ວິໄສທັດຂອງທ່ານ ລີ ຊຽນລຸງ ນາຍົກລັດຖະມົນຕີສິງກະໂປ ທີ່ປາໄສຄັ້ງທຳອິດກ່ຽວກັບທິດທາງທີ່ສິງກະໂປຈະເດີນໄປໃນອະນາຄົດ ຫຼັງຍຸກໂຄວິດ-19.
ສິງກະໂປ ເປັນອີກປະເທດໜຶ່ງທີ່ພົບບັນຫາໜັກຈາກການແຜ່ລະບາດຂອງໂຣກໂຄວິດ-19 ທີ່ຕອນທຳອິດເບິ່ງຄືວ່າຄວບຄຸມໄດ້ ແຕ່ເມື່ອກຸ່ມບ້ານໃໝ່ຈາກກຸ່ມແຮງງານຕ່າງດ້າວ ເຮັດໃຫ້ສະຖານະການໜັກໜ່ວງຫຼາຍ.
ຢ່າງໃດກໍຕາມ ການມີຜູ້ນຳທີ່ມີວິໄສທັດ ເຮັດໃຫ້ກ້າວຕໍ່ໄປຂອງສິງກະໂປຫຼັງໂຄວິດ-19 ເດີນໄປຢ່າງຊັດເຈນຍິ່ງຂຶ້ນ.
ເມື່ອວັນທີ 7 ມິຖຸນາຜ່ານມາ ນາຍົກລັດຖະມົນຕີ ລີ ຊຽນລຸງ ຂອງສິງກະໂປ ໄດ້ຖະແຫຼງຜ່ານສະຖານີໂທລະພາບ ເຊິ່ງເປັນການປາໄສຄັ້ງທຳອິດເລື່ອງອະນາຄົດຂອງສິງກະໂປ ຫຼັງຈາກໂຄວິດ-19 ທີ່ຈະມີຕາມມາອີກຫຼາຍຕອນ.
“ໄລຍະ 2-3 ປີຂ້າງໜ້າ ຈະເປັນປີທີ່ປັ່ນປ່ວນ ແລະ ຍາກລຳບາກສຳລັບເຮົາທຸກຄົນ ແຕ່ເຖິງແມ່ນຄວາມທ້າທາຍຈະເຂັ້ມຂຸ້ນພຽງໃດ ຂ້າພະເຈົ້າຢາກບອກທ່ານວ່າ ຢ່າຢ້ານ ຢ່າເສຍກຳລັງໃຈ ສິງກະໂປບໍ່ລັງເລໃນການກ້າວເດີນຕໍ່ໄປ ເຮົາເຊື່ອວ່າເຮົາຍັງຄົງມີອະນາຄົດສົດໃສໄດ້ດ້ວຍຕົວເຮົາເອງ ແລະ ຜ່ານພົ້ນວິກິດນີ້ຢ່າງດີ ແລະ ແຂງແກ່ນຍິ່ງຂຶ້ນ”.
ທ່ານນາຍົກ ລີ ຊຽນລຸງ ກ່າວຢ້ຳວ່າ ດ້ວຍຄວາມທ້າທາຍທີ່ລໍຖ້າຢູ່ຂ້າງໜ້າ ສິງກະໂປຕ້ອງຮຽນຮູ້ເລື່ອງການໃຊ້ຊີວິດກັບໂຄວິດ-19 ໃນໄລຍະຍາວ ປັບຊີວິດການເຮັດວຽກ ແລະ ການພັກຜ່ອນຢ່ອນໃຈ ເພື່ອຫຼຸດການແຜ່ລະບາດຂອງໄວຣັສ ພ້ອມໆກັບເຮັດໃຫ້ຕົນເອງປອດໄພ.
ຢ່າງໃດກໍຕາມ ໂຄວິດ-19 ບໍ່ໄດ້ເປັນພຽງແຕ່ບັນຫາສາທາລະນະສຸກ ຍັງເປັນບັນຫາຮ້າຍແຮງດ້ານເສດຖະກິດ-ສັງຄົມ ການເມືອງດ້ວຍ ເປັນສະຖານະການທີ່ບໍ່ເຄີຍເກີດຂຶ້ນມາກ່ອນເລີຍ.
ເພື່ອຮອງຮັບຜົນກະທົບການແຜ່ລະບາດ ລັດຖະບານສິງກະໂປ ໃຊ້ງົບປະມານເຖິງ 4 ຄັ້ງ ເປັນເງິນເກືອບ 1 ແສນລ້ານໂດລາສິງກະໂປ ຫຼື 20% ຂອງຜະລິດຕະພັນມວນລວມປະຊາຊາດ (GDP) ເປັນການດຶງເງິນສຳຮອງທີ່ເຫຼືອຈາກໃນອະດີດມາໃຊ້ໂດຍບໍ່ຕ້ອງກູ້ຢືມ ແຕ່ນາຍົກ ລີ ຊຽນລຸງ ເຕືອນວ່າ ການໃຊ້ຈ່າຍລະດັບນີ້ບໍ່ໄດ້ຄົງຢູ່ຕະຫຼອດໄປ.
