ກະຊວງເຕັກໂນໂລຊີ ແລະ ການສື່ສານ ຮ່ວມກັບ ບໍລິສັດ Meta Bank ປະເທດສິງກະໂປ ຈັດສໍາມະນາລະດັບລັດຖະມົນຕີວ່າດ້ວຍການຫັນເປັນດິຈິຕ໋ອນກຸ່ມຂໍ້ມູນຜູກພັນ 4.0 ເພື່ອພັດທະນາເສດຖະກິດດິຈິຕ໋ອນຂອງ ສປປ ລາວວັນທີ 26 ພຶດສະພາ 2023 ທີ່ຫໍປະຊຸມແຫ່ງຊາດ ມີທ່ານ ສອນໄຊ ສີພັນດອນ ນາຍົກລັດຖະມົນຕີ ທ່ານ ບໍ່ວຽງຄໍາ ວົງດາລາ ລັດຖະມົນຕີກະຊວງເຕັກໂນໂລຊີ ແລະ ການສື່ສານ ພ້ອມດ້ວຍບັນດາລັດຖະມົນຕີ ຜູ້ວ່າການທະນາຄານແຫ່ງ ສປປ ລາວ ບັນດາຮອງລັດຖະມົນຕີ ຫົວໜ້າກົມ ສະຖາບັນ ຫ້ອງການ ປະທານບໍລິສັດ Meta Bank ຕະຫຼອດຮອດຄະນະຜູ້ບໍລິຫານງານ ແລະ ແຂກທີ່ຖືກເຊີນເຂົ້າຮ່ວມ.
ການຈັດສຳມະນາຄັ້ງນີ້ເພື່ອສົ່ງເສີມການຫັນເປັນດິຈິຕ໋ອນຂອງ ສປປ ລາວ ພັດທະນາເສດຖະກິດດິຈິຕ໋ອນ ບົນພື້ນຖານການນຳໃຊ້ເຕັກໂນໂລຊີກຸ່ມຂໍ້ມູນຜູກພັນ (Blockchain Technology) ແລະ ສ້າງຄວາມຮັບຮູ້ ເຂົ້າໃຈ ແລະ ເປັນເອກະພາບໃນການຜັນຂະຫຍາຍຈັດຕັ້ງປະຕິບັດວິໄສທັດການພັດທະນາເສດຖະກິດດິຈິຕ໋ອນແຫ່ງຊາດ ໄລຍະ 20 ປີ (2021-2040) ຍຸດທະສາດການພັດທະນາເສດຖະກິດດິຈິຕ໋ອນແຫ່ງຊາດໄລຍະ 10 ປີ (2021-2030) ແຜນພັດທະນາເສດຖະກິດດິຈິຕ໋ອນແຫ່ງຊາດໄລຍະ 5 ປີ (201-2025) ຂອງ ສປປ ລາວ ແລະ ການນຳໃຊ້ເຕັກໂນໂລຊີກຸ່ມຂໍ້ມູນຜູກພັນໃນການສ້າງເສດຖະກິດດິຈິຕ໋ອນ ເມື່ອບໍ່ດົນມານີ້ກະຊວງເຕັກໂນໂລຊີ ແລະ ການສື່ສານ ໄດ້ຮ່ວມກັບ ບໍລິສັດ Meta Bank ລົງນາມສັນຍາຮ່ວມມືວ່າດ້ວຍການສົ່ງເສີມການຫັນເປັນດິິຈິຕ໋ອນ ແລະ ພັດທະນາພື້ນຖານໂຄງລ່າງເຕັກໂນໂລຊີກຸ່ມຂໍ້ມູນຜູກພັນແຫ່ງຊາດ ເພື່ອສຸມໃສ່ການພັດທະນາພື້ນຖານໂຄງລ່າງເຕັກໂນໂລຊີບລ໋ອກເຊນແຫ່ງຊາດ ຮອງຮັບການຫັນເປັນດິຈິຕ໋ອນຂອງແຕ່ລະຂະແໜງການ ສ້າງຕັ້ງສູນຄົ້ນຄວ້າ ແລະ ພັດທະນາເຕັກໂນໂລຊີບລ໋ອກເຊນ ແລະ ສ້າງຕັ້ງກອງທຶນການສຶກສາການຫັນເປັນດິຈິຕ໋ອນ ເພື່ອຊຸກຍູ້ສົ່ງເສີມວຽກງານການພັດທະນາຊັບພະຍາກອນມະນຸດດ້ານດິຈິຕ໋ອນໃນ ສປປ ລາວ ແນໃສ່ປະກອບສ່ວນເຂົ້າໃນການຈັດຕັ້ງຜັນຂະຫຍາຍ ວິໄສທັດ ຍຸດທະສາດ ແລະ ແຜນພັດທະນາເສດຖະກິດດິຈິຕ໋ອນແຫ່ງຊາດ ແລະ ເຮັດໃຫ້ການພັດທະນາເສດຖະກິດດິຈິຕ໋ອນ ສາມາດສ້າງລາຍຮັບປະກອບເຂົ້າ GDP ຂອງປະເທດເພີ່ມຂຶ້ນເທື່ອລະກ້າວ ປະກອບສ່ວນເຂົ້າໃນການຈັດຕັ້ງປະຕິບັດວາລະແຫ່ງຊາດຂອງລັດຖະບານ ໃນການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນໃຫ້ມີສະພາບດີຂຶ້ນ ແລະ ທັງເປັນການຊຸກຍູ້ໃຫ້ ສປປ ລາວ ກ້າວສູ່ເຕັກໂນໂລຊີ Web 3.0 ແລະ ກຸ່ມຂໍ້ມູນຜູກພັນ 4.0 ແລະ ອຸດສະຫະກຳ 4.0 ຢ່າງວ່ອງໄວ.
