ສຳລັບສະຖານະການໂລກລະບາດຢ່າງເຊື້ອໂຄໂຣນາໄວຣັສໃນປັດຈຸບັນນັ້ນ ຍັງບໍ່ຜ່ອນຄາຍພໍເທົ່າໃດ ເພາະຫຼາຍໆຄົນອາດຍັງຕ້ອງກັກຕົວຢູ່ເຮືອນ ເພື່ອປ້ອງກັນຕົວເອງຈາກການຕິດໂລກໂຄວິດ-19 (COVID-19) ຈຶ່ງເຮັດໃຫ້ມີຫຼາຍຄົນເລີ່ມສົງໄສວ່າ ການທີ່ຢູ່ເຮືອນ ແລະ ເປິດເຄື່ອງປັບອາກາດນັ້ນ ຈະປອດໄພຈາກເຊື້ອໄວຣັສໄດ້ຈິງຫຼືບໍ່ ດັ່ງນັ້ນ ທາງແພດຈຶ່ງໄດ້ນຳເລື່ອງເຄື່ອງປັບອາກາດກັບໂລກໂຄວິດ-19 ມາຝາກກັນ.
ເຄື່ອງປັບອາກາດກັບໂລກໂຄວິດ-19 ກ່ຽວຂ້ອງກັນຢ່າງໃດ ?
ດ້ວຍອັດຕາການຕິດເຊື້ອທີ່ຍັງສູງຫຼາຍໃນຫຼາຍໆປະເທດ ເຮັດໃຫ້ຫຼາຍຄົນກຳລັງກັງວົນເຖິງວິທີການ ແຜ່ກະຈາຍຂອງເຊື້ອໄວຣັສໂຄໂຣນາ (Coronavirus) ລະຫວ່າງຄົນ ການຕິດເຊື້ອໃນອາກາດ ແລະ ວິທີທີ່ຈະສາມາດຮັບເຊື້ອໂລກໂຄວິດ-19 ຈາກຄົນອື່ນໆ ເຊິ່ງຄຳຖາມສ່ວນໃຫຍ່ເລີ່ມຈະຖືກຖາມກ່ຽວກັບເຄື່ອງປັບອາກາດວ່າ ເຄື່ອງປັບອາກາດຈະສາມາດແຜ່ກະຈາຍເຊື້ອໂຄໂຣນາໄວຣັສໄດ້ຫຼືບໍ່ ເຊິ່ງໃນຕອນນີ້ ຍັງບໍ່ໄດ້ມີບົດສະຫຼຸບຄວາມເປັນຈິງທີ່ແນ່ນອນ.
ຈາກການສຶກສາຂອງຜູ້ຊ່ຽວຊານ ລະບຸວ່າ ການໃຊ້ເຄື່ອງປັບອາກາດໃນເຮືອນນັ້ນບໍ່ມີຄວາມສ່ຽງຕໍ່ການຕິດເຊື້ອໂຄວິດ-19 ໂດຍສະເພາະຢ່າງຍິ່ງ ເມື່ອຕ້ອງຢູ່ຄົນດຽວໃນເຮືອນ ໂດຍທີ່ບໍ່ໄດ້ມີການສຳຜັດກັບຄວາມສ່ຽງຈາກພາຍນອກເຮືອນ ແຕ່ເຊື້ອໂຄໂຣນາໄວຣັສນັ້ນ ກໍຍັງສາມາດແຜ່ກະຈາຍໄດ້ໃນພື້ນທີ່ທີ່ຕິດຕັ້ງເຄື່ອງປັບອາກາດສ່ວນກາງ ເຊັ່ນ ໃນພື້ນທີ່ສາທາລະນະຢ່າງຮ້ານສັບພະສິນຄ້າ ແລະ ອາພາດເມນບາງແຫ່ງ ຍິ່ງຖ້າສະຖານທີ່ເຫຼົ່ານັ້ນມີຜູ້ຕິດເຊື້ອລວມຢູ່ນຳ ກໍຈະຍິ່ງເພີ່ມຄວາມສ່ຽງໃນການຕິດເຊື້ອໄດ້.
