ຫຼັງຈາກພະຍາດລະບາດຂອງໂຄວິດ-19 ປາກົດມີບາງຫາງສຽງບອກວ່າ ໂລກຈະຈັດສັນໂຕມັນເອງໃຫ້ເກີດຄວາມສົມດຸນ ເຊິ່ງຜູ້ຂຽນເກີດມີຄຳຖາມໃນໃຈທັນທີວ່າ: ຜ່ານມາໂລກມີທ່າອ່ຽງສູງຂາດຄວາມສົມດຸນ ເພາະຄວາມໂລບຂອງມະນຸດເອງທີ່ແຂ່ງຂັນກັນສ້າງ ແລະ ພັດທະນາຕາມຕັນຫາຂອງຕົນເອງ ຈົນເກີດມີການກັກຕຸນຊັບພະຍາກອນໄວ້ໃນຄົນບາງກຸ່ມ ຫຼາຍກວ່າຄົນສ່ວນໃຫຍ່ຂອງສັງຄົມທີ່ຄວນຈະໄດ້ ນີ້ຄືຜົນຈາກວິທີຄິດຂອງຄົນທີ່ຂາດຄວາມເມດຕາ ເພາະເຫັນແກ່ໂຕຈົນຫຼຽວບໍ່ເຫັນມະນຸດດ້ວຍກັນ.
ພຶດຕິກຳໃໝ່ໃນອາຊີບເກົ່າທີ່ກ້າວ Bill Gross ນັກເສດຖະກິດຄົນອາເມຣິກາ ໄດ້ໃຊ້ຄຳວ່າ: New Normal ໃນປີ 2008 ທີ່ມຸ່ງໃຫ້ນິຍາມໃນພາວະເສດຖະກິດຫົດໂຕ ແລະ ຂະຫຍາຍໂຕມາຢູ່ໃນພາວະເກົ່າ ແຕ່ຄຳວ່າ New Normal ກໍຖືກນຳມາໃຊ້ຫຼາຍນິຕິເຊັ່ນ: ຫຼັງການແຜ່ລະບາດຂອງໂຄວິດ-19 ກໍຖືກນຳມາໃຊ້ອີກຄັ້ງ ເຊິ່ງມຸ່ງເນັ້ນຄວາມໝາຍທີ່ການດຳເນີນຊີວິດທີ່ຮັກສາສຸຂະພາບກັນຫຼາຍຂຶ້ນ ເພາະຫຼາຍຄົນກັບໄປບ່ອນເຮັດວຽກເກົ່າ ອາຊີບເກົ່າ ແຕ່ມາແບບໃໝ່ ທັງໃສ່ໜ້າກາກອະນາໄມ ແລະ ທຳຄວາມສະອາດສະຖານທີ່ເຮັດວຽກ ມັນສະແດງອອກເຖິງການລະວັງເຊື້ອພະຍາດທຸກຮູບແບບ ເຊິ່ງເບິ່ງມຸມໜຶ່ງກໍແມ່ນຄົນໃນສັງຄົມຕື່ນໂຕ ມີສະຕິຮັກໂຕເອງຫຼາຍຂຶ້ນ.
ພຶດຕິກຳໃໝ່ New Normal ຂອງການກັບໄປສູ່ອາຊີບເກົ່າມີ ເຊັ່ນ: ຫຼາຍບໍລິສັດເລີ່ມມີນະໂຍບາຍເຮັດວຽກ ຫຼື ປະຊຸມຜ່ານອອນລາຍ (Online) ຫຼືວ່າ Work From Home ບາງໂຮງຮຽນກໍນຳໃຊ້ແຜນຕະລາງຮຽນອອນລາຍ ໂດຍນຳໃຊ້ຜ່ານໂປຼແກມເຊັ່ນ: Google Meet Zoom ຫຼື Microsoft Team ຫຼາຍບໍລິສັດ ຫຼື ຫ້ອງການກໍຈັດກຽມເວລາລ້າງມື ນ້ຳຢາຂ້າເຊື້ອພະຍາດໄວ້ໃຫ້ຜູ້ມາຕິດຕໍ່ວຽກ ຫຼື ເຂົ້າ-ອອກວຽກໄດ້ໃຊ້ເປັນປະຈຳ ເພື່ອເພີ່ມຄວາມປອດໄພສຳລັບທຸກຝ່າຍ ເຊິ່ງໃນວຽງຈັນມີບາງຮ້ານຄ້າໄດ້ໃຊ້ມາດຕະການເດັດຂາດ ຂຽນປ້າຍຕິດໜ້າຮ້ານໂລດວ່າ ຖ້າບໍ່ໃສ່ໜ້າກາກເຂົ້າຮ້ານ ຫຼື ລ້າງມືກ່ອນກໍຈະບໍ່ອະນຸຍາດໃຫ້ເຂົ້າໄປຊື້ຂອງໃນຮ້ານໄດ້.
ສັງລວມວ່າ: ບາງປະເທດສາມາດຄຸມການແຜ່ລະບາດຂອງໂຄວິດ-19 ໄດ້ແຕ່ບາງປະເທດກັບພົບແຜ່ລະບາດໃໝ່ ແລະ ບາງປະເທດທາງຕາເວັນຕົກຍັງຮຸນແຮງຕາຍຫຼາຍຢູ່ ດັ່ງນັ້ນ ຜູ້ປົກຄອງ-ພໍ່ແມ່ຂອງນັກຮຽນ-ຄູ (ໂຮງຮຽນ) ບໍ່ຄວນຖືເບົາ ຕ້ອງຍັງມີສະຕິສູງຊ່ວຍກັນປ້ອງກັນ.