ທ່ານ ວິໄຊ ພົມມະວົງສາ ຫົວໜ້າຄູເຝິກກະຕໍ້ແຂວງຄຳມ່ວນ ຄູເຝິກກະຕໍ້ເຍົາວະຊົນທີມຊາດລາວ ທັງເປັນຄະນະຮັບຜິດຊອບຈັດການແຂ່ງຂັນຈາກເມືອງທ່າແຂກ ແຂວງຄຳມ່ວນ ແຈ້ງໃຫ້ຊາບເມື່ອບໍ່ດົນມານີ້ວ່າ: ເພື່ອສົ່ງເສີມ-ພັດທະນາກີລາກະຕໍ້ຂອງແຂວງ ໃຫ້ມີໂອກາດທົດສອບຄວາມສາມາດກັບນັກກີລາຈາກແຂວງໃກ້ຄຽງ ແລະ ນະຄອນຫຼວງວຽງຈັນ ເພື່ອກ້າວສູ່ການເປັນນັກກີລາລະດັບຊາດ ກໍຄື ຕິດທີມຊາດ ທັງເປັນການເປີດໂອກາດໃຫ້ນັກກີລາພາຍໃນແຂວງ ໄດ້ຫຼິ້ນກີລາເພື່ອຫ່າງໄກຈາກຢາເສບຕິດ.
ວັນທີ 28 ມິຖຸນາ ທີ່ຈະມາເຖິງສະໜາມກີລາກະຕໍ້ໂຄ້ງໜອງບົວ ຈະຈັດແຂ່ງຂັນກະຕໍ້ມາລາທອນ ລາຍການ ໂຄ້ງໜອງບົວ ຄັບ 2020 ຂຶ້ນຢູ່ສະໜາມດັ່ງກ່າວ (ໂຮງຮຽນປະຖົມຈອມແຈ້ງ ເມືອງທ່າແຂກ) ໂດຍກຳນົດເງື່ອນໄຂນັກກີລາ ຄື: ນັກກີລາທີມຊາດຊຸດໃຫຍ່ ແລະ ນັກກີລາຮ່ວມງານກີລາແຫ່ງຊາດ ທຸກສະໄໝ ຕ່າງຊາດຫ້າມຈັບຄູ່ກັນລົງສະໜາມ ເພື່ອເປີດໂອກາດໃຫ້ນັກກີລາຮຸ່ນສືບທອດໄດ້ສະແດງຄວາມສາມາດ ແລະ ເກັບກ່ຽວປະສົບການຈາກການແຂ່ງຂັນລາຍການດັ່ງກ່າວ ໂດຍທີມ 1 ຈະຕ້ອງໄດ້ເສຍຄ່າສະໝັກ 100.000 ກີບ ຊີງເງິນລາງວັນລວມ 1.100.000 ກີບ ພາຍຫຼັງທີ່ໄດ້ມີການແຈ້ງການເຖິງບັນດາສະໂມສອນອ້ອມຂ້າງແຂວງ ແລະ ປະສານກັບແຂວງໃກ້ຄຽງ ປັດຈຸບັນມີ 27 ພາກສ່ວນແຈ້ງເຈດຈຳນົງເຂົ້າຮ່ວມແຂ່ງຂັນແລ້ວ ໃນນີ້ມີ 1 ທີມຈາກແຂວງຈຳປາສັກ 3 ທີມ ຈາກນະຄອນຫຼວງ 4 ທີມ ສະຫວັນນະເຂດ 19 ທີມ ຈາກຄຳມ່ວນ.