ຄຳວ່າ ການແຕ່ງດອງ ເພື່ອໄຖ່ບາບນີ້ ໄດ້ແກ່ແຕ່ງດອງເພື່ອປົກປິດຄວາມຜິດຂອງໃຜຜູ້ໜຶ່ງ ທີ່ບໍ່ຕ້ອງການຖືກແຮ້ວກົດໝາຍຍັກຄໍ ດັ່ງນັ້ນ ຫຼາຍປະເທດຈຶ່ງມີມາດຕະການຕົວຈິງ ໃນການແກ້ໄຂການແຕ່ງດອງລັກສະນະນີ້.
ທີ່ ລີບັງ: (ພາສາອັງກິດ ເອີ້ນວ່າ ເລບານອນ) ມີຂ່າວອອກມາໃນເດືອນສິງຫາ ປີ 2017 ທີ່ໃຫ້ຮູ້ວ່າ ລັດຖະສະພາປະເທດລີບັງ ໃນເຂດຕາເວັນອອກກາງ ໄດ້ລົງມະຕິຍົກເລີກມາດຕາໃນກົດໝາຍອາຍາທີ່ກຳນົດວ່າ “ຜູ້ຕ້ອງຫາໃນຄະດີຂົ່ມຂືນຈະໄດ້ຮັບການຍົກເວັ້ນໂທດ ຖ້າຜູ້ກ່ຽວແຕ່ງດອງກັບຜູ້ເສຍຫາຍ ຫຼື ຜູ້ຕົກເປັນເຫຍື່ອຂອງການຂົ່ມຂືນ” ຂໍ້ຄວາມທີ່ວ່ານີ້ ກຳນົດຢູ່ໃນມາດຕາ 522 ຂອງກົດໝາຍອາຍາຂອງລີບັງ ແລະ ໄດ້ຖືກຍົກເລີກ ໃນວັນທີ 16 ກັນຍາ 2017 ຕາມການຕົກລົງຂອງກອງປະຊຸມສະພາ ວ່າກັນວ່າ ມາດຕາດັ່ງກ່າວ ໄດ້ປະຕິບັດກັນມາເປັນເວລາຫຼາຍປີ ທ່າມກາງກະແສຕໍ່ຕ້ານຈາກກຸ່ມສິດທິມະນຸດ ແລະ ກຸ່ມປົກປ້ອງສິດທິຂອງແມ່ຍິງ ຂ່າວຍັງໄດ້ບອກຕື່ມວ່າ ກ່ອນໜ້ານັ້ນເລັກນ້ອຍ ຄືໃນຕົ້ນເດືອນສິງຫາ ປີດຽວກັນນີ້ ລັດຖະສະພາປະເທດຊອກດານີ ຫຼື ຈໍແດນ ໃນເຂດຕາເວັນອອກກາງເຊັ່ນກັນ ກໍໄດ້ຕົກລົງຍົກເລີກມາດຕາຂອງກົດໝາຍອາຍາ ທີ່ອະນຸຍາດໃຫ້ຜູ້ຖືກຄະດີຂົ່ມຂືນພົ້ນໂທດ ຖ້າຍອມແຕ່ງດອງກັບເຫຍື່ອ ມາດຕາທີ່ມີເນື້ອໃນແບບດຽວກັນນີ້ ກໍໄດ້ຖືກລຶບອອກຈາກກົດໝາຍອາຍາຂອງປະເທດເອຢິບ ໃນປີ 1999 ປະເທດມາຣົກ ໃນປີ 2014 ແລະ ປະເທດຕຸຍນິຊີ ໃນເດືອນກໍລະກົດ 2017 ແຕ່ກໍຍັງມີອີກຫຼາຍປະເທດໃນເຂດດັ່ງກ່າວ ທີ່ຮັກສາມາດຕາລັກສະນະດຽວກັນນີ້ໄວ້.
