ສະພາຄຸ້ມຄອງວິຊາຊີບປິ່ນປົວ (ສວປ) ກະຊວງສາທາລະນະສຸກ ໄດ້ຈັດພິທີມອບໃບອະນຸຍາດເຄື່ອນໄຫວວິຊາຊີບປິ່ນປົວ ໃຫ້ທ່ານໝໍທັນຕະແພດ ແລະ ພະຍາບານໂຮງໝໍເດັກ ໃນວັນທີ 29 ມິຖຸນາ 2020 ທີ່ສູນເຝິກອົບຮົມແພດເດັກ ນະຄອນຫຼວງວຽງຈັນ ເປັນປະທານຂອງທ່ານ ປອນເມກ ດາລາລອຍ ປະທານສະພາຄຸ້ມຄອງວິຊາຊີບປິ່ນປົວ ມີທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ພ້ອມດ້ວຍຮອງປະທານສະພາຄຸ້ມຄອງວິຊາຊີບປິ່ນປົວ ອຳນວຍການໂຮງໝໍເດັກ ພະນັກງານແພດໝໍ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ການຂຶ້ນທະບຽນ ແລະ ອອກໃບອະນຸຍາດເຄື່ອນໄຫວວິຊາຊີບປິ່ນປົວຄັ້ງນີ້ ເປັນຄັ້ງທຳອິດ ທີ່ສະພາຄຸ້ມຄອງວິຊາຊີບປິ່ນປົວ ໄດ້ເປັນເອກະພາບກັນເຮັດທົດລອງຄົ້ນຄວ້າອອກໃບອະນຸຍາດ ແລະ ຂຶ້ນທະບຽນໃຫ້ທ່ານໝໍ ແລະ ທັນຕະແພດລະດັບປະລິນຍາຕີຂຶ້ນໄປ ສ່ວນພະຍາບານລະດັບຊັ້ນສູງຂຶ້ນໄປ ມອບໃຫ້ໂຮງໝໍເດັກເປັນໂຮງໝໍທຳອິດ ເພື່ອຖອດຖອນບົດຮຽນ ໂດຍຄະນະກຳມະການວິຊາຊີບປິ່ນປົວການແພດ ຄະນະກຳມະການວິຊາຊີບປິ່ນປົວທັນຕະແພດ ແລະ ຄະນະກຳມະການວິຊາຊີບປິ່ນປົວພະຍາບານ ແລະ ຜະດຸງຄັນຂອງສະພາວິຊາຊີບປິ່ນປົວ ໄດ້ສົມທົບກັບໂຮງໝໍເດັກເພື່ອເກັບກຳຈຳນວນເປົ້າໝາຍ ແລະ ຈັດກອງປະຊຸມຄົ້ນຄວ້າຕາມຂັ້ນຕອນທີ່ວາງໄວ້ໃນບົດແນະນຳ ແລະ ເຫັນດີເປັນເອກະພາບ ຄົ້ນຄວ້າຕັດສິນເອົາຜູ້ທີ່ມີເງື່ອນໄຂ ໄດ້ຮັບໃບອະນຸຍາດເຄື່ອນໄຫວວິຊາຊີບປິ່ນປົວຊຸດທຳອິດ ຢູ່ໂຮງໝໍເດັກ 78 ຄົນ ໃນນັ້ນ ມີທ່ານໝໍ 47 ຄົນ ພະຍາບານ 27 ຄົນ ແລະ ທັນຕະແພດ 4 ຄົນ ເຊິ່ງການອອກໃບອະນຸຍາດເຄື່ອນໄຫວວິຊາຊີບປິ່ນປົວ ໃຫ້ບັນດາທ່ານໝໍທັນຕະແພດ ແລະ ພະຍາບານ ທີ່ເຄື່ອນໄຫວວຽກງານປິ່ນປົວຢູ່ໂຮງໝໍເດັກ ແນໃສ່ຢັ້ງຢືນຄຸນນະພາບ ແລະ ຄວາມປອດໄພຂອງການບໍລິການສຸຂະພາບ ປົກປ້ອງສິດ ແລະ ຜົນປະໂຫຍດອັນຊອບທຳຂອງຜູ້ປະກອບວິຊາຊີບປິ່ນປົວ ນອກນັ້ນ ການຂຶ້ນທະບຽນ ແລະ ໃບອະນຸຍາດຄັ້ງນີ້ແມ່ນການຂຶ້ນທະບຽນ ແລະ ອອກໃບອະນຸຍາດໃຫ້ຜູ້ປະກອບວິຊາຊີບປິ່ນປົວທີ່ໄດ້ເຮັດວຽກມາກ່ອນປີ 2020 ເພື່ອໃຫ້ສາມາດເຄື່ອນໄຫວວິຊາຊີບຂອງຕົນໄດ້ຢ່າງຖືກຕ້ອງຕາມລະບຽບກົດໝາຍ ໂດຍບໍ່ຜ່ານການສອບເສັງລະດັບຊາດ ໃບອະນຸຍາດມີອາຍຸນຳໃຊ້ 5 ປີ ແລະ ຖ້າຕ້ອງການຕໍ່ອາຍຸ ແມ່ນຕ້ອງມີຄະແນນສະສົມຂອງຂະບວນການພັດທະນາວິຊາຊີບຢ່າງຕໍ່ເນື່ອງ ຕາມທີ່ສະພາຄຸ້ມຄອງວິຊາຊີບປິ່ວປົວກຳນົດອອກ.