ໃນໄລຍະຂອງການຈັດຕັ້ງປະຕິບັດມາດຕະການຜ່ອນຜັນ ເຫັນໄດ້ວ່າມີຫຼາຍໆຂະແໜງການຫຼາຍຫົວໜ່ວຍທຸລະກິດຕ່າງໆໃນຂອບເຂດທົ່ວປະເທດ ຕ່າງກໍໄດ້ກັບຄືນມາເຄືອນໄຫວວຽກງານ ດຳເນີນກິດຈະການຄືນໃໝ່ ໄປພ້ອມໆກັບການສືບຕໍ່ປະຕິບັດ ບັນດາມາດຕະການຢ່າງເຄັ່ງຄັດ ເພື່ອບໍ່ໃຫ້ມີການລະບາດຂອງ COVID-19.
ພະແນກໂຍທາທິການ-ຂົນສົ່ງ (ຍທຂ) ແຂວງບໍ່ແກ້ວ ກໍເປັນຂະແໜງການໜຶ່ງທີ່ໄດ້ເອົາໃຈໃສ່ຢ່າງຕັ້ງໜ້າ ໃນການເປັນເຈົ້າການຈັດຕັ້ງປະຕິບັດມາດຕະການຜ່ອນຜັນ ຕາມການຊີ້ນຳຂອງຂັ້ນເທິງ ເຂົ້າໃນການເຄື່ອນໄຫວວຽກງານໃນຂົງເຂດທີ່ຕົນຮັບຜິດຊອບ ໂດຍສະເພາະແມ່ນວຽກງານຂົນສົ່ງໂດຍສານ ທີ່ໄດ້ສືບຕໍ່ປະຕິບັດມາດຕະການຕ່າງໆ ຮັບປະກັນດ້ານສຸຂະພາບໃຫ້ກັບຜູ້ໂດຍສານ ກໍຄື ບໍ່ໃຫ້ມີການລະບາດຂອງພະຍາດດັ່ງກ່າວ.
ທ່ານ ວົງເພັດ ສຸຂະວົງ ຮອງຫົວໜ້າພະແນກໂຍທາທິການ ແລະ ຂົນສົ່ງ ແຂວງບໍ່ແກ້ວ ໃຫ້ສຳພາດໃນໂອກາດຄະນະນັກຂ່າວ ເດີນທາງເຄື່ອນໄຫວເກັບກຳຂໍ້ມູນກ່ຽວກັບການຈັດຕັ້ງປະຕິບັດ ມາດຕະການປ້ອງກັນ ຄວບຄຸມ ແລະ ແກ້ໄຂການລະບາດຂອງ COVID-19 ເມື່ອບໍ່ດົນຜ່ານມາວ່າ: ແຂວງບໍ່ແກ້ວ ໄດ້ເປີດໃຫ້ບໍລິການ ການຂົນສົ່ງທາງບົກໃນທ້າຍເດືອນພຶດສະພາ 2020 ຢູ່ສະຖານີໂດຍສານເພັດອາລຸນ ແລະ ສະຖານີຂົນສົ່ງໂດຍສານແກ້ວຈຳປາ ເຊິ່ງການເປີດໃຫ້ບໍລິການນັ້ນ ແມ່ນຕິດພັນກັບການເອົາໃຈໃສ່ປະຕິບັດບັນດາມາດຕະການປ້ອງ COVID-19 ໂດຍມີການຕັ້ງຈຸດວັດແທກອຸນຫະພູມໃຫ້ກັບຜູ້ໂດຍສານ ທີ່ຈະຢູ່ເຂົ້າໄປນຳໃຊ້ບໍລິການສະຖານີ ຖ້າວັດແທກອຸນຫະພູມຜູ້ໃດກາຍ 37,5 ອົງສາ ແມ່ນຈະສົ່ງໃຫ້ສູນ ພ້ອມນັ້ນ ທາງສະຖານີຍັງມີເຈວລ້າງມື ເຫຼົ້າຂ້າເຊື້ອ ສຳລັບຜູ້ທີ່ຈະເຂົ້າໃຊ້ບໍລິການໃນສະຖານີຂົນສົ່ງໂດຍສານ ເອົາໃຈໃສ່ຈັດສັນບ່ອນນັ່ງ ຫຼື ເວັ້ນໄລຍະຫ່າງກັນ 1 ແມັດ ພ້ອມນັ້ນຍັງສະໜອງອ່າງລ້າງມືດ້ວຍສະບູ ຖັງໃສ່ຂີ້ເຫຍື້ອ ແລະ ມີຝາປິດ ຢູ່ຕາມສະຖານທີ່ຂອງສະຖານີ ຫ້ອງນ້ຳ ແລະ ຈັດໃຫ້ຖືກຫຼັກອະນາໄມ ທຸກຄົນທີ່ຢູ່ໃນສະຖານີ ຫຼື ຜູ້ໂດຍສານ ຕ້ອງໃສ່ຜ້າອັດປາກ-ດັງ.
