ສີສັດຕະນາກ 1 ໃນຈຳນວນ 4 ເມືອງໃນເຂດເທສະບານຂອງນະຄອນຫຼວງວຽງຈັນ ຖືໄດ້ວ່າໃນໄລຍະ 10 ປີຜ່ານມາ ເມືອງດັ່ງກ່າວ ໄດ້ຮັບການພັດທະນາເປັນກ້າວໆ ເຊິ່ງເຫັນໄດ້ມີຫຼາຍຢ່າງ ໄດ້ຮັບການປັບປຸງເພື່ອຮອງຮັບການພັດທະນາໃນແຕ່ລະໄລຍະ ເຊິ່ງລວມໄປເຖິງເສັ້ນທາງຄົມມະນາຄົມ ທີ່ໄດ້ຮັບການພັດທະນາຢ່າງຕໍ່ເນື່ອງ ຮອງຮັບກັບຈຳນວນຍວດຍານພາຫະນະທີ່ເພີ່ມຂຶ້ນ ແນໃສ່ໃຫ້ຜູ້ໃຊ້ລົດໃຊ້ຖະໜົນມີຄວາມສະດວກສະບາຍ.
ຈາກສະພາບການພັດທະນາຂອງພື້ນຖານໂຄງລ່າງ ທາງດ້ານເສັ້ນທາງຄົມມະນາຄົມ ທີ່ສອດຄ່ອງກັບການເຕີບໃຫຍ່ຂອງເສດຖະກິດໃນແຕ່ລະໄລຍະ ເຮັດໃຫ້ຈຳນວນຍວດຍານພາຫະນະໃນຖະໜົນ ນັບມື້ມີຈຳນວນເພີ່ມຂຶ້ນເຊັ່ນກັນ ແນ່ນອນ ເມື່ອຈຳນວນພາຫະນະເພີ່ມຂຶ້ນ ສິ່ງທີ່ຕາມມາກໍຄືການເກີດອຸບັດເຫດ ເຊິ່ງໃນ 6 ເດືອນຕົ້ນປີ 2020 ມີອຸບັດເຫດເກີດຂຶ້ນທົ່ວເມືອງສີສັດຕະນາກ ເຖິງ 55 ຄັ້ງ ແລະ ເສຍຊີວິດເຖິງ 4 ຄົນ ຖືວ່າເປັນຈຳນວນບໍ່ໜ້ອຍ ຈາກສະພາບທີ່ເກີດຂຶ້ນມັນໄດ້ຮຽກຮ້ອງໃຫ້ບັນດານັກຂັບຂີ່ ກໍຄື ຜູ້ໃຊ້ລົດໃຊ້ຖະ ໜົນທຸກຄົນ ຕ້ອງໄດ້ເປັນເຈົ້າ ການໃນການປະຕິບັດລະບຽບ ການສັນຈອນ ເພື່ອເຮັດໃຫ້ອັດຕາການເກີດອຸບັດເຫດຫຼຸດລົງ.
ຕາມຂໍ້ມູນຈາກເຟສບຸກແຟນເພຈ ປ້ອງກັນຄວາມສະຫງົບ ນະຄອນຫຼວງວຽງຈັນ ເຫັນວ່າ: ສະພາບການສັນຈອນພາຍໃນເມືອງສີສັດຕະນາກ ແມ່ນມີຄວາມສັບສົນຫຼາຍ ເປັນຕົ້ນແມ່ນຊົ່ວໂມງເລັ່ງດ່ວນ (ໂມງເຂົ້າການຂອງທຸກໆວັນຈັນຫາວັນສຸກ ໃນເວລາ 7:00 ໂມງ ຫາ 9:00 ໂມງ ແລະ 16:00 ໂມງ ຫາ 18:00 ໂມງ) ເສັ້ນທາງທີ່ມີຄວາມສັບສົນ ແລະ ແອອັດຫຼາຍກວ່າໝູ່ແມ່ນເສັ້ນທາງຄູວຽງ ແລະ ຖະໜົນມະໂຫສົດ ດັ່ງນັ້ນ ທາງກອງຮ້ອຍຈະລາຈອນ ປກສ ເມືອງສີສັດຕະນາກ ຈຶ່ງໄດ້ຈັດກຳລັງລົງຕາມຈຸດ 