ທ່ານ ໃຈ ພົມມະທັດ ຫົວໜ້າຄູເຝິກໃຫຍ່ສະໂມສອນວຽງຈັນ ເອັຟທີ ເຊິ່ງເປັນຄູເຝິກລະດັບ C ລາຍເຊັນຂອງສະຫະພັນບານເຕະນາໆຊາດ ແຈ້ງໃຫ້ຊາບເມື່ອບໍ່ດົນມານີ້ວ່າ: ຂໍຂອບໃຈຄະນະບໍລິຫານສະໂມສອນວຽງຈັນ ເອັຟທີ ທີ່ໃຫ້ຕົນເປັນຫົວໜ້າຄູເຝິກໃຫຍ່ ເພື່ອນຳພາທີມວຽງຈັນ ເອັຟທີ ເຂົ້າແຂ່ງຂັນລາຍການ ເປບຊີ ລາວລີກ 1 ລະດູການ 2020 ທີ່ຈະເປີດສາກຂຶ້ນວັນທີ 11 ກໍລະກົດນີ້.
ພາຍຫຼັງສະພາບການຂອງພະຍາດໂຄວິດ-19 ຫຼຸດຜ່ອນລົງ ລັດຖະບານກໍໄດ້ປະກາດຜ່ອນຜັນບາງກິດຈະກຳ ປະທານສະໂມສອນວຽງຈັນ ເອັຟທີ ຈຶ່ງໄດ້ແຈ້ງການໃຫ້ຄະນະຄູເຝິກ ແລະ ນັກກີລາຂອງສະໂມສອນ ເຄື່ອນໄຫວເປັນປົກກະຕິ ພ້ອມທັງຄັດເລືອກນັກກີລາທີ່ມີພອນສະຫວັນໄດ້ 21 ຄົນສັງກັດທີມ ຫຼັງການຄັດເລືອກຈາກ 100 ກວ່າຄົນ ໃນນີ້ ມີນັກເຕະຕ່າງຊາດ 2 ຄົນ ແລະ ໄດ້ສືບຕໍ່ເຝິກຊ້ອມ ແຕ່ຕົ້ນເດືອນມິຖຸນາເປັນຕົ້ນມາ ປັດຈຸບັນມີຄວາມພ້ອມຫຼາຍກວ່າ 80% ແລະ ຈາກນີ້ຮອດມື້ແຂ່ງຂັນເຊື່ອວ່ານັກກີລາທຸກຈະເຝິກຊ້ອມ ແລະ ຟິດເຕັມຮ້ອຍ ໃນນີ້ ຄວາມຫວັງແມ່ນຈະພາທີມບໍ່ໃຫ້ຕົກຊັ້ນ ເນື່ອງຈາກນັກເຕະຊຸດນີ້ລ້ວນແຕ່ແມ່ນດາວຮຸ່ງ.
ທ່ານ ໃຈ ພົມມະທັດ ເຄີຍເປັນຄູເຝິກເຍົາວະຊົນລາວ ຮຸ່ນອາຍຸ 8 ປີ ຊຸດຄວ້າແຊັມລາຍການນາໆຊາດ ຢູ່ ສ ເກົາຫຼີ ປີ 2008 ຜູ້ຊ່ວຍຄູເຝິກ ຢູ-14 ປີ ຊີງແຊັມອາຊຽນ ຢູ່ປະເທດມຽນມາ ຜູ້ຊ່ວຍຄູເຝິກ ຢູ-16 ປີ ຊີງແຊັມອາຊຽນຢູ່ປະເທດກຳປູເຈຍ ຜູ້ຊ່ວຍຄູເຝິກສະໂມສອນກະຊວງໂຍທາທິການ ແລະ ຂົນສົ່ງ ຫຼື ຄຂປກ ໃນລາວລີກ 1 ຜູ້ຊ່ວຍສະໂມສອນການບິນລາວ ໃນລາວລີກ 1 ຄູເຝິກໃຫຍ່ ທີມ ລາວ-ທ໋ອບ ຄວ້າທີ 4 ລາຍການ ຢູລີກ ຜູ້ຊ່ວຍຄະນະຄູເຝິກ ທີມຈັນທະບູລີ ລາວລີກ 2 ຜູ້ຊ່ວຍຄູເຝິກ ວຽງຈັນ ຢູໄນເຕັດ ນອກນີ້ ຍັງເຄີຍຕິດທີມຊາດ ຮຸ່ນອາຍຸ 14 ປີ 16 ປີ ແລະ 17 ປີ ອະດິດນັກເຕະສະໂມສອນ ຄຂປກ ປັດຈຸບັນເປັນຄູເຝິກລະດັບ C ລາຍເຊັນຂອງສະຫະພັນບານເຕະນາໆຊາດ.