ສຳລັບໂຊເຟີ້ ແລະ ແອັດລົດ ກໍຕ້ອງປະຕິບັດຕາມມາດຕະການຢ່າງເຂັ້ມງວດ ກ່ອນຈະຂັບລົດສົ່ງຜູ້ໂດຍສານ ຕ້ອງອະນາໄມລົດ ພ້ອມທັງສີດຢາຂ້າເຊື້ອໄວ້ກ່ອນ ຈຶ່ງມາຮັບຜູ້ໂດຍສານ ສ່ວນລົດເມແຕ່ລະຄັນທີ່ສາມາດຮັບຜູ້ໂດຍສານເຕັມສ່ວນໄດ້ 45 ບ່ອນນັ່ງ ແຕ່ອະນຸຍາດໃຫ້ໄດ້ພຽງ 23 ບ່ອນນັ່ງ ສຳລັບລົດຕູ້ໂດຍສານ ກໍມີການປະຕິບັດເຊັ່ນກັນ ເຊິ່ງສາມາດຮັບຜູ້ໂດຍສານໄດ້ພຽງແຕ່ 7-8 ຄົນ ພ້ອມທັງແນະນຳໃຫ້ຜູ້ໂດຍສານໃສ່ຜ້າອັດປາກ-ດັງຕະຫຼອດເວລາ ໃນລົດຕ້ອງມີນ້ຳຢາຂ້າເຊື້ອ ຫຼື ເຈວລ້າງມື ພ້ອມດ້ວຍເຈ້ຍອະນາໄມຖົງຢາງໃສ່ຂີ້ເຫຍື້ອ ກ່ອນຖິ້ມໃສ່ຖັງ ເວລາຮອດລົດຕ້ອງເປີດປະຕູ ຫຼື ແວ່ນຂ້າງເພື່ອລະບາຍອາກາດເສຍກ່ອນ.
ທ່ານຮອງຫົວໜ້າພະແນກໂຍທາທິການ ແລະ ຂົນສົ່ງແຂວງບໍ່ແກ້ວ ກ່າວຕື່ມວ່າ: ການຈັດຕັ້ງປະຕິບັດມາດຕະການດັ່ງກ່າວ ແມ່ນໄດ້ສົ່ງຜົນກະທົບຕໍ່ລາຍຮັບຂອງຂະແໜງການຂົນສົ່ງ ນອກຈາກການເວັ້ນໄລຍະຫ່າງຂອງຜູ້ໂດຍສານ ໂດຍສະເພາະແມ່ນຈັດສັນບ່ອນນັ່ງຜູ້ໂດຍສານຫ່າງກັນ 1 ແມັດແລ້ວ ທາງພວກເຮົາຍັງໄດ້ກຳນົດຄ່າໂດຍສານຢູ່ໃນລະດັບເກົ່າ ເຊິ່ງໃນເບື້ອງຕົ້ນຜູ້ປະກອບການຫຼາຍຄົນກໍບໍ່ພໍໃຈ ແຕ່ເພື່ອເປັນການປະກອບສ່ວນປ້ອງກັນພະຍາດດັ່ງກ່າວແລ້ວ ກໍຕ້ອງໄດ້ປະຕິບັດຕາມມາດຕະການທີ່ທາງພະແນກ ຍທຂ ວາງອອກ.
ນອກນັ້ນ ຕໍ່ໜ້າພະແນກໂຍທາທິການ ແລະ ຂົນສົ່ງແຂວງບໍ່ແກ້ວ ຍັງຕ້ອງໄດ້ສືບຕໍ່ປະຕິບັດມາດຕະການຕ່າງໆຢ່າງເຂັ້ມງວດ ເພື່ອປ້ອງກັນ ຄວບຄຸມ ສະກັດກັນການ ແລະ ແກ້ໄຂການແຜ່ລະບາດຂອງ COVID-19 ບໍ່ໃຫ້ມີການລະບາດພາຍໃນແຂວງ ກໍຄື ພາຍໃນປະເທດ.