ກົມການແພດ ໂດຍສະຖາບັນພະຍາດຊວງເອິກ ໄດ້ເຕືອນການບໍລິໂພກໂຊດຽມໃນປະລິມານຫຼາຍເກີນກວ່າ 2.400 ມິນລິກຣາມ ຫຼື ຫຼາຍກວ່າ 1 ບ່ວງຊາຕໍ່ວັນ ຈະເຮັດໃຫ້ມີການເພີ່ມຂຶ້ນຂອງປະລິມານນ້ຳໃນຮ່າງກາຍ ເຮັດໃຫ້ມີຄວາມດັນເລືອດສູງຂຶ້ນ ສົ່ງຜົນໃຫ້ໝາກໄຂ່ຫຼັງ ແລະ ຫົວໃຈເຮັດວຽກໜັກ ແລະ ອາດຈະສົ່ງຜົນໃນໄລຍະຍາວ ເຮັດໃຫ້ເກີດພະຍາດຫົວໃຈ ພະຍາດຫຼອດເລືອດສະໝອງ ແລະ ພະຍາດໝາກໄຂ່ຫຼັງແຊກຊ້ອນຕາມມາ ພ້ອມແນະນຳວິທີຫຼຸດປະລິມານໂຊດຽມໃນຊີວິດປະຈຳວັນ ເພື່ອບໍ່ໃຫ້ຫົວໃຈ ແລະ ໝາກໄຂ່ຫຼັງເຮັດວຽກໜັກ.
ໂຊດຽມບໍ່ເກີນ 1 ບ່ວງຊາຕໍ່ວັນ
ໂຊດຽມ ເປັນສ່ວນປະກອບຂອງເກືອ ເຊິ່ງເກືອ 1 ກຣາມ ຈະມີໂຊດຽມປະມານ 400 ມິນລິກຣາມ ໂດຍຮ່າງກາຍມີຄວາມຕ້ອງການໂຊດຽມປະມານ 2.400 ມິນລິກຣາມຕໍ່ວັນ.
ໂຊດຽມ ພົບໄດ້ໃນອາຫານອັນໃດແດ່ ?.
– ເກືອໂຊດຽມ ຫຼືເກືອແກງ.
– ເຄື່ອງປຸງທີ່ໃຫ້ລົດຊາດເຄັມ ເຊັ່ນ ນ້ຳປາ ຊອສຖົ່ວເຫຼືອງ ຊີອິ໊ວຂາວ ຊີອິ໊ວດຳ ເຕົ້າຈ້ຽວ ຊອສໝາກເລ່ນ ແລະ ອື່ນໆ.
ອາຫານປະເພດໝັກດອງ ເຊັ່ນ ຜັກດອງ ໝາກໄມ້ດອງ ໄຂ່ເຄັມ ປາແດກ ປາເຄັມ ຊີ້ນເຄັມ ເປັນຕົ້ນ ເຂົ້າໜົມອົບ ແປ້ງນົວ ມີເກືອໂຊດຽມແອບແຝງຈຳນວນຫຼາຍ.
– ອັນຕະລາຍຈາກການບໍລິໂພກໂຊດຽມເກີນ 1 ບ່ວງຊາຕໍ່ວັນ ຫາກຮັບປະທານອາຫານທີ່ເຄັມຫຼາຍ ທີ່ມີເກືອໂຊດຽມ ຫຼືເກືອແກງຫຼາຍກວ່າ 6 ກຣາມຕໍ່ວັນ ຫຼື ຫຼາຍກວ່າ 1 ບ່ວງຊາຂຶ້ນໄປ ຈະມີໂອກາດສ່ຽງຕໍ່ການເກີດຄວາມດັນເລືອດສູງ ເຊິ່ງໃນໄລຍະຍາວມີຜົນ ເຮັດໃຫ້ກ້າມເນື້ອຫົວໃຈໜາຕົວຂຶ້ນ ມີໂອກາດເກີດພາວະຫົວໃຈລົ້ມແຫຼວ.
