ທີ່ກຳປູເຈຍ: ຂ່າວຈາກກຳປູເຈຍ ເມື່ອ 2 ປີກ່ອນໜ້ານີ້ ໄດ້ເວົ້າກ່ຽວກັບຜົນສຳເລັດໃນສະໜາມຮົບຕ້ານການຄ້າມະນຸດ ສາມາດເຮັດໃຫ້ອາຊະຍາກຳດັ່ງກ່າວ ຫຼຸດລົງຕາມລຳດັບ ຕົວຢ່າງ: ຄະດີການຄ້າມະນຸດ ແຕ່ເດືອນມັງກອນ-ຕຸລາ ປີ 2017 ນັ້ນ ມີຈຳນວນ 129 ກໍລະນີ ແລະ ໄດ້ຫຼຸດລົງສູ່ຕົວເລກ 109 ກໍລະນີ ໃນໄລຍະດຽວກັນຂອງປີ 2018 ໃນນັ້ນ 75 ກໍລະນີ ແມ່ນການຄ້າມະນຸດ ເພື່ອເປົ້າໝາຍຂູດຮີດທາງເພດ ໃນປີ 2017 ບັ້ນກວາດລ້າງ ໂດຍເຈົ້າໜ້າທີ່ຕຳຫຼວດ ສາມາດຊ່ວຍເຫຼືອຜູ້ທີ່ຕົກເປັນເຫຍື່ອທີ່ມີອາຍຸຕ່ຳກວ່າ 15 ປີ ຈຳນວນ 253 ຄົນ ສ່ວນໃນປີ 2018 ນັ້ນ ມີຈຳນວນ 189 ຄົນ ແນວໃດກໍດີ ຂ່າວບອກວ່າ ເຖິງວ່າຈຳນວນຄະດີ ແລະ ຈຳນວນເຫຍື່ອຂອງການຄ້າມະນຸດໄດ້ຫຼຸດລົງໃນປີ 2018 ທຽບກັບປີ 2017 ກໍຕາມ ແຕ່ຈຳນວນຜູ້ກະທຳຜິດທີ່ພົວພັນກັບອາຊະຍາກຳການຄ້າມະນຸດຜັດເພີ່ມຂຶ້ນເປັນ 185 ຄົນ ທຽບກັບ 158 ຄົນ ໃນປີ 2017 ສ່ວນກະຊວງການຕ່າງປະເທດກຳປູເຈຍນັ້ນ ກໍສາມາດປະສານງານກັນກັບທາງການຂອງມາເລເຊຍ ຈີນ ຫວຽດນາມ ໄທ ສິງກະໂປ ອາຣາບີຊາອຸດິດ ແລະ ອິນໂດເນເຊຍ ເພື່ອຈັດສົ່ງຄົນກຳປູເຈຍ ທີ່ຕົກເປັນເຫຍື່ອການຄ້າມະນຸດຈຳນວນ 434 ຄົນ ໃນປະເທດເຫຼົ່ານີ້ກັບຄືນປະເທດຢ່າງປອດໄພ ທ່ານນາງ ຊູບຸນເອັງ (Chou Bun Eng) ຮອງຫົວໜ້າກຳມາທິການແຫ່ງຊາດ ເພື່ອປາບປາມການຄ້າມະນຸດ ໄດ້ເນັ້ນຄວາມສຳຄັນຂອງມາດຕະການທາງກົດໝາຍ ໃນການຕ້ານອາຊະຍາກຳນີ້ ໃນຮູບແບບການຂູດຮີດແຮງງານ ການຂູດຮີດທາງເພດ ການຄ້າອະໄວຍະວະ ການຄ້າເດັກເກີດໃໝ່-ເດັກນ້ອຍທົ່ວໄປ ແລະ ການຖືພາມານແທນ (ອູ້ມບຸນ) ໃຫ້ຄູ່ຜົວເມຍຊາວຕ່າງປະເທດ ນອກຈາກນັ້ນ ທາງຄະນະກຳມາທິການ ຍັງຈະສືບຕໍ່ຊຸກຍູ້ໃຫ້ມີບັນທຶກຄວາມເຂົ້າໃຈກັບບັນດາປະເທດທີ່ວ່າ: ຈ້າງແຮງງານ ແລະ ຊາວປະມົງກຳປູເຈຍ
