ເມື່ອຄູສັນຍາຫາກໄດ້ເຮັດສັນຍານຳກັນ ບົນພື້ນຖານທີ່ກົດໝາຍກຳນົດແລ້ວ ທັງສອງຝ່າຍ ຕ້ອງປະຕິບັດສັນຍາຕາມທີ່ໄດ້ຕົກລົງ ຫຼື ໄດ້ກຳນົດໄວ້ໃນສັນຍາຢ່າງເຂັ້ມງວດ ແຕ່ໃນຄວາມເປັນຈິງ ມີຄູ່ສັນຍາບາງຄົນບໍ່ສາມາດປະຕິບັດສັນຍາທີ່ຕົນໄດ້ຕົກລົງກັບຝ່າຍໜຶ່ງໄດ້ ໂດຍສະເພາະແມ່ນ ລູກໜີ້ ຫຼື ຜູ້ຊື້ກັບຜູ້ຂາຍ ນາຍຈ້າງ ລູກຈ້າງ ຜູ້ອອກແຮງງານກັບຜູ້ໃຊ້ແຮງງານ ເປັນຕົ້ນ ຊຶ່ງກໍເປັນການຫຼີກລ່ຽງບໍ່ໄດ້ ເພາະມັນຂຶ້ນກັບຈິດໃຈຂອງຄົນບາງຄົນ ຈາກການລະເມີດມັນກໍ່ໃຫ້ເກີດຜົນສະທ້ອນຕາມມາເຊັ່ນດຽວກັນ.
ການລະເມີດສັນຍາ ໝາຍເຖິງການບໍ່ປະຕິບັດສັນຍາທັງໝົດ ຫຼື ບາງສ່ວນ ຫຼື ການປະຕິບັດສັນຍາບໍ່ສົມເຫດສົມຜົນ ໂດຍຄູ່ສັນຍາຝ່າຍໃດຝ່າຍໜຶ່ງ ເຊັ່ນ: ການປະຕິບັດສັນຍາບໍ່ມີຄຸນນະພາບ ບໍ່ທັນກັບເວລາ ບໍ່ຖືກສະຖານທີ່ ຊຶ່ງທັງສອງຝ່າຍໄດ້ຕົກລົງກັນໄວ້ໃນສັນຍາທີ່ໄດ້ເຊັນຮ່ວມກັນນັ້ນ.
ການບໍ່ປະຕິບັດສັນຍາທັງໝົດ ແມ່ນການບໍ່ປະຕິບັດພັນທະຂອງຄູ່ສັນຍາຝ່າຍໃດຝ່າຍໜຶ່ງ ຕາມທີ່ໄດ້ຕົກລົງກັນໄວ້ໃນສັນຍາ ຫຼື ຄູ່ສັນຍາຝ່າຍໃດຝ່າຍໜຶ່ງບໍ່ມີການກະທຳໃດໆ ທີ່ເປັນການປະຕິບັດພັນທະຂອງຕົນ ຊຶ່ງສ້າງຄວາມເສຍຫາຍ ຫຼື ເຮັດໃຫ້ຄູ່ສັນຍາອີກຝ່າຍໜຶ່ງໄດ້ຮັບຄວາມອັບປະໂຫຍດ ເຊັ່ນ: ການບໍ່ມອບຊັບໃຫ້ຜູ້ຊື້ ບໍ່ໂອນກຳມະສິດ ບໍ່ຊຳລະດອກເບ້ຍ ແລະ ອື່ນໆ.
ຕົວຢ່າງ: ທ້າຍ ກ ຂາຍລົດໄຖນາ ຊຶ່ງທ້າວ ປ ໄດ້ຈ່າຍເງິນຄົບຖ້ວນແລ້ວ ຈຶ່ງໄດ້ນັດໝາຍກັນວ່າ ປະມານໜຶ່ງອາທິດ ຈະນຳເອົາລົດມາມອບໃຫ້ຜູ້ຊື້ ແຕ່ກ່ອນຈະຮອດມື້ມອບລົດ ທ້າວ ກ ໄດ້ສະເໜີລາຄາສູງກວ່າທີ່ຂາຍໃຫ້ທ້າວ ປ ໂດຍອ້າງວ່າຍ້ອນຄ່າຂົນສົ່ງແພງຫຼາຍ ທ້າວ ປ ຈຶ່ງປ່ຽນໃຈບໍ່ເອົາລົດໄຖນາຄັນດັ່ງກ່າວ ເນື່ອງຈາກວ່າໃນສັນຍາທີ່ຕົກລົງກັນເບື້ອງຕົ້ນ ບໍ່ໄດ້ເວົ້າເຖິງຄ່າຂົນສົ່ງ ໃນກໍລະນີນີ້ຖືວ່າ ທ້າວ ກ ເປັນຜູ້ລະເມີດສັນຍາ.
ການບໍ່ປະຕິບັດສັນຍາບາງສ່ວນ ແມ່ນການປະຕິບັດພັນທະຂອງຄູ່ສັນຍາຝ່າຍໃດໜຶ່ງບໍ່ຄົບຖ້ວນ ຕາມທີ່ໄດ້ກຳນົດໄວ້ໃນສັນຍາ ຫຼື ຫາເຫດຜົນຫຼີກລ້ຽງການປະຕິບັດພັນທະຕາມສັນຍາຂອງຕົນ ສ່ວນທີ່ເຫຼືອໃຫ້ສຳເລັດ ເຊັ່ນ: ການຊຳລະໜີ້ສິນພຽງແຕ່ດອກເບ້ຍ ສ່ວນຕົ້ນທຶນຍັງຄ້າງການມອບຊັບສິ່ງຂອງບໍ່ຄົບຖ້ວນ ແລະ ອື່ນໆ.
ຕົວຢ່າງ: ນາງ ສ ໄດ້ຂາຍເຂົ້າໃຫ້ນາງ ບ 50 ເປົາ ໂດຍໄດ້ຕົກລົງກັນວ່າໃຫ້ນາງ ບ ໂອນເງິນໃຫ້ໝົດກ່ອນ ຈຶ່ງຈະສົ່ງເຂົ້າສານໃຫ້ເປັນງວດ ງວດລະ 25 ເປົາ ສ່ວນງວດສຸດທ້າຍ ຈະສົ່ງໃຫ້ພາຍຫຼັງໄດ້ຮັບເງິນໝົດແລ້ວ ເມື່ອນາງ ສ ໄດ້ຮັບເງິນຄົບຖ້ວນ ແຕ່ໄດ້ສົ່ງເຂົ້າໃຫ້ນາງ ບ ແຕ່ງວດດຽວ ຄື ງວດທຳອິດ ສ່ວນອີກຈຳນວນ 25 ເປົາ ນາງ ສ ໄດ້ເອົາໄປຂາຍໃຫ້ຜູ້ອື່ນ ໂດຍບໍ່ສົ່ງໃຫ້ນາງ ບ ໃນກໍລະນີນີ້ ຖືວ່ານາງ ສ ລະເມີດສັນຍາບາງສ່ວນ ຕາມທີ່ໄດ້ຕົກລົງກັນໄວ້ໃນສັນຍາ.
ໂດຍ: ໄມ້ງັດ