ພະຍາດຫຼອດເລືອດຫົວໃຈ ພະຍາດຫຼອດເລືອດສະໝອງ ແລະ ໝາກໄຂ່ຫຼັງເສື່ອມໃນແຕ່ລະວັນ ບໍ່ຄວນບໍລິໂພກໂຊດຽມເກີນຄວາມຕ້ອງການຂອງຮ່າງກາຍ ເຊິ່ງຖ້າໄດ້ຮັບຫຼາຍ ເຮັດໃຫ້ມີການອັ່ງຂອງສານນ້ຳໃນຮ່າງກາຍ ສົ່ງຜົນໃຫ້ຄວາມດັນເລືອດສູງຂຶ້ນ ເຮັດໃຫ້ຫົວໃຈເຮັດວຽກໜັກຂຶ້ນ ແລະ ຄວາມດັນໃນຫຼອດເລືອດຝອຍຂອງໜ່ວຍກັ່ນຕອງໃນໝາກໄຂ່ຫຼັງສູງຂຶ້ນ ເຮັດໃຫ້ໝາກໄຂ່ຫຼັງເຮັດວຽກໜັກຂຶ້ນ ນອກຈາກນີ້ ຍັງເຮັດໃຫ້ເກີດພາວະບວມນ້ຳເພີ່ມຂຶ້ນດ້ວຍ ດັ່ງນັ້ນ ການທີ່ຮ່າງກາຍໄດ້ຮັບໂຊດຽມໃນປະລິມານທີ່ພໍພຽງ ບໍ່ຫຼາຍບໍ່ໜ້ອຍຈົນເກີນໄປ ຈະເກີດຜົນດີຕໍ່ການເຮັດວຽກຂອງການຄວບຄຸມຄວາມດັນເລືອດ ເຮັດໃຫ້ຫຼຸດຄວາມສ່ຽງໃນການເກີດພະຍາດແຊກຊ້ອນທີ່ຈະຕາມມາ.
ວິທີຫຼຸດປະລິມານການບໍລິໂພກໂຊດຽມ
1. ຫຼີກລ່ຽງການບໍລິໂພກອາຫານລົດຊາດເຂັ້ມຂຸ້ນ ແລະ ອາຫານໝັກດອງ.
2. ຊິມອາຫານທຸກຄັ້ງກ່ອນຕື່ມເຄື່ອງປຸງ.
3. ເລືອກບໍລິໂພກອາຫານສົດ ຫຼືອາຫານທີ່ຜ່ານການແປຮູບໜ້ອຍທີ່ສຸດ.
4. ຫຼີກລ່ຽງອາຫານສຳເລັດຮູບ ແລະ ເຂົ້າໜົມທີ່ມີເຄື່ອງປຸງລົດປະລິມານຫຼາຍ.
5. ຫຼຸດຄວາມຖີ່ຂອງການບໍລິໂພກອາຫານ ທີ່ຕ້ອງມີເຄື່ອງປຸງນ້ຳແຈ່ວ ແລະ ຫຼຸດປະລິມານນ້ຳແຈ່ວທີ່ບໍລິໂພກ.
6. ທົດລອງປຸງອາຫານໂດຍໃຊ້ປະລິມານເກືອ ນ້ຳປາ ຕະຫຼອດຈົນເຄື່ອງປຸງລົດອື່ນໆພຽງເຄິ່ງໜຶ່ງ ທີ່ກຳນົດໄວ້ໃນສູດປຸງອາຫານ ຖ້າລົດຊາດບໍ່ແຊບອີຫຼີໆ ຈຶ່ງຄ່ອຍເພີ່ມປະລິມານຂອງເຄື່ອງປຸງ.
7. ຄວນປູກຝັງນິໄສໃຫ້ລູກຫຼານຮັບປະທານອາຫານລົດຈືດ ໂດຍບໍ່ຕື່ມເກືອ ຊີອິ໊ວຂາວ ນ້ຳປາ ຕະຫຼອດຈົນຊອສປຸງລົດໃນອາຫານເດັກນ້ອຍ ແລະ ເດັກອ່ອນ.
8. ຄວນບໍລິໂພກອາຫານທີ່ມີປະລິມານໂປແຕສຊຽມສູງ ເຊັ່ນ ຜັກໃບຂຽວ ແລະ ໝາກໄມ້ ຈະສາມາດຊ່ວຍຫຼຸດຄວາມດັນເລືອດໄດ້.
ພູມປັນຍາຊາວບ້ານ – ນຳສະເໜີ