ທີ່ປະເທດໄທ: ໃນວັນທີ 29 ເດືອນຕຸລາ 2017 ລັດຖະບານໄທ ໄດ້ເປີດເຜີຍເລກໝາຍໂທລະສັບ ສຳລັບໃຊ້ແຈ້ງຂ່າວໃຫ້ທາງການໄທຊາບ ກ່ຽວກັບຄົນໄທທີ່ຕົກເປັນເຫຍື່ອຂອງການຄ້າມະນຸດຢູ່ທຸກບ່ອນໃນໂລກ ເລກໝາຍໂທລະສັບດັ່ງກ່າວແມ່ນ +66991301300 ເລກໝາຍນີ້ ຍັງສາມາດໃຊ້ສົ່ງຂໍ້ຄວາມອີກດ້ວຍ ຂ່າວບອກວ່າ ເຄືອຄ່າຍສາຍດ່ວນ ເພື່ອຊ່ວຍເຫຼືອຄົນໄທທີ່ຕົກເປັນເຫຍື່ອຂອງການຄ້າມະນຸດ ແມ່ນຜົນງານການຮ່ວມມືລະຫວ່າງກະຊວງພັດທະນາສັງຄົມ ແລະ ຄວາມໝັ້ນຄົງຂອງມະນຸດກັບຫ້ອງການກະຈາຍສຽງ ແລະ ຄົມມະນາຄົມຂອງໄທ ເລກໝາຍນີ້ໃຊ້ໂທໄດ້ໃນທົ່ວໂລກ ໂດຍບໍ່ເສຍຄ່າ ເປົ້າໝາຍຂອງການສ້າງເຄືອຄ່າຍໂທລະສັບສາຍດ່ວນນີ້ ກໍແມ່ນເພື່ອຊ່ວຍແມ່ຍິງຈາກທີ່ຖືກຫຼອກລວງໄປຄ້າປະເວນີຢູ່ຕ່າງປະເທດ.
ທີ່ ສປ ຈີນ: ຂ່າວຕ່າງປະເທດ ໃນທ້າຍເດືອນພຶດສະພາ 2019 ໃຫ້ຮູ້ວ່າ ເຈົ້າໜ້າທີ່ຕຳຫຼວດຂອງນະຄອນກຸ້ຍຫຼິນ ເຂດປົກຄອງຕົນເອງຂອງເຜົ່າຈ້ວງ ກວາງຊີ ສາມາດເລີກຮື້ກຸ່ມແກ້ງຫຼອກລວງການແຕ່ງດອງຂ້າມຊາດ ໄດ້ເປັນຜົນສຳເລັດ ໃນບັ້ນ ເລີກຮື້ນີ້ເຈົ້າໜ້າທີ່ສາມາດຈັບກຸມຜູ້ຕ້ອງສົງໄສໄດ້ 15 ຄົນ ໃນ 21 ຄະດີ ທີ່ພົວພັນກັບບັນດານະຄອນ ໃນຫຼາຍທ້ອງຖິ່ນ ເຊັ່ນ: ນະຄອນກຸ້ຍຫຼິນ ອູໂຈ ກຸຍກາງ ຢິ້ວຫຼິນ ຢຽນເສິງ ແລະ ຫຼຽວເສິງ ວົງເງິນທີ່ພົວພັນກັບຄະດີຂອງກຸ່ມແກ້ງນີ້ ມີຈຳນວນ 1.200.000 ກວ່າຢວນ ການຕິດຕາມເພື່ອທັບມ້າງກຸ່ມອາຊະຍາກຳການຄ້າມະນຸດນີ້ ຖືເປັນຄະດີພິເສດພາຍໃຕ້ການຮັບຜິດຊອບໂດຍກົງ ຂອງກະຊວງປ້ອງກັນຄວາມສະຫງົບຈີນ.