ປັດຈຸບັນ ບັນຫາຂີ້ເຫຍື້ອຖືເປັນບັນຫາໜຶ່ງ ທີ່ຖືກນຳມາປຶກສາຫາລືຮ່ວມກັນໃນຫຼາຍພາກສ່ວນ ເພື່ອຊອກຫາວິທີໃນການແກ້ໄຂບັນຫານີ້ ເຊິ່ງສ່ວນໃຫຍ່ແມ່ນໄດ້ຊອກຫາວິທີແກ້ໄຂບັນຫາ ແລະ ການບໍລິຫານຈັດການກັບຂີ້ເຫຍື້ອປລາສຕິກ ເຊິ່ງເປັນຂີ້ເຫຍື້ອທີ່ຍ່ອຍສະຫຼາຍຍາກ ແຕ່ຄວາມຈິງແລ້ວປະມານ 50% ຂອງຂີ້ເຫຍື້ອແມ່ນ ເປັນຂີ້ເຫຍື້ອທີ່ຍ່ອຍສະຫຼາຍໄດ້ງ່າຍ ເປັນຂີ້ເຫຍື້ອປະເພດອິນຊີ ເຊັ່ນ: ເສດອາຫານ ເສດຜັກ ໝາກໄມ້ ທີ່ສາມາດຍ່ອຍສະຫຼາຍໄດ້ເອງ ແຕ່ກໍຕ້ອງໃຊ້ເວລາ ແລະ ຕ້ອງມີວິທີຈັດການທີ່ເໝາະສົມ ຖ້າບໍ່ເຊັ່ນນັ້ນ ຈະກາຍເປັນແຫຼ່ງລວມເຊື້ອພະຍາດ ສົ່ງກິ່ນເໝັນເກີດບັນຫາຕໍ່ສັງຄົມ ແລະ ສະພາບແວດລ້ອມ.
ຊັບພະຍາກອນອັນລ້ຳຄ່ານີ້ ຈະຖືກຖິ້ມຢູ່ບ່ອນຖິ້ມຂີ້ເຫຍື້ອ ຖ້າບໍ່ມີການຫັນປ່ຽນໃນການຈັດການທີ່ດີ ເຊີ່ງທາງອົງການ GGGI-KOICA ປະເທດລາວ ຮ່ວມກັບອົງການຄຸ້ມຄອງ ແລະ ບໍລິການຕົວເມືອງວຽງຈັນ ແລະ ຜູ້ຈັດການຂີ້ເຫຍື້ອ ຈະທົດລອງເກັບເອົາສິ່ງເສດເຫຼືອປະເພດຂີ້ເຫຍື້ອປຽກ ເສດອາຫານ ຫຼື ເສດຜັກ ໂດຍການໄຈ້ແຍກອອກຕ່າງຫາກຈາກບັນດາຫົວໜ່ວຍທຸລະກິດ ພາຍໃນເມືອງສີໂຄດຕະບອງ ເຊິ່ງໄດ້ລິເລີ່ມມາຕັ້ງແຕ່ເດືອນກໍລະກົດ 2019 ເປັນຕົ້ນໄປ ໂດຍໄດ້ຮັບການສະໜັບສະໜູນຈາກກອງທຶນອົງການ KOICA ເຊິ່ງບັນດາຜູ້ເກັບມ້ຽນຂີ້ເຫຍື້ອ ແລະ ຜູ້ຂາຍຢູ່ຕະຫຼາດ ແມ່ນບຸກຄົນສຳຄັນ ທີ່ຊ່ວຍໃຫ້ເກີດຜົນສຳເລັດດັ່ງກ່າວ ເຊິ່ງພວກເຂົາຈະສາມາດແຍກຂີ້ເຫຍື້ອເສດເຫຼືອ ແລະ ການຟື້ນຟູສິ່ງເສດເຫຼືອໃຫ້ຫຼາຍທີ່ສຸດ ເທົ່າທີ່ຈະເປັນໄປໄດ້ຢູ່ໃນນະຄອນຫຼວງວຽງຈັນ.
ໃນໄລຍະຜ່ານມາ ອົງການ GGGI-KOICA ປະເທດລາວຮ່ວມກັບຫ້ອງການຄຸ້ມຄອງ ແລະ ບໍລິການຕົວເມືອງວຽງຈັນ ແລະ ຜູ້ເກັບມ້ຽນຂີ້ເຫຍື້ອ ສາມາດເກັບ ແລະ ແຍກຂີ້ເຫຍື້ອທີ່ເປັນເສດອາຫານ ຫຼື ເສດຜັກໄດ້ຈາກຕະຫຼາດທ້ອງຖິ່ນ ຈຳນວນ 1 ໂຕນ ແລະ ນຳສົ່ງໄປໂຮງງານຜະລິດປຸຍຊີວະພາບ ເພື່ອເຮັດຝຸ່ນບົ່ມນຳໃຊ້ເຂົ້າໃນການຜະລິດກະສິກຳ.