ພິທີປະກາດແຕ່ງຕັ້ງຄະນະບໍລິຫານງານ ສະຫະພັນບານເຕະ ນະຄອນຫຼວງວຽງຈັນ (ນວ) ຊຸດໃໝ່ ຈັດຂຶ້ນວັນທີ 23 ມິຖຸນາ 2020 ຢູ່ສູນກີລາບຶງຂະຫຍອງ ລະຫວ່າງທ່ານ ວຽງສະຫວັນ ແສງຈັນ ປະທານສະຫະພັນບານເຕະ ນວ ຊຸດເກົ່າ ແລະ ທ່ານ ເດດສົງຄາມ ທຳມະວົງ ເຈົ້າເມືອງສີສັດຕະນາກ ປະທານສະຫະພັນບານເຕະ ນວ ຊຸດໃໝ່ ໂດຍມີທ່ານ ສົມພອນ ສອນດາລາ ວ່າການຫົວໜ້າພະແນກສຶກສາທິການ ແລະ ກີລາ ນວ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ທ່ານ ເດດສົງຄາມ ທຳມະວົງ ໄດ້ສະແດງຄວາມຂອບໃຈທີ່ຂັ້ນເທິງ ໄດ້ມອບໝາຍໜ້າທີ່ວຽກງານອັນສຳຄັນນີ້ໃຫ້ ແລະ ຈະສືບຕໍ່ປະຕິບັດແຜນຍຸດທະສາດ ການພັດທະນາກີລາບານເຕະ ຈາກຄະນະຊຸດເກົ່າ ທັງປັບປຸງກົນຈັກການຈັດຕັ້ງ ແລະ ບາງໜ້າວຽກທີ່ຕ້ອງເພີ່ມທະວີການນຳພາຄະນະບໍລິຫານງານສະຫະພັນບານເຕະ ນວ ຊຸດໃໝ່ ເພື່ອສົ່ງເສີມການພັດທະນາວົງການກີລາບານເຕະພາຍໃນໃຫ້ມີສີສັນ ແລະ ຟົດຟື້ນ.
ຄະນະບໍລິຫານງານສະຫະພັນບານເຕະ ນວ ຊຸດໃໝ່ ປະກອບມີທ່ານ ຄຳຫວັນ ນັນທະວົງ ເປັນປະທານທີ່ປືກສາສະຫະພັນ ທ່ານ ເດດສົງຄາມ ທຳມະວົງ ເປັນປະທານ ທ່ານ ສຸລິຍາ ແກ້ວພິລາວົງ ທ່ານ ຄຳມ່ວນ ປັນຍາສານ ທ່ານ ພອນປະເສີດ ສີລາດວງເລີດ ແລະ ທ່ານ ວຽງສະຫວັນ ແສງຈັນ ເປັນຮອງປະທານ ນອກນີ້ຍັງມີຄະນະບໍລິຫານອີກ 7 ທ່ານ.