ເມືອງຫາດຊາຍຟອງ ນະຄອນຫຼວງວຽງຈັນ ຈັດກິດຈະກຳແຂ່ງກີລາຕີເປຕັງ ຊີງຂັນເຈົ້າເມືອງຫາດຊາຍຟອງ ຂຶ້ນເມື່ອບໍ່ດົນມານີ້ ຢູ່ເດີນກີລາ ປກສ ເມືອງ ເພື່ອສ້າງຂະບວນການ ຕ້ອນຮັບກອງປະຊຸມໃຫຍ່ ຄັ້ງທີ VII ອົງຄະນະພັກເມືອງຫາດຊາຍຟອງ ທີ່ຈະໄດ້ຈັດຂຶ້ນໄວໆນີ້ ທັງເປັນການຕ້ອນຮັບວັນສຳຄັນຕ່າງໆຂອງຊາດຂອງພັກອີກດ້ວຍ.
ທ່ານ ຖາວອນ ສີຫາມາຍາ ຮອງເຈົ້າເມືອງຫາດຊາຍຟອງ ກ່າວວ່າ: ຈຸດປະສົງເພື່ອກຽມຄວາມພ້ອມຮອບດ້ານ ແລະ ສ້າງຂະບວນການຄຳນັບຮັບຕ້ອນກອງປະຊຸມໃຫຍ່ ຄັ້ງທີ VII ອົງຄະນະພັກ ເມືອງຫາດຊາຍຟອງ ໃຫ້ມີບັນຍາກາດຟົດຟື້ນ ທັງເປັນການສ້າງຄວາມສາມັກຄີຮັກແພງລະຫວ່າງພະນັກງານຫ້ອງການອ້ອມຂ້າງ ແລະ ບັນດານັກທຸລະກິດຜູ້ປະກອບການ ໃຫ້ມີຄວາມແໜ້ນແຟ້ນຍິ່ງຂຶ້ນ.
ການແຂ່ງຂັນຄັ້ງນີ້ ມີນັກກີລາເຂົ້າຮ່ວມ 38 ທີມ ນອກນີ້ຍັງມີທີມນັກທຸລະກິດ 2 ທີມພົບກັບທີມການນຳເມືອງ 2 ທີມ ໂດຍລາງວັນທີ 1 ໄດ້ຮັບຂັນ 1 ໜ່ວຍ ພ້ອມເງິນ 8 ແສນກີບ ທີ 2 ໄດ້ຮັບຂັນ 1 ໜ່ວຍ ພ້ອມເງິນ 6 ແສນກີບ ທີ 3 ໄດ້ຮັບຂັນ 1 ໜ່ວຍ ແລະ ເງິນ 4 ແສນກີບ ນອກນີ້ຍັງມີລາງວັນຊົມເຊີຍຕື່ມອີກ.