ໂຮງຮຽນມັດທະຍົມຕອນຕົ້ນສີເກີດ ໄດ້ຕັ້ງໜ້າປະຕິບັດຕາມແນວທາງຂອງພັກ-ລັດ ກໍຄື ກະຊວງສຶກສາທິການ ແລະ ກີລາວາງອອກຕາມ 3 ຂໍ້ແຂ່ງຂັນ ເນັ້ນປະຕິບັດການສອນດີ-ຮຽນເກ່ງ ສ້າງສິ່ງແວດລ້ອມທີ່ດີຕ້ານປາກົດການຫຍໍ້ທໍ້ ຕັ້ງໜ້ານຳພາສ້າງໂຮງຮຽນຕົວແບບຂຽວສະອາດ ແລະ ຄຸນນະພາບ.
ທ່ານ ຄຳແພງ ບຸນທະລາວົງ ຜູ້ອຳນວຍການໂຮງຮຽນມັດທະຍົມຕອນຕົ້ນສີເກີດ ຂຶ້ນປະກອບຄຳເຫັນ ໃນຫົວຂໍ້: ນຳພາສ້າງໂຮງຮຽນຕົວແບບຂຽວສະອາດ ແລະ ຄຸນນະພາບດີ ຕໍ່ກອງປະຊຸມໃຫຍ່ ຄັ້ງທີ VII ຂອງຄະນະພັກເມືອງນາຊາຍທອງ ໃຫ້ຮູ້ວ່າ: ໂຮງຮຽນມັດທະຍົມຕອນຕົ້ນສີເກີດ ສ້າງຂຶ້ນ 1984 ຢູ່ວັດບ້ານນາລ່ຽນ ປີ 1988 ຍ້າຍອອກມາຢູ່ບ້ານຜາງແຫ້ງ ມີເນື້ອທີ່ 6.303 ຕາແມັດ ມີອາຄານ 2 ຫຼັງ ຫຼັງໜຶ່ງເປັນຊັ້ນດຽວ ເຄິ່ງໜຶ່ງເປັນສະໂມສອນ ເຄິ່ງໜຶ່ງເປັນຫ້ອງຮຽນ ຫຼັງທີ 2 ເປັນອາຄານ 2 ຊັ້ນ ມີທັງໝົດ 24 ຫ້ອງ ນຳໃຊ້ເປັນຫ້ອງຮຽນ ຊັ້ນ ມ1-ມ4 ຈຳນວນ 18 ຫ້ອງ ຫ້ອງຄອມພິວເຕີ 1 ຫ້ອງ ຫ້ອງທົດລອງ 1 ຫ້ອງ ຫ້ອງແຕ້ມ 1 ຫ້ອງ ຫ້ອງຄະນະອຳນວຍການ 1 ຫ້ອງ ຫ້ອງພັກ ຄູ-ອາຈານ 1 ຫ້ອງ ແລະ ຫ້ອງຄົວ 1 ຫ້ອງ.
ໃນ 5 ປີຜ່ານມາ ມີນັກຮຽນທັງໝົດ 3.745 ຄົນ ຍິງ 1.992 ຄົນ ມີຄູ-ອາຈານ 34 ທ່ານ ຍິງ 21 ທ່ານ ໃນນັ້ນ ມີຄູອາສາສະໝັກ 11 ຄົນ ຍິງ 6 ຄົນ ລະດັບວິຊາສະເພາະຈົບຊັ້ນກາງ 1 ຄົນ ຍິງ 1 ຄົນ ຈົບຊັ້ນສູງ 23 ຄົນ ຍິງ 15 ຄົນ ປະລິນຍາຕີ 9 ຄົນ ຍິງ 5 ຄົນ ກຳລັງສຶກສາຕໍ່ປະລິນຍາໂທ 1 ຄົນ ຄູ-ອາຈານທັງໝົດແມ່ນໄດ້ເຂົ້າອົງການຈັດຕັ້ງຕ່າງໆ ມີຊາວໜຸ່ມ 27 ຄົນ ຍິງ 18 ຄົນ ແມ່ຍິງ 21 ຄົນ ກຳມະບານ 23 ຄົນ ຍິງ 15 ຄົນ ສະມາຊິກພັກ 15 ຄົນ ຍິງ 9 ຄົນ.