ການສຳມະນາຜູ້ເຂົ້າຮ່ວມໄດ້ຮັບຟັງການສະເໜີບົດຮຽນຈາກຊ່ຽວຊານລະດັບສາກົນຈາກຫຼາຍປະເທດເຊັ່ນ: ການນຳສະເໜີກ່ຽວກັບຄວາມສີວິໄລໃນຍຸກດິຈິຕ໋ອນ ການຫັນເປັນດິຈິຕ໋ອນເພື່ອພັດທະນາປະເທດຊາດ ເສດຖະກິດດິຈິຕ໋ອນ ແລະ ສະເໜີ ກ່ຽວກັບການຫັນເປັນດິຈິຕ໋ອນຂອງ ສປປ ລາວ ພ້ອມນັ້ນໄດ້ພ້ອມກັນຄົ້ນຄວ້າລົງເລິກ ແລະ ແລກປ່ຽນຄຳຄິດຄຳເຫັນ ເພື່ອຊອກຫາແນວທາງຊຸກຍູ້ ແລະ ເລັ່ງລັດການພັດທະນາເສດຖະກິດດິຈິຕ໋ອນຂອງປະເທດເຮົາໃຫ້ບັນລຸຜົນສຳເລັດຕາມລະດັບຄາດໝາຍ ພ້ອມທັງຄົ້ນຄວ້າສ້າງເງື່ອນໄຂອຳນວຍຄວາມສະດວກ ແລະ ກົນໄກ ການຮ່ວມມືພາກລັດ ແລະ ເອກະຊົນ ແລະ ນັກລົງທຶນທົ່ວໂລກເພື່ອຮ່ວມມືກັນໃນການສ້າງກຸ່ມຂໍ້ມູນຜູກພັນ 4.0 (Blockchain 4.0) ຊຸກຍູ້ແລະ ຂັບເຄື່ອນການພັດທະນາເສດຖະກິດດິຈິຕ໋ອນຂອງປະເທດເຮົາຢ່າງຍືນຍົງ ແລະ ໝັ້ນຄົງ.
ໂອກາດນີ້ທ່ານ ສອນໄຊ ສີພັນດອນ ມີຄໍາເຫັນວ່າ:ຕະຫຼອດໄລຍະຜ່ານມາພັກ ແລະ ລັດ ໄດ້ນຳພາ-ຊີ້ນຳບັນດາຂະແໜງການໃນທຸກຂັ້ນ ເພື່ອສົ່ງເສີມການຄົ້ນຄວ້າ ການພັດທະນາ ແລະ ການນຳໃຊ້ວິທະຍາສາດ ເຕັກໂນໂລຊີ ແລະ ນະວັດຕະກຳ ຕາມແນວທາງການຫັນເປັນອຸດສາຫະກຳ ແລະ ທັນສະໄໝ ເຊິ່ງເປັນບາດກ້າວລິເລີ່ມໃນການເຂົ້າສູ່ການຫັນເປັນດິຈິຕອນຂອງປະເທດ ບົນພື້ນຖານນັ້ນ ບັນດາກະຊວງ ຂະແໜງການ ແລະ ທ້ອງຖິ່ນໄດ້ຜັນຂະຫຍາຍ ແລະ ປະຕິບັດນະໂຍບາຍຈຳນວນໜຶ່ງ ເພື່ອຊຸກຍູ້ການພັດທະນາ ເຕັກໂນໂລຊີສື່ສານຂໍ້ມູນຂ່າວສານ ພື້ນຖານໂຄງລ່າງໂທລະຄົມມະນາຄົມກໍໄດ້ຮັບການພັດທະນາ ແລະ ຂະຫຍາຍກວ້າງໃນຂອບເຂດທົ່ວປະເທດ ເຕັກໂນໂລຊີດິຈິຕ໋ອນ ໄດ້ຖືກນຳໃຊ້ຢູ່ໃນບັນດາຂະແໜງອຸດສາຫະກຳ ແລະ ການບໍລິການ ຂະແໜງກະສິກຳ ການສຶກສາ ແລະ ສາທາລະນະສຸກ ເຊິ່ງໄດ້ສ້າງວຽກເຮັດງານທຳ ເພີ່ມລາຍຮັບ ແລະ ຍົກສູງຄຸນນະພາບການດຳລົງຊີວິດຂອງປະຊາຊົນໃຫ້ດີຂຶ້ນ ບັນດາກະຊວງ ອົງການຂັ້ນສູນກາງຈຳນວນໜຶ່ງ ກໍໄດ້ນຳໃຊ້ເຕັກໂນໂລຊີດິຈິຕອນໃນການຄຸ້ມຄອງບໍລິຫານ ແລະ ບໍລິການແບບເອເລັກໂຕຣນິກ ພາຍໃຕ້ການຫັນເປັນທັນສະໄໝຢູ່ປະເທດເຮົາ ພ້ອມນັ້ນທ່ານໄດ້ເນັ້ນໜັກຕື່ມອີກວ່າ: ພວກເຮົາຈະຕ້ອງພ້ອມກັນຕັດສິນໃຈ ດຳເນີນພາລະກຳປະຫວັດສາດທີ່ສຳຄັນດັ່ງກ່າວເພື່ອພັດທະນາປະເທດຊາດໃຫ້ຈະເລີນຮຸ່ງເຮືອງຕາມແນວທາງຂອງພັກເຮົາວາງໄວ້ ຢາກເຮັດໄດ້ຄືແນວນັ້ນ ຄະນະພັກ-ຄະນະນຳ ແລະ ອົງການປົກຄອງທຸກຂັ້ນຕ້ອງນຳພາ-ຊີ້ນຳການຫັນເປັນດິຈິຕ໋ອນໃນຂົງເຂດຂອງຕົນ ໃຫ້ປະສົບຜົນສຳເລັດເປັນຢ່າງດີ ສະພາແຫ່ງຊາດເປັນເຈົ້າການສ້າງ ແລະ ປັບປຸງບັນດານິຕິກຳຕິດພັນກັບການພັດທະນາເສດຖະກິດດິຈິຕອນ ພ້ອມທັງຕິດຕາມ ກວດກາ ການຈັດຕັ້ງປະຕິບັດໃຫ້ຖືກຕ້ອງຕາມລັດຖະທຳມະນູນ ແລະ ກົດໝາຍຂອງ ສປປ ລາວ ລັດຖະບານເປັນເຈົ້າການໃນການຄົ້ນຄວ້າ ຜັນຂະຫຍາຍແຜນຍຸດທະສາດການພັດທະນາເສດຖະກິດດິຈິຕອນໃຫ້ເປັນນິຕິກຳ ເປັນແຜນພັດທະນາ ໂຄງການ ແລະ ຈັດຕັ້ງປະຕິບັດຕາມຄວາມເໝາະສົມ ແນໃສ່ຊຸກຍູ້ສົ່ງເສີມການຂະຫຍາຍຕົວເສດຖະກິດດິຈິຕອນຂອງປະເທດເຮົາ ໃຫ້ມີຄວາມວ່ອງໄວທັນກັບສະພາບການໃໝ່ ແນວລາວສ້າງຊາດ ແລະ ອົງການຈັດຕັ້ງມະຫາຊົນຕ້ອງໄດ້ເອົາໃຈໃສ່ໂຄສະນາຂົນຂວາຍ ແລະ ປຸກລະດົມມະຫາຊົນໃຫ້ເຂົ້າຮ່ວມຢ່າງກວ້າງຂວາງ ແຂງແຮງ ແລະ ຟົດຟື້ນ ຄະນະໂຄສະນາອົບຮົມສົມທົບກັບບັນດາອົງການຈັດຕັ້ງກ່ຽວຂ້ອງ ຈັດຕັ້ງເຜີຍແຜ່ ແລະ ຄົ້ນຄວ້າເຊື່ອມຊຶມ”`ເພື່ອຫັນປ່ຽນຈິນຕະກາການໃຫ້ແກ່ຄະນະພັກ-ຄະນະນຳ ແລະ ອຳນາດການປົກຄອງທຸກຂັ້ນ ສະມາຊິກພັກ-ພະນັກງານຫຼັກແຫຼ່ງ ແລະ ນັກທຸລະກິດ-ຜູ້ປະກອບການໃຫ້ທົ່ວເຖິງ ແລະ ເລິກເຊິ່ງເພື່ອໃຫ້ທົ່ວສັງຄົມປະກອບສ່ວນຢ່າງຕັ້ງໜ້າເຂົາໃນຂະບວນການຫັນເປັນດິຈິຕອນຂອງປະເທດເຮົາ.
ຂັນທະວີ 26.5.23