ປັດຈຸບັນ ມີໄວໜຸ່ມຈຳນວນ ໜຶ່ງ ທີ່ໄດ້ຕົກເປັນເຫຍື່ອຂອງຢາເສບຕິດ ເຊິ່ງອາດເປັນຍ້ອນຄວາມຢາກຮູ້ຢາກລອງ ແລະ ຄວາມຮູ້ເທົ່າບໍ່ເຖິງການເຖິງຜົນຮ້າຍ ແລະ ໄພອັນຕະລາຍຂອງຢາເສບຕິດ ຈຶ່ງໄດ້ລວມກັນເປັນກຸ່ມແກງມົ້ວສຸມຢາເສບຕິດ ຈຶ່ງກໍ່ໃຫ້ເກີດປາກົດການຫຍໍ້ທໍ້ຕ່າງໆຕາມມາ ເພື່ອສ້າງຄວາມເຂົ້າໃຈກັບກຸ່ມໄວໜຸ່ມດັ່ງກ່າວ ເຈົ້າໜ້າທີ່ເມືອງໄຊທານີ ຈຶ່ງໄດ້ນຳເອົາກຸ່ມໄວ້ໜຸ່ມທີ່ມົ້ວສຸມຢາເສບຕິດ ແລະ ຫຼີ້ນແກມອອນລາຍມາສຶກສາອົບຮົມ ເພື່ອໃຫ້ເຂົ້າໃຈເຖິງຜົນຮ້າຍ ແລະ ໄພອັນຕະລາຍຂອງຢາເສບຕິດແລ້ວຢຸດເຊົາເສບ ຫັນມາກະທຳຄຸນປະໂຫຍດຕໍ່ຕົນເອງ ແລະ ສັງຄົມ.
ທ່ານ ພັທ ບຸນມີ ແກ້ວພົມມາ ຫົວໜ້າພະແນກຕຳຫຼວດ ກອງບັນຊາການ ປກສ ເມືອງໄຊທານີ ໃຫ້ຮູ້ວ່າ: ຕໍ່ກັບກຸ່ມມົ້ວສຸມຢາເສບຕິດ ຫຼີ້ນເກມອອນລາຍ (ອິນເຕີເນັດ) ທີ່ນຳມາສືກສາອົບຮົມນີ້ ແມ່ນສືບເນື່ອງມາຈາກ ເວລາ 17:00 ໂມງ ຂອງວັນທີ 19 ມິຖຸນາ 2020 ເຈົ້າໜ້າທີ່ ປກສ ເມືອງໄຊທານີ ໄດ້ລົງກວດກາບັນດາຮ້ານອາຫານ ຮ້ານກິນດື່ມ ທີ່ມີການມົ້ວສຸມສິ່ງທີ່ຜິດກົດໝາຍ ໄດ້ພົບເຫັນຮ້ານອິນເຕີເນັດຮ້ານໜຶ່ງທີ່ມີການມົ້ວສຸມຢາເສບຕິດ ຫຼີ້ນເກມອອນລາຍ ເຊິ່ງເປັນຮ້ານຂອງນາງ ອາຫຼິງ ອາຍຸ 20 ປີ ຢູ່ບ້ານສົມສະໄໝ ເມືອງໄຊທານີ ນະຄອນຫຼວງວຽງຈັນ ຕັ້ງຢູ່ບ້ານດອນໜູນ ເມືອງໄຊທານີ ນະຄອນຫຼວງວຽງຈັນ.
ຜ່ານການກວດກາພົບເຫັນ ຢາບ້າ ຈຳນວນ 11 ເມັດ ເຄື່ອງຕື່ມເຊີເກມ ຈຳນວນ 1 ຊຸດ ລົດຈັກ 29 ຄັນ ລົດໃຫຍ່ 1 ຄັນ ມີຜູ້ມົ້ວສຸມຢາເສບຕິດ ຫຼີ້ນເກມອອນລາຍ ຈຳນວນ 38 ຄົນ ຍິງ 1 ຄົນ ແລະ ເຈົ້າຂອງຮ້ານ 3 ຄົນ ຍິງ 2 ຄົນ ມາຮອດວັນທີ 23 ມິຖຸນາ 2020 ຈິ່ງໄດ້ນຳຜູ້ມົ້ວສຸມຢາເສບຕິດ ມົ້ວສຸມຫຼີ້ນເກມອອນລາຍ ມາສຶກສາອົບຮົມ ເພື່ອໃຫ້ເຂົ້າໃຈເຖິງຜົນຮ້າຍ ແລະ ໄພອັນຕະລາຍຂອງການມົ້ວສຸມດັ່ງກ່າວ ຕໍ່ກັບເຈົ້າຂອງຮ້ານ ແມ່ນໄດ້ມອບໃຫ້ໜ່ວຍງານສະເພາະກິດຂອງເມືອງໄຊທານີ ເປັນຜູ້ແກ້ໄຂ.
ໃນການສືກສາອົບຮົມ ຮອ ບົວລຳ ດວງປັນຍາ ຮອງຫົວໜ້າໜ່ວຍງານສະກັດກັ້ນ ແລະ ປາບປາມຢາເສບຕິດ ໄດ້ບັນລະຍາຍເຖິງຜົນຮ້າຍ ແລະ ໄພອັນຕະລາຍຂອງຢາເສບຕິດ ໃຫ້ຜູ້ທີ່ເຂົ້າຮ່ວມ ໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ ເຖິງຜົນຮ້າຍ ແລະ ໄພອັນຕະລາຍຂອງຢາເສບຕິດອີກດ້ວຍ ເພື່ອເຮັດໃຫ້ກຸ່ມໄວໜຸ່ມຈຳນວນນີ້ ປັບປ່ຽນພຶດຕິກຳດັ່ງກ່າວ ແລ້ວຫັນມາເຮັດສິ່ງທີ່ເກີດປະໂຫຍດທີ່ດີຕໍ່ຕົນເອງ ຕໍ່ພໍ່ແມ່ ຕໍ່ຄອບຄົວ ແລະ ຕໍ່ສັງຄົມລາວ.