ເພື່ອປະຕິບັດຕາມແນວທາງຂອງພັກ-ລັດ ເວົ້າລວມ ເວົ້າສະເພາະ ກໍຄື ທິດທາງແຜນການຂອງກະຊວງສຶກສາທິການ ແລະ ກີລາ ວາງອອກ ຕາມ 3 ຂໍ້ແຂ່ງຂັນຂອງກະຊວງສຶກສາທິການ ແລະ ກີລາ ເຊັ່ນ: ສອນດີ-ຮຽນເກັ່ງ ຕ້ານປະກົດການຫຍໍ້ທໍ້ ສ້າງສິ່ງແວດລ້ອມທີ່ດີໃນໂຮງຮຽນ-ສູນ ສະຖາບັນການສຶກສາ ແລະ ກີລາ ຄູ-ອາຈານທຸກຄົນ ແມ່ນເອົາໃຈໃສ່ໃນການປະຕິບັດໜ້າທີ່ຂອງຕົນເອງຢ່າງເຂັ້ມງວດ ເປັນຕົ້ນແມ່ນການປະຕິບັດໂມງເວລາຂຶ້ນ ຫ້ອງສິດສອນ ມີການສ້າງແຜນການສອນໄລຍະສັ້ນ ໄລຍະຍາວ ການແຕ່ງບົດສອນ ແລະ ຜ່ານບົດສອນກ່ອນຂຶ້ນຫ້ອງສອນ ພ້ອມທັງມີການສ້າງສື່ການຮຽນ-ການສອນ ມີການນິເທດພາຍໃນແຕ່ລະສາຍປົກກະຕິ ມີການສອນບຳລຸງນັກຮຽນທີ່ຮຽນອ່ອນ ແລະ ນັກຮຽນຈົບຊັ້ນ ມ4 ຢ່າງຕໍ່ເນື່ອງ ຈຶ່ງເຮັດໃຫ້ການສອບເສັງເລື່ອນຂັ້ນ ແລະ ຈົບຊັ້ນ ໄດ້ຄະແນນສົມບູນສະເລ່ຍ 96,82% ແລະ ໄດ້ນັກຮຽນເກ່ງຂັ້ນເມືອງທຸກປີ ສົກຮຽນ 2014-2015 ໄດ້ 3 ຄົນ ຍິງ 3 ຄົນ ສົກຮຽນ 2015-2016 ໄດ້ 4 ຄົນ ຍິງ 2 ຄົນ ສົກຮຽນ 2016-2017 ໄດ້ 8 ຄົນ ຍິງ 6 ຄົນ ສົກຮຽນ 2017-2018 ໄດ້ 3 ຄົນ ຍິງ 3 ຄົນ ສົກຮຽນ 2018-2019 ໄດ້ 4 ຄົນ ຍິງ 4 ຄົນ.
ຄຽງຄູ່ກັບດ້ານວິຊາການແລ້ວ ການສ້າງສິ່ງແວດລ້ອມໃນໂຮງຮຽນໃຫ້ສະອາດ ສວຍງາມ ແລະ ໜ້າຢູ່ ນີ້ກໍ່ເປັນບັນຫາສຳຄັນເພາະມັນເປັນສິ່ງດູດດຶງ ເຮັດໃຫ້ນັກຮຽນຮັກໂຮງຮຽນ ສະຖານທີ່ໂຮງຮຽນມີໜານດອກໄມ້ລຽບກຳແພງ ໂຮງຮຽນ ໜ້າອາຄານ ແລະ ໜ້າຫ້ອງຮຽນມີຕົ້ນໄມ້ໃຫ້ຮົ່ມ ຕົ້ນໄມ້ປະດັບ ມີບ່ອນນັ່ງພັກຜ່ອນອ່ານໜັງສືຢູ່ຮົ່ມໄມ້ ມີການຈັດລະບົບນ້ຳໃຊ້ຄັກແນ່ ມີອ່າງລ້າງມື 12 ອ່າງ ລະບົບນ້ຳໃຊ້ມີ 3 ປະເພດ ຄື: ນ້ຳດື່ມ ນ້ຳປະປາ ນ້ຳບາດານ ພຽງພໍກັບຄວາມຕ້ອງການ ແລະ ຊົມໃຊ້ ມີບ່ອນແຍກຂີ້ເຫຍື້ອທີ່ຈະເປັນພິດຕໍ່ຮ່າງກາຍ ແລະ ສິ່ງແວດລ້ອມ ແມ່ນໄດ້ໃຊ້ໜ່ວຍບໍລິການຂີ້ເຫຍື້ອ ສ່ວນປະເພດຂີ້ເຫຍື້ອປຽກ ແລະ ໃບໄມ້ແມ່ນໄດ້ເຮັດເປັນຝຸ່ນໃສ່ຕົ້ນໄມ້.
