພາຍຫລັງຜົນກະທົບທາງເສດຖະກິດໃນທົ່ວໂລກ ບໍ່ວ່າຈະເປັນ ຈາກ ການແຜ່ລະບາດຂອງພະຍາດໂຄວິດ-19 ແລະ ອື່ນໆ ສະຫະລັດອາເມລິກາ ມີຄວາມຍິນດີທີ່ໄດ້ໃຫ້ການຊ່ວຍເຫຼືອແກ່ ລັດຖະ ບານ ກໍຄື ປະຊາຊົນລາວ ໃນການຟື້ນຟູເສດຖະກິດ ແລະ ເພື່ອຊ່ວຍກະກຽມຄວາມພ້ອມໃຫ້ແກ່ ສປປ ລາວ ໃນການເປັນ ເຈົ້າພາບກອງປະຊຸມອາຊຽນ ໃນປີ 2024.
ພວກຂ້າພະເຈົ້າພາກພູມໃຈທີ່ໄດ້ເຮັດວຽກຮ່ວມກັບລັດຖະບານແຫ່ງ ສປປ ລາວ ໃນຂົງເຂດວຽກງານສາທາລະນະສຸກ ໂພ ຊະນາການ ແລະ ໂຄງການອາຫານທ່ຽງຢູ່ໂຮງຮຽນ ການປັບປຸງບັນຍາກາດການລົງທຶນ ແລະ ຊ່ວຍໃຫ້ຊາວກະສິກອນມີລາຍ ຮັບເພີ່ມຂື້ນ ສ້າງຄວາມອາດສາມາດຂອງບັນດາມະຫາວິທະຍາໄລ ລວມເຖິງສະພາແຂວງຕ່າງໆ ພັດທະ ນາທັກສະດ້ານພາ ສາອັງກິດ ແລະ ອະນຸລັກມູນມໍລະດົກທາງວັດທະນະທຳ ເພີ່ມຄວາມປອດໄພຕາມດ່ານຊາຍແດນ ແລະ ຕໍ່ສູ້ກັບການລັກ ລອບຄ້າຂາຍຢາເສບຕິດ ການຄ້າມະນຸດ ແລະ ການຄ້າຂາຍສັດປ່າ ທີ່ຜິດກົດໝາຍ ສ້າງຄວາມເຂັ້ມແຂງໃຫ້ແກ່ວຽກງານ ຄຸ້ມຄອງລັດຄຸ້ມຄອງສັງຄົມດ້ວຍກົດໝາຍ ແລະ ກະກຽມຄວາມພ້ອມໃນການຮັບມືກັບໄພພິບັດທີ່ອາດຈະເກີດຂື້ນໃນຕໍ່ໜ້າ ແລະ ການເກັບກູ້ລະເບີດຄົງຄ້າງທີ່ຍັງບໍ່ທັນແຕກໃນຫຼາຍແຂວງຂອງ ສປປ ລາວ.
ທັງໝົດນີ້ ແມ່ນຢູ່ພາຍໃຕ້ຂອບການຮ່ວມມືແບບກວມລວມ ລະຫວ່າງ ສປປ ລາວ ແລະ ສະຫະລັດອາເມລິກາ ທີ່ໄດ້ຕົກລົງ ເຫັນດີໂດຍ ອະດີດປະທານາທິບໍດີ Obama ແລະ ພະນະທ່ານ ບຸນຍັງ ວໍລະຈິດ ໃນປີ 2016 ທີ່ຜ່ານມາ ບັນດາໂຄງການ ຊ່ວຍເຫຼືອທັງໝົດເຫຼົ່ານີ້ແມ່ນມີຈຸດປະສົງໃນການຊ່ວຍໃຫ້ ສປປ ລາວ ບັນລຸເປົ້າໝາຍການພັດທະນາ.
ທ່ານເອກອັກຄະລັດຖະທູດສະຫະລັດອາເມຣິກາ ກ່າວຕື່ມວ່າ: ງານໃນຄໍ່າຄືນນີ້ກໍຖືເປັນງານສົ່ງທ້າຍສຳລັບຂ້າພະ ເຈົ້າ ແລະ ທ່ານ ນາງ ດຸສະດີ ພວກຂ້າພະເຈົ້າໄດ້ໃຊ້ເວລາ 10 ປີ ຢູ່ ສປປ ເຊິ່ງເປັນໄລຍະເວລາທີ່ມີສີສັນທີ່ສຸດ ໃນສາຍອາຊີບ ນັກການ ທູດຂອງຂ້າພະເຈົ້າທີ່ໄດ້ເປັນຕົວແທນຂອງ ສະຫະລັດອາເມຣິກາ ໃນຖານະເອກອັກຄະລັດຖະທູດ ປະຈຳ ສປປ ລາວ ຄວາມ ປາຖະໜາດີທີ່ ພວກຂ້າພະເຈົ້າມີຕໍ່ ສປປ ລາວ ຈະມີຢູ່ຕະຫຼອດໄປ ແລະ ແນ່ນອນວ່າ ພວກຂ້າພະເຈົ້າຈະກັບຄືນມາຢ້ຽມ ຢາມ ສປປ ລາວ ອີກໃນອະນາຄົດຂ້າງໜ້າ ເພື່ອທີ່ຈະໄດ້ມາເຫັນການພັດທະນາຕ່າງໆຢູ່ ສປປ ລາວ ໃນຕໍ່ໜ້າດ້ວຍຕົນເອງ.