ວັນທີ 31 ພຶດສະພາ 2023 ທີ່ ກະຊວງການຕ່າງປະເທດ ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຄຳນັບຂອງ ທ່ານ ເບີນາດີໂນ ເວກກາ ຮອງປະທານສະພາທີ່ປຶກສາທຸລະກິດອາຊຽນ ທັງເປັນຜູ້ຕາງໜ້າໃນນາມສະພາການຄ້າ ແລະ ອຸດສາຫະກຳແຫ່ງຊາດ ອິນໂດເນເຊຍ ພ້ອມດ້ວຍຄະນະ ໃນໂອກາດມາຢ້ຽມຢາມເຮັດວຽກຮ່ວມກັບສະພາການຄ້າ ແລະ ອຸດສາຫະກໍາແຫ່ງຊາດລາວ.
ໂອກາດດັ່ງກ່າວ ທ່ານ ສະເຫຼີມໄຊ ກົມມະສິດ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການປະກອບສ່ວນອັນສຳຄັນຂອງສະພາທຸລະກິດອາຊຽນໃນໄລຍະຜ່ານມາ ໂດຍສະເພາະຕໍ່ຜົນຂອງກອງປະຊຸມພົບປະລະຫວ່າງສະພາທຸລະກິດອາຊຽນກັບບັນດາຜູ້ນໍາອາຊຽນໃນວັນທີ 10 ພຶດສະພາ 2023 ໃນໄລຍະກອງປະຊຸມສຸດຍອດອາຊຽນ ຄັ້ງທີ 42 ທີ່ ລາບວນ ບາໂຈ ອິນໂດເນເຊຍ ກໍຄືການຈັດຕັ້ງຜັນຂະຫຍາຍແຜນວຽກບູລິມະສິດ ທີ່ ອິນໂດເນເຊຍເປັນປະທານ ໃນປີ 2023 ພາຍໃຕ້ຄໍາຂັວນ “ຄວາມເປັນແກນກາງຂອງອາຊຽນ: ການຫັນເປັນນະວັດຕະກໍາ ເພື່ອກ້າວໄປສູ່ຄວາມເຂັ້ມແຂງຮອບດ້ານ” ພ້ອມນີ້ ທ່ານ ຮອງນາຍົກນາຍົກລັດຖະມົນຕີ ບໍ່ພຽງແຕ່ຊຸກຍູ້ໃຫ້ໃຫ້ຄະນະສະພາທຸລະກິດອາຊຽນ ສືບຕໍ່ຈັດຕັ້ັ້ງປະຕິບັດບັນດາແຜນວຽກບູລິມະສິດຕ່າງໆໃຫ້ສາມາດສໍາເລັດຕາມເປົ້າໝາຍທີ່ວາງໄວ້ເທົ່ານັ້ນແຕ່ຍັງໄດ້ໃຫ້ຂໍ້ສະເໜີແນະທີ່ຕິດພັນກັບວຽກງານເສດຖະກິດພາຍໃນອາຊຽນ ເຊັ່ນ: ການຍົກລະດັບການສ້າງຂີດຄວາມສາມາດຂອງຂະແໜງການທາງດ້ານການເຊື່ອມໂຍງ ເຊື່ອມຈອດ ການອຳນວຍຄວາມສະດວກທາງການຄ້າ ການສົ່ງເສີມຂົງເຂດຈຸນລະວິສາຫະກິດ ວິສາຫະກິດຂະໜາດນ້ອຍ ແລະ ກາງ ການຫັນເປັນດີຈີຕອນ ການສ້າງຄວາມເຂັ້ມແຂງດ້ານການຄໍ້າປະກັນສະບຽງອາຫານ ສາທາລະນະສຸກ ແລະ ການພັດທະນາແບບຍືນຍົງ ອັນສໍາຄັນ ແມ່ນການເພິ່ມທະວີການຄ້າ-ການລົງທຶນພາຍໃນບັນດາປະເທດສະມາຊິກອາຊຽນເວົ້າສະເພາະ ເວົ້າລວມກໍຄື ການຮ່ວມມືກັບປະເທດຄູ່ເຈລະຈາອາຊຽນລະຫວ່າງພາກລັດ ແລະ ພາກທຸລະກິດໃນພາກພຶ້ນ ເພື່ອຊ່ວຍຊຸກຍູ້ການຟຶ້ນຟູເສດຖະກິດອາຊຽນ ພາຍຫລັງການແຜ່ລະບາດພະຍາດໂຄວິດ-19.
ທ່ານ ສະເຫຼີມໄຊ ກົມມະສິດ ໄດ້ສະແດງຄວາມຂອບໃຈຕໍ່ຄະນະສະພາທີ່ປຶກສາທຸລະກິດອາຊຽນ ທີ່ຈະໃຫ້ການສະໜັບສະໜູນ ແລະ ຊ່ວຍເຫຼືອ ໃນໂອກາດທີ່ ສປປ ລາວ ຈະຮັບກຽດເປັນປະທານອາຊຽນ ປີ 2024 ແລະ ເຊື່ອໝັ້ນວ່າ ສະພາທຸລະກິດອາຊຽນ ຈະສືບຕໍ່ເຮັດວຽກຮ່ວມກັບ ສະພາການຄ້າ ແລະ ອຸດສາຫະກຳແຫ່ງຊາດ ສປປ ລາວ ຢ່າງໃກ້ຊິດ.
ສະພາທີ່ປຶກສາທຸລະກິດອາຊຽນ ໃນນາມສະພາການຄ້າ ແລະ ອຸດສາຫະກຳແຫ່ງຊາດ ອິນໂດເນເຊຍ ພ້ອມດ້ວຍຄະນະ ໄດ້ເດີນທາງມາຢ້ຽມຢາມເຮັດວຽກຮ່ວມກັບສະພາການຄ້າ ແລະ ອຸດສາຫະກໍາແຫ່ງຊາດລາວໃນວັນທີ 31 ພຶດສະພາ-1 ມິຖຸນາ 2023 ເຊິ່ງຄະນະຈະໄດ້ເຄື່ອນໄຫວເຮັດວຽກຮ່ວມກັບພາກລັດ ແລະ ພາກທຸລະກິດຂອງ ສປປ ລາວ ແນໃສ່ເພື່ອເພິ່ມທະວີ ແລະ ເສີມຂະຫຍາຍການຮ່ວມມືທາງດ້ານການຄ້າ ແລະ ການລົງທຶນໃຫ້ສູງຂຶ້ນ.