ຍ້ອນຄວາມເອົາໃຈໃສ່ຂອງຄູ-ອາຈານທຸກຄົນ ກ່ອນຂຶ້ນຫ້ອງສິດສອນ ຕ້ອງເບິ່ງຄວາມສະອາດຂອງຫ້ອງຮຽນໃຫ້ເປັນລະບຽບຮຽບຮ້ອຍ ໄດ້ເຮັດໃຫ້ພໍ່ແມ່ຜູ້ປົກຄອງຂອງນັກຮຽນເອົາລູກຫຼານມາເຂົ້າໂຮງຮຽນຈຳນວນຫຼາຍ ພິເສດໃນສົກຮຽນ 2015-2016 ໂຮງຮຽນເຮົາໄດ້ຮັບໂລ່ລາງວັນ ໂຮງຮຽນຂຽວສະອາດ ແລະ ມີຄຸນນະພາບດີຂັ້ນນະຄອນຫຼວງ ປະຈຸບັນ ໂຮງຮຽນພວກເຮົາຢູ່ໃນເປົ້າໝາຍ ສ້າງໂຮງຮຽນຕົວແບບຄຸນນະພາບຂອງກະຊວງສຶກສາທິການ ແລະ ກີລາ (ລະດັບປະເທດ).
ເພື່ອເສີມຂະຫຍາຍທິດທາງແຜນການໃນຕໍ່ໜ້າ ໂຮງຮຽນຂອງພວກເຮົາຈະສູ້ຊົນປະຕິບັດຕາມມະຕິຄຳສັ່ງ ກົດລະບຽບ ກົດໝາຍ ແລະ ແຜນພັດທະນາການສຶກສາ ທີ່ກະຊວງສຶກສາທິການ ແລະ ກິລາ ວາງອອກ ມາຈັດຕັ້ງປະຕິບັດຢ່າງເຂັ້ມງວດ ມີປະສິດທິພາບ ແລະ ປະສົບຜົນສຳເລັດຕາມລະດັບຄາດໝາຍທີ່ວາງໄວ.
ຜົນງານ ແລະ ໄຊຊະນະທີ່ຍາດມາໄດ້ຂ້າງເທິງນັ້ນ ກໍຍ້ອນໄດ້ມີແນວທາງທີ່ຖືກຕ້ອງຂອງພັກ ແລະ ໄດ້ຮັບຄວາມເອົາໃຈໃສ່ຊີ້ນຳ-ນຳພາຈາກຄະນະພັກຂັ້ນເທິງ ໂດຍສະເພາະແມ່ນກະຊວງສຶກສາທິການ ແລະ ກີລາ ພະແນກສຶກສາທິການ ແລະ ກີລາ ນະຄອນຫຼວງວຽງຈັນ ອົງຄະນະພັກເມືອງ ອົງການປົກຄອງເມືອງນາຊາຍທອງ ໄດ້ເອົາໃຈໃສ່ຕໍ່ວຽກງານການສຶກສາທຸກຂັ້ນ ແລະ ຍ້ອນການປະກອບສ່ວນຂອງຄະນະພັດທະນາການສຶກສາ ຜູ້ປົກຄອງນັກຮຽນຕະຫຼອດຮອດຜູ້ປະກອບການພາຍໃນ ແລະ ພາຍນອກໄດ້ຊ່ວຍເຫຼືອ ເອື້ອອຳນວຍຄວາມສະດວກດ້ວຍດີຕະຫຼອດມາ ພິເສດ ຍ້ອນພວກເຮົາໄດ້ຮັບການປະກອບສ່ວນຊ່ວຍເຫຼືອຈາກມຸນນິທິຄົນໃຈບຸນ ເພື່ອຊ່ວຍເຫຼືອເດັກນ້ອຍປະເທດເຢຍລະມັນ.