ສິ່ງທີ່ຄວນຮູ້ກ່ຽວກັບເຄື່ອງປັບອາກາດ ແລະ ໂລກໂຄວິດ-19
ເຖິງແມ່ນຈະຍັງບໍ່ມີຄຳຕອບທີ່ຊັດເຈນວ່າ ເຄື່ອງປັບອາກາດນັ້ນສາມາດແຜ່ກະຈາຍເຊື້ອໂຄວິດ-19 ໄດ້ ຫຼື ບໍ່ ແຕ່ກໍຍັງມີຄວາມຈິງກ່ຽວກັບເຄື່ອງປັບອາກາດທີ່ຄວນຮູ້ໄວ້ ດັ່ງນີ້:
ການກັ່ນຕອງ ແລະ ຂະໜາດຂອງອະນຸພາກ
ປົກກະຕິແລ້ວ ເຄື່ອງປັບອາກາດຈະມີອະນຸພາກຜ່ານລະບົບຕ່າງໆ ແລະ ຈະມີຄວາມສາມາດໃນການກັ່ນຕອງອະນຸພາກໃນລະດັບທີ່ຕ່າງກັນ ເຊັ່ນ ເຄື່ອງປັບອາກາດໃນເຮືອສຳລານ ໂດຍທົ່ວໄປ ຈະບໍ່ສາມາດກັ່ນຕອງອະນຸພາກທີ່ມີຂະໜາດນ້ອຍກວ່າ 5.000 ນາໂນແມັດໄດ້ ເຊິ່ງໄວຣັສທີ່ກ່ຽວກັບລະບົບທາງເດີນຫາຍໃຈທີ່ຄ້າຍຄືກັບເຊື້ອໂຄໂຣນາໄວຣັສ ເຊັ່ນ ໂລກຊາຣ໌ສ (SARS) ຈະມີຂະໜາດປະມານ 120 ນາໂນແມັດເທົ່ານັ້ນ ດັ່ງນັ້ນ ຖ້າເຊື້ອໄວຣັສໂຄວິດ-19 ມີຂະໜາດໃກ້ຄຽງກັນນັ້ນໝາຍຄວາມວ່າ ມັນຈະສາມາດແຜ່ກະຈາຍໄປຢັງຫ້ອງໂດຍສານຕ່າງໆຂອງເຮືອສຳລານໄດ້ ໂດຍທີ່ບໍ່ຖືກກັ່ນຕອງອອກໄປ.
ການໝູນວຽນຂອງອາກາດ
ຕົວຢ່າງ ສົມມຸດເມື່ອເວົ້າເຖິງອາກາດທີ່ຢູ່ໃນເຮືອສຳລານ ທາງຜູ້ຊ່ຽວຊານໄດ້ກ່າວເອົາໄວ້ວ່າ ອາກາດທີ່ໃຊ້ໃນລະບົບເຄື່ອງປັບອາກາດນັ້ນ ເປັນອາກາດຣີໄຊເຄິລ ເຊິ່ງຈະເປັນການດູດອາກາດເກົ່າໄປປະສົມກັບອາກາດໃໝ່ທີ່ມາຈາກດ້ານນອກ ແຕ່ທາງທີ່ດີເຄື່ອງປັບອາກາດຂະໜາດໃຫຍ່ ຄວນຈະຕ້ອງມີລະບົບເຕີມອາກາດໃໝ່ເຂົ້າໄປ ໂດຍເປັນການດູດອາກາດໃໝ່ຈາກພາຍນອກທັງໝົດ ເພື່ອຫຼຸດຄວາມສ່ຽງຕໍ່ການຕິດ ເຊື້ອໂຄໂຣນາໄວຣັສ ນັ້ນເອງ.
ລະດັບຄວາມຊຸ່ມ ແລະ ອຸນຫະພູມ
ໃນຫ້ອງທີ່ມີການເປີດໃຊ້ເຄື່ອງປັບອາກາດ ຈະມີລະດັບຄວາມຊຸ່ມ ແລະ ອຸນຫະພູມທີ່ຕ່ຳ ເຮັດໃຫ້ໂລກລະບົບທາງເດີນຫາຍໃຈ ເຊັ່ນ ໂລກຊາຣ໌ສ (SARS) ຍັງສາມາດມີຊີວິດຢູ່ລອດໄດ້.
ດັ່ງນັ້ນ ການເບິ່ງທີ່ລະບົບປັບອາກາດ ແລະ ລະບົບລະບາຍອາກາດຂອງເຄື່ອງປັບອາກາດ ຈຶ່ງຖືເປັນເລື່ອງທີ່ສຳຄັນ ເພື່ອເປັນການຫຼຸດຄວາມສ່ຽງຂອງການສຳຜັດກັບເຊື້ອໄວຣັສໂຄວິດ-19 ແລະ ເຊື້ອໂລກອື່ນໆໄດ້ ນອກຈາກນັ້ນ ການກວດສອບ ແລະ ສັງເກດຕົວກັ່ນຕອງ ຫຼືໃຫ້ຄວາມສຳຄັນເລື່ອງຄວາມຊຸ່ມຊື່ນ ທີ່ມາຈາກການຕັ້ງຄ່າອຸນຫະພູມ ກໍຖືເປັນອີກເລື່ອງທີ່ຄວນໃສ່ໃຈ ທັງນີ້ກໍເພື່ອສຸຂະພາບຂອງຕົວທ່ານເອງ.
ຊາວບ້ານ – ນຳສະເໜີ