3 ແຍກ 4 ແຍກ ແລະ ບ່ອນທີ່ມີຄວາມສັບສົນຫຼາຍ ເພື່ອຫຼຸດຜ່ອນບັນຫາອຸບັດເຫດທີ່ຈະເກີດຂຶ້ນຕາມຖະໜົນ ຜ່ານການຈັດຕັ້ງປະຕິບັດໃນໄລຍະ 6 ເດືອນຕົ້ນປີ 2020 ທົ່ວເມືອງສີສັດຕະນາກ ນະຄອນຫຼວງວຽງຈັນ ສະຫຼຸບໄດ້ມີອຸບັດເຫດເກີດຂຶ້ນທັງໝົດ 55 ຄັ້ງ ມີຄົນໄດ້ຮັບບາດເຈັບ 65 ຄົນ ບາດເຈັບເລັກນ້ອຍ 21 ຄົນ ບາດເຈັບສົມຄວນ 23 ຄົນ ບາດເຈັບສາຫັດ 17 ຄົນ ແລະ ເສຍຊີວິດ 4 ຄົນ ມີພາຫະນະເປ່ເພທັງໝົດ 110 ຄັນ ເປ່ເພເລັກໜ້ອຍ 40 ຄັນ ເປ່ເພສົມຄວນ 69 ຄັນ ໃຊ້ການບໍ່ໄດ້ 1 ຄັນ ສ່ວນເວລາທີ່ມັກເກີດອຸບັດເຫດຫຼາຍກວ່າໝູ່ແມ່ນ 18:00 ໂມງ ຫາ 24:00 ໂມງ ສຳລັບກຸ່ມຄົນທີ່ມີຄວາມສ່ຽງເກີດອຸບັດເຫດສ່ວນຫຼາຍແມ່ນຢູ່ໃນເກນອາຍຸແຕ່ 16-25 ປີ ປະເພດພາຫະນະສ່ວນຫຼາຍແມ່ນລົດໃຫຍ່ຕຳກັບລົດໃຫຍ່ ລົດຈັກຕຳກັບລົດຈັກ ສາເຫດທີ່ພາໃຫ້ເກີດອຸບັດເຫດຫຼາຍກວ່າໝູ່ແມ່ນ ດື່ມສິ່ງມຶນເມົາແລ້ວຂັບຂີ່ພາຫະນະ ລ່ວງໄຟອຳນາດ ປ່ຽນທິດທາງການສັນຈອນບໍ່ຮັບປະກັນ ເຊັ່ນ: ການລ້ຽວຊ້າຍລ້ຽວຂວາແບບກະທັນຫັນ ຂີ່ລົດໄວເກີນກຳນົດ ແລະ ບໍ່ຮັກສາໄລຍະຫ່າງລະຫວ່າງຄັນຕໍ່ຄັນ.
ສຳລັບທິດທາງແຜນການໃນຕໍ່ໜ້າ ເຈົ້າໜ້າທີ່ຕຳຫຼວດຈະລາຈອນ ປກສ ເມືອງສີສັດຕະນາກ ຈະສຸມໃສ່ປະຕິບັດໜ້າທີ່ຢ່າງເຂັ້ມງວດ ເປັນຕົ້ນແມ່ນ ເອົາໃຈໃສ່ລົງໂຄສະນາເຜີຍແຜ່ກົດລະບຽບຈະລາຈອນຕາມໂຮງຮຽນຕ່າງໆ ສຳນັກງານ ອົງການ ແລະ 3 ແຍກ 4 ແຍກ ເພື່ອໃຫ້ຜູ້ໃຊ້ລົດໃຊ້ຖະໜົນມີຄວາມເຂົ້າໃຈ ແລະ ຮູ້ໄດ້ເຖິງຜົນຮ້າຍຂອງການເກີດອຸບັດເຫດ ແລະ ຈັດວາງກຳລັງລົງລະບາຍລົດຢູ່ຕາມເສັ້ນທາງ ແລະ ຈຸດສຳຄັນຕ່າງໆ ເພື່ອອຳນວຍຄວາມສະດວກໃຫ້ຜູ້ໃຊ້ລົດ-ໃຊ້ຖະໜົນ ໃນການສັນຈອນໄປ-ມາໃຫ້ມີຄວາມສະດວກ ແລະ ປອດໄພດີຂຶ້ນກວ່າເກົ່າ.