ພະນັກງານ-ລັດຖະກອນທຸກຄົນ ຫຼື ຜູ້ທີ່ໄດ້ຮັບການມອບໝາຍ ລ້ວນແຕ່ມີຄວາມຮັບຜິດຮັບຊອບໃນພາລະກິດທີ່ຕົນເຮັດຢູ່ ທຳຢູ່ ຫາກປະຕິບັດໜ້າທີ່ດີມີຜົນງານ ແນ່ນອນກໍຕ້ອງໄດ້ຮັບການຍ້ອງຍໍສັນລະເສີນ ໄດ້ຮັບການເລື່ອນຊັ້ນ ເລື່ອນຂັ້ນ ເລື່ອນໜ້າທີ່ຕຳແໜ່ງ ຫຼື ໄດ້ຮັບການຕອບແທນດ້ວຍວິທີການອື່ນ ແຕ່ໃນທາງກົງກັນຂ້າມ ພະນັກງານ-ລັດຖະກອນ ຫຼື ຜູ້ທີ່ໄດ້ຮັບການມອບໝາຍໃຫ້ປະຕິບັດໜ້າທີ່ໆ ໄດ້ຮັບມອບໝາຍຫາກໄດ້ປະປ່ອຍໃຫ້ເກີດຄວາມເສຍຫາຍ ຖືກທຳລາຍເຮັດໃຫ້ຜົນປະໂຫຍດຂອງລັດເສຍຫາຍ ພະນັກງານ-ລັດຖະກອນຜູ້ນັ້ນ ບຸກຄົນຜູ້ນັ້ນກໍຕ້ອງໄດ້ຮັບຜິດຊອບຕໍ່ຄວາມເສຍຫາຍທີ່ຕົນເອງກໍ່ຂຶ້ນ ຫຼື ຍ້ອນຕົນເອງຂາດຄວາມຮັບຜິດຊອບ ນອກຈາກປະຕິບັດຕາມຂໍ້ກຳນົດທີ່ອົງການຂອງຕົນສັງກັດແລ້ວ ກົດໝາຍກໍໄດ້ກຳນົດໃຫ້ມີຄວາມຮັບຜິດຊອບທາງອາຍາ ຖ້າພະນັກງານ-ລັດຖະກອນ ຫຼື ບຸກຄົນທີ່ມີຄວາມຮັບຜິດຊອບຄູ້ມຄອງດູແລຊັບຂອງລັດ ຫາກມີການລະເມີດກົດໝາຍວ່າດ້ວຍ ພະນັກງານ-ລັດຖະກອນ ຕາມກົດໝາຍສະບັບດັ່ງກ່າວໄດ້ກຳນົດວ່າ ການເປັນພະນັກງານ-ລັດຖະກອນ ຈະສິ້ນສຸດລົງໃນກໍລະນີດັ່ງນີ້: 1. ລາອອກ 2. ການເສຍສັນຊາດລາວ 3. ການປະລະໜ້າທີ່ 4. ການຖືກໄລ່ອອກ 5. ການເສຍກຳລັງແຮງງານ 6. ການຮັບອຸດໜູນບຳນານ 7. ການເສຍຊີວິດ.
ສຳລັບການປະລະໜ້າທີ່ຂອງພະນັກງານ-ລັດຖະກອນນັ້ນ ປະມວນກົດໝາຍອາຍາໄດ້ກຳນົດໃຫ້ເປັນການກະທຳຜິດທາງອາຍາ ຕາມມາດຕາ 243 ຂອງປະມວນກົດໝາຍອາຍາໄດ້ກຳນົດ ກ່ຽວກັບການປະລະໜ້າທີ່ໃນການຄຸ້ມຄອງດູແລຊັບຂອງລັດ ໄວ້ດັ່ງນີ້: ບຸກຄົນຜູ້ໃດຫາກມີໜ້າທີ່ຮັບຜິດຊອບໂດຍກົງ ໃນການຄຸ້ມຄອງດູແລຊັບຂອງລັດ ແຕ່ປະລະຄວາມຮັບຜິດຊອບນັ້ນ ຊຶ່ງກໍ່ໃຫ້ເກີດຄວາມເສຍຫາຍ ຖືກທຳລາຍ ເຮັດໃຫ້ເສຍຫາຍ ຫຼື ເຮັດໃຫ້ຊັບມີຄວາມເສຍຫາຍ ຈະຖືກລົງໂທດຕັດອິດສະຫຼະພາບແຕ່ໜຶ່ງປີຫາຫ້າປີ ຫຼືດັດສ້າງໂດຍບໍ່ຕັດອິດສະຫຼະພາບ ແລະ ຈະຖືກປັບໃໝແຕ່ 5.000.000 ກີບ ຫາ 20.000.000 ກີບ.
ໃນກໍລະນີທີ່ມີຄວາມເສຍຫາຍຢ່າງຫຼວງຫຼາຍ ຈະຖືກລົງໂທດຕັດອິດສະລະພາບແຕ່ສອງປີຫາເຈັດປີ ແລະ ຈະຖືກປັບໃໝແຕ່ 10.000.000 ກີບ ຫາ 30.000.000 ກີບ ຕົວຢ່າງ ທ້າວ ເມີນ ເປັນຜູ້ຮັບຜິດຊອບສາງອຸປະກອນຂອງພະແນກການໃດໜຶ່ງ ແຕ່ຜູ້ກ່ຽວໄດ້ປະລະໜ້າທີ່ຂອງຕົນໄປຫຼີ້ນບຸນຢູ່ບ້ານແຫ່ງໜຶ່ງ ແລະ ນອນຄ້າງຄືນຢູ່ບ້ານດັ່ງກ່າວ 1 ຄືນ ພາຍຫຼັງກັບມາອຸປະກອນໃນສາງເສຍຫາຍຈຳນວນຫຼາຍຢ່າງ ດັ່ງນັ້ນ ທ້າວ ເມີນ ຕ້ອງຮັບຜິດຊອບຕໍ່ຄວາມເສຍຫາຍທີ່ເກີດຂຶ້ນ ພ້ອມທັງຮັບຜິດຊອບທາງອາຍາຕາມທີ່ໄດ້ກ່າວໄວ້ຂ້າງເທີງນີ້ ບຸກຄົນທີ່ຈະມີຄວາມຮັບຜິດຕາມມາດຕາ 243 ນີ້ບໍ່ໝາຍວ່າມີແຕ່ພະນັກງານ-ລັດຖະກອນເທົ່ານັ້ນ ແຕ່ຫາກຍັງລວມທັງບຸກຄົນທີ່ມີໜ້າທີ່ໃນການຄຸ້ມຄອງດູແລຊັບດັ່ງກ່າວ ຕາມການມອບໝາຍຂອງອົງການຈັດຕັ້ງໃດໜຶ່ງຂອງລັດ.
ໂດຍ: ໄມ້ງັດ