ສະຫາຍ ອໍາຄາ ລັດສະໝີ ເຈົ້າເມືອງແກ່ນທ້າວ ກ່າວໃນກອງປະຊຸມຄົບຄະນະບໍລິຫານງານພັກເມືອງ ຄັ້ງທີ 11 ສະໄໝທີ VII ຂອງເມືອງແກ່ນທ້າວ ແຂວງໄຊຍະບູລີ ເມື່ອບໍ່ດົນມານີ້ໃຫ້ຮູ້ວ່າ: 1 ປີຜ່ານມາ ເມືອງແກ່ນທ້າວ ສາມາດຮັກສາໄດ້ສະຖຽນລະພາບທາງດ້ານການເມືອງທີ່ໜັກແໜ້ນ ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ ການພັດທະນາເສດຖະກິດ-ສັງຄົມຂອງເມືອງ ໄດ້ສືບຕໍ່ຂະຫຍາຍຕົວໃນລະດັບ 6,84% ຕໍ່ປີ ລວມຍອດຜະລິດຕະພັນພາຍໃນບັນລຸ 1.260 ຕື້ກີບ ລາຍໄດ້ສະເລ່ຍຕໍ່ຫົວຄົນເທົ່າກັບ 29 ລ້ານກີບຕໍ່ຄົນຕໍ່ປີ ໂດຍການຜະລິດກະສິກໍາເປັນທ່າແຮງ ອັນພົ້ນເດັ່ນແມ່ນການປູກພືດເປັນສິນຄ້າສົ່ງອອກປະຕິບັດໄດ້ 500.000 ກວ່າໂຕນ ຜະລິດເຂົ້າໄດ້ 27.000 ກວ່າໂຕນ ການເກັບລາຍຮັບເຂົ້າງົບປະມານໄດ້ລື່ນຄາດໝາຍ ສາມາດດຸນດ່ຽງໃຫ້ແຂວງໄດ້ 2.000 ລ້ານກວ່າກີບ.
ລະບົບໂຄງລ່າງພື້ນຖານ ໄດ້ຮັບການປັບປຸງ ທຸກບ້ານມີເສັ້ນທາງເຂົ້າເຖິງ ສາມາດທຽວໄປ-ມາໄດ້ປົກກະຕິ ມີລະບົບໄຟຟ້າຊົມໃຊ້ກວມ 100% ໄດ້ປຸກລະດົມທຶນຈາກນັກທຸລະກິດຜູ້ປະກອບການ ແລະ ປະຊາຊົນ ຢູ່ພາຍໃນເມືອງ ກໍ່ສ້າງຍົກລະດັບທາງປູຫີນພາຍໃນບ້ານ ໄດ້ທັງໝົດ 5 ບ້ານ ມູນຄ່າ 1 ຕື້ກວ່າກີບ ດ້ານວັດທະນະທຳ-ສັງຄົມຫຼາຍດ້ານໄດ້ມີການປ່ຽນແປງ ພົ້ນເດັ່ນ ແມ່ນການຍົກລະດັບຄຸນນະພາບການຮຽນ-ການສອນ ການບໍລິການສາທາລະນະສຸກທົ່ວເຖິງ ການປົກປັກຮັກສາມູນເຊື້ອວັດທະນະທໍາອັນດີງາມ ການຄຸ້ມຄອງແຮງງານພາຍໃນ ແລະ ຕ່າງປະເທດ ເຂົ້າສູ່ລະບຽບກົດໝາຍ ແລະ ໄດ້ເອົາໃຈໃສ່ປະຕິບັດຄາດໝາຍການພັດທະນາແບບຍືນຍົງທີ່ສະພາໄດ້ຮັບຮອງ ວຽກງານກໍ່ສ້າງຮາກຖານການເມືອງ ພັດທະນາຊົນນະບົດ ແລະ ລຶບລ້າງຄວາມທຸກຍາກໄດ້ຫັນເອົາພະນັກງານຫຼັກແຫຼ່ງຂອງເມືອງລົງຊີ້ນຳຢູ່ແຕ່ລະບ້ານ ເພື່ອນຳພາປະຊາຊົນຈັດຕັ້ງປະຕິບັດທິດນໍາ 3 ສ້າງ ແກ້ໄຂຄວາມທຸກຍາກຕາມດຳລັດ 348/ລບ ໃນທົ່ວເມືອງຍັງມີຄອບຄົວບໍ່ທັນບັນລຸມາດຖານການພົ້ນທຸກ 68 ຄອບຄົວ ເທົ່າກັບ 0,8% ສ້າງໄດ້ຄອບຄົວພັດທະນາກວມ 96,26% ບ້ານພັດທະນາ 34 ບ້ານ ເທົ່າກັບ 72,34% ຂອງຈຳນວນບ້ານທັງໝົດ.