ທີ່ ມາເລເຊຍ: ຂ່າວໃຫຍ່ດັງໄກຈາກມາເລເຊຍ ໃນຕົ້ນເດືອນສິງຫາ ປີ 2016 ຄົງບໍ່ມີເລື່ອງໃດຟົດເດືອດເທົ່າກັບເລື່ອງຄະດີຂອງທ້າວ ອັກມັດ ຊູກຼີ ຢູສຸບ ອາຍຸ 20 ກວ່າປີ ຖືກສານຕັດສິນໃນຄະດີຂົ່ມຂືນເດັກຍິງ ອາຍຸ 14 ປີ ໃນປີ 2015 ໃຫ້ຕິດຄຸກສູງສຸດ 30 ປີ ແລະ ໂທດຖືກຂ້ຽນດ້ວຍແສ້ອີກຕື່ມ ແຕ່ແລ້ວສານຂອງລັດຊາລາວັກ ທີ່ເກາະບອກນຽວ ພັດຍົກເລີກຄະດີດັ່ງກ່າວແບບໜ້າຕາເສີຍ ໂດຍອ້າງວ່າ ຜູ້ລົງມືຂົ່ມຂືນ ໄດ້ຕົກລົງແຕ່ງດອງກັບຍິງ ຜູ້ເຄາະຮ້າຍຈາກການຂົ່ມຂືນຂອງຕົນ ມີອາຍຸ 15 ປີ ໃນປີ 2016 ນັ້ນເອງ ການຕັດສິນຂອງສານລັດຊາລາວັກ ໄດ້ກໍ່ໃຫ້ເກີດກະແສຄັດຄ້ານຂຶ້ນຢ່າງດຸເດືອດ ທ່ານນາງ ໂຣຮານີ ອັບດູນ ອາຣິມ ລັດຖະມົນຕີກະຊວງກິດຈະການແມ່ຍິງ ຄອບຄົວ ແລະ ການພັດທະນາຊຸມຊົນ ໃນເວລານັ້ນ ໄດ້ກ່າວກ່ຽວກັບບັນຫານີ້ວ່າ: “ຄະດີຂົ່ມຂືນ ກໍແມ່ນຄະດີຂົ່ມຂືນ ຜູ້ກໍ່ເຫດກໍຕ້ອງຖືກຕັດສິນລົງໂທດ ຖ້າເຂົາມີຄວາມຜິດແທ້ ຄະດີຂົ່ມຂືນບໍ່ສາມາດຕົກໄປດ້ວຍການແຕ່ງດອງ” ທ່ານລັດຖະມົນຕີ ຍັງໄດ້ບອກອີກວ່າ ຈະສະເໜີໃຫ້ສານສູງ ທົບທວນຄືນບັນຫານີ້ ນອກຈາກນັ້ນ ທາງກະຊວງຍັງຈະເຂົ້າແຊກແຊງ ເພື່ອປ້ອງກັນບໍ່ໃຫ້ມີການແຕ່ງດອງເພື່ອໄຖ່ບາບ ແບບນີ້ອີກຕໍ່ໄປໃນມາເລເຊຍ ຂ່າວໃຫ້ຮູ້ຕື່ມວ່າ ໃນປີ 2013 ຊາຍທີ່ມີຄອບຄົວແລ້ວ ແລະ ມີລູກ 4 ຄົນ ໄດ້ກໍ່ເຫດຂົ່ມຂືນເດັກຍິງ ອາຍຸ 12 ປີ ແລ້ວຕົກລົງແຕ່ງດອງກັບເຫຍື່ອຂອງຕົນ ເພື່ອບໍ່ໃຫ້ຖືກໂທດຈຳຄຸກ ສຸດທ້າຍກໍເກີດມີກະແສບໍ່ພໍໃຈກ່ຽວກັບບັນຫານີ້ ໃນປີຕໍ່ມາຊາຍຜູ້ກໍ່ເຫດຄົນນີ້ ກໍຖືກສານຕັດສິນຈຳຄຸກເປັນເວລາ 12 ປີ.