ທ່ານ ວິໄຊ ພົມມະວົງສາ ຫົວໜ້າຄູເຝິກກະຕໍ້ ແຂວງຄຳມ່ວນ ຄູເຝິກກະຕໍ້ເຍົາວະຊົນທີມຊາດລາວ ແລະ ທັງເປັນຄະນະຮັບຜິດຊອບຈັດການແຂ່ງຂັນ ຈາກເມືອງທ່າແຂກ ແຂວງຄຳມ່ວນ ແຈ້ງໃຫ້ຮູ້ວ່າ: ວັນທີ 28 ມິຖຸນາ 2020 ຢູ່ສະໜາມກີລາກະຕໍ້ໂຄ້ງໜອງບົວ ໄດ້ຈັດການແຂ່ງຂັນກະຕໍ້ປະເພດທີມຄູ່ຊາຍ ລາຍການໂຄ້ງໜອງບົວຄັບ 2020 ທີ່ສະໜາມກີລາດັ່ງກ່າວ ໂຮງຮຽນປະຖົມຈອມແຈ້ງ ເມືອງທ່າແຂກ ເພື່ອເປັນການສົ່ງເສີມການພັດທະນາກີລາກະຕໍ້ຂອງແຂວງ ໄດ້ມີໂອກາດທົດສອບຄວາມສາມາດຂອງຕົນ ກັບບັນດານັກກີລາຈາກແຂວງໃກ້ຄຽງ ແລະ ນະຄອນຫຼວງວຽງຈັນ ເພື່ອກ້າວສູ່ການເປັນນັກກີລາລະດັບຊາດ ກໍຄື ຕິດທີມຊາດໃນອະນາຄົດ ອີກດ້ານໜຶ່ງຍັງເປັນການເປີດໂອກາດໃຫ້ນັກກີລາພາຍໃນແຂວງ ໄດ້ຫຼິ້ນກີລາເພື່ອຫ່າງໄກຈາກສິ່ງເສບຕິດອີກດ້ວຍ ເຊິ່ງລາຍການນີ້ໄດ້ມີການກຳນົດເງື່ອນໄຂນັກກີລາ ສຳລັບນັກກີລາທີມຊາດຊຸດໃຫຍ່ ສາມາດຈັບຄູ່ກັບນັກກີລາທີມຊາດຍິງ ແຕ່ຫ້າມຈັບຄູ່ກັບນັກກີລາຮ່ວມງານກີລາແຫ່ງຊາດທຸກສະໄໝຕ່າງຊາດ ສ່ວນນັກກີລາທົ່ວໄປສາມາດເຂົ້າຮ່ວມແບບບໍ່ມີກຳນົດ.
ລາຍການນີ້ມີ 27 ພາກສ່ວນ ເຂົ້າຮ່ວມແຂ່ງຂັນ ໃນນັ້ນ ມີທີມເດິຟ໋ອກ 1 ທີມ ຈາກແຂວງຈຳປາສັກ 3 ທີມ ຈາກນະຄອນຫຼວງວຽງຈັນ ປະກອບມີທີມຊ້າງບິນ ແລະ ທີມຮ້ານອາຫານທູແມນ 1 ແລະ ທູແມນ 2 ແລະ 4 ທີມຈາກແຂວງສະຫວັນນະເຂດ ປະກອບມີ ທີມຍາງຄຳ 1 ຍາງຄຳ 2 ສາຍລຳເຊ 1 ແລະ ສາຍລຳເຊ 2 ສ່ວນເຈົ້າຖິ່ນ ມີ 19 ພາກສ່ວນອ້ອມຂ້າງເທສະບານ ເມືອງທ່າແຂກ ສົ່ງເຂົ້າຮ່ວມແຂ່ງຂັນ.
ຜ່ານການແຂ່ງຂັນຜົນປາກົດວ່າ: ນັດຊີງຊະນະເລີດ ທີມຊ້າງບິນ ປະກອບມີ ທ້າວ ກັນຕະນາ ນານທິເສນ ຈັບຄູ່ກັບນາງ ນໍຄຳ ວົງໄຊ ສອງນັກກີລາກະຕໍ້ໜຸ່ມສາວທີມຊາດລາວ ຊ່ວຍກັນສາມາດໄລ່ເອົາຊະນະທີມເຈົ້າຖິ່ນ ທີມໃຈອາລູມີນຽມ ຈາກເມືອງທ່າແຂກ ໄປແບບສະບາຍ 2-0 ເຊັດ 21-14 ແລະ 21-15 ຄະແນນ ຄວ້າແຊັມລາຍການໄປຄອງ ສ່ວນອັນດັບທີ 3 ຕົກ ເປັນທີມເດິຟ໋ອກ ຈາກແຂວງຈຳປາສັກ ແລະ ອັນດັບທີ 4 ທີມຮ້ານອາຫານທູແມນ ຈາກນະຄອນຫຼວງວຽງຈັນ.