ການແຂ່ງຂັນກີລາບານເຕະຊາຍ 4 ພາກສ່ວນ ປະຈຳປີ 2020 ຈັດຂຶ້ນວັນທີ 25-26 ມິຖຸນາ 2020 ຢູ່ສະໜາມກີລາຫຍ້າທຽມຫຼັກ 4 ເມືອງສາມັກຄີໄຊ ແຂວງອັດຕະປື ມີທ່ານ ຄຳພັນ ແກ້ວມະນີ ເຈົ້າຂອງສະໜາມກີລາຫຍ້າທຽມຫຼັກ 4 ຄະນະນຳ ຄູເຝິກນັກກີລາ ຕະຫຼອດຮອດກອງເຊຍຈາກ 4 ສະໂມສອນເຂົ້າຮ່ວມ.
ໂອກາດນີ້ ທ່ານ ນິລະນາມ ແວວສີ ຄະນະຮັບຜິດຊອບຈັດງານແຂ່ງຂັນກີລາບານເຕະ 4 ພາກສ່ວນ ປະຈຳປີ 2020 ທີ່ແຂວງອັດຕະປື ໄດ້ລາຍງານໃຫ້ຮູ້ວ່າ: ສຳລັບການແຂ່ງຂັນຄັ້ງນີ້ ເປັນການຮ່ວມກັນຈັດຂຶ້ນຂອງ 4 ສະໂມສອນ ພາຍໃນແຂວງອັດຕະປື ຄື: ສະໂມສອນຮ້ານເຂົ້າປຽກແຊບເອັຟຊີ ສະໂມສອນລີລາເອັຟຊີ ສະໂມສອນມັງກອນແດງເອັຟຊີ ແລະ ສະໂມສອນເດິອາເມຊິງເອັຟຊີ ຈຸດປະສົງເພື່ອເປັນການພົບປະສ້າງສັນສືບຕໍ່ຮັດແໜ້ນສາຍເລືອດນັກກີລາ ສົ່ງເສີມສາຍສຳພັນຄວາມສາມັກຄີ ແລະ ແລກປ່ຽນບົດຮຽນເຊິ່ງກັນ ແລະ ກັນ ລະຫວ່າງສາຍເລືອດນັກກີລາ 4 ສະໂມສອນໃຫ້ມີຄວາມໜັກແໜ້ນ ແລະ ແໜ້ນແຟ້ນຂຶ້ນເລື້ອຍໆ.
ຜ່ານການແຂ່ງຂັນ ສາມາດຄັດເລືອກໄດ້ທີມຜ່ານເຂົ້າຊີງຊະນະເລີດ ເປັນການພົບກັນລະຫວ່າງສະໂມສອນມັງກອນແດງ ແລະ ສະໂມສອນລີລາ ຜົນການແຂ່ງຂັນປາກົດວ່າ: ເປັນຝ່າຍສະໂມສອນມັງກອນແດງ ຍິງຈຸດໂທດແມ້ນກວ່າ ເອົາຊະນະສະໂມສອນລີລາໄປໄດ້ແບບຫວຸດຫວິດ 3-2 ປະຕູ ຫຼັງເວລາປົກກະຕິທັງ 2 ທີມບໍ່ສາມາດເອົາຊະນະກັນໄດ້ ສະເໝີກັນຢູ່ 3-3 ປະຕູ ເຮັດໃຫ້ສະໂມສອນມັງກອນແດງຄວ້າແຊັມໄປຄອງ ໄດ້ຮັບຂັນ 1 ໜ່ວຍ ພ້ອມເງິນ 5 ແສນກີບ ຮອງຊະນະເລີດໄດ້ຮັບເງິນ 3 ແສນກີບ ແລະ ອັນດັບທີ 3 ສະໂມສອນເດິອາເມຊິງ ໄດ້ຮັບເງິນລາງວັນ 2 ແສນກີບ.