“ທີ່ສຳຄັນໄປກວ່ານັ້ນ ຄືມາດຕະການເຫຼົ່ານີ້ບໍ່ສາມາດປົກປ້ອງສິງກະໂປ ພົ້ນຈາກການປ່ຽນແປງແບບພິກແຜ່ນດິນທີ່ເກີດຂຶ້ນກັບເສດຖະກິດໂລກໄດ້”.
ຜູ້ນຳສິງກະໂປກ່າວອີກວ່າ ການຄ້າ ແລະ ການລົງທຶນລະຫວ່າງປະເທດຈະຢຸດສະງັກລົງໄປອີກ ໂລກຈະບໍ່ກັບໄປສູ່ເສດຖະກິດ ໂລກທີ່ເປິດກວ້າງ ແລະ ເຊື່ອມຕໍ່ກັນເໝືອນເດີມໄດ້ໃນໄວໆນີ້ ການເດີນທາງຂອງຜູ້ຄົນຖືກຈຳກັດຫຼາຍຂຶ້ນ ການເດີນທາງໄປຕ່າງປະເທດມີໜ້ອຍລົງຫຼາຍ ຂະນະທີ່ການກວດສຸຂະພາບ ແລະ ກັກກັນຕົວຈະກາຍເປັນມາດຕະການ.
“ການໄປທ່ຽວບາງກອກ ຫຼືຮົງກົງດ້ວຍຖ້ຽວບິນລາຄາປະຢັດ ຈະເຮັດບໍ່ໄດ້ງ່າຍໆອີກຕໍ່ໄປ” ນາຍົກ ລີ ຊຽນລຸງ ກ່າວ ແລະ ວ່າປະເທດທັງຫຼາຍ ຍັງພະຍາຍາມເພິ່ງພາປະເທດອື່ນໃຫ້ໜ້ອຍລົງດ້ວຍ ໂດຍສະເພາະສິນຄ້າ ແລະ ບໍລິການທີ່ຈຳເປັນ ເຊິ່ງນີ້ຈະຕ້ອງນຳໄປປັບໃຊ້ຢ່າງມີຍຸດທະສາດ.
ສິງກະໂປໄດ້ປະໂຫຍດມະຫາສານຈາກເສດຖະກິດໂລກທີ່ເປີດກວ້າງ ແລະ ເຊື່ອມຕໍ່ ແຕ່ຕໍ່ໄປນີ້ ຈະຕ້ອງກຽມຕົວຮັບອະນາຄົດທີ່ແຕກຕ່າງໄປຈາກເດີມຫຼາຍ ຢ່າງໃດກໍຕາມ ເຖິງແມ່ນການຄ້າ ແລະ ການລົງທຶນອາດຫົດຕົວລົງ ສິງກະໂປຊ່ຽວຊານໃນການເຊື່ອມຕົວເອງເຂົ້າກັບໂອກາດໃໝ່ ແລະ ສ້າງງານໃໝ່ ເພາະຄວາມແຂງແກ່ນຂອງເສດຖະກິດ ແລະ ຊື່ສຽງທີ່ສະສົມມາຫຼາຍສິບປີ.
ແລະ ເຖິງແມ່ນຄວາມບໍ່ແນ່ນອນຍັງລໍຖ້າຢູ່ຂ້າງໜ້າ ນາຍົກ ລີ ຊຽນລຸງ ຢ້ຳເຖິງຂໍ້ໄດ້ປຽບຂອງປະເທດໃນຫຼາຍໆດ້ານ ແລະ ການຈັດການການແຜ່ລະບາດຂອງໂຄວິດ-19 ຢ່າງເປິດເຜີຍ ແລະ ໂປ່ງໃສ ຍິ່ງເສີມສ້າງຈຸດຢືນຂອງສິງກະໂປໃຫ້ແຂງແກ່ນຍິ່ງຂຶ້ນ.
“ໃນໂລກທີ່ເຕັມໄປດ້ວຍບັນຫາ ນັກລົງທຶນຈະໃຫ້ຄຸນຄ່າກັບຄຳຮັບຮອງຈາກລັດຖະບານວ່າຫຼິ້ນຕາມກະຕິກາ ຜູ້ຄົນທີ່ເຂົ້າໃຈວ່າອັນໃດຄືຄວາມສ່ຽງ ແລະ ລະບົບການເມືອງທີ່ມີສະເຖຍລະພາບ ຊ່ວຍໃຫ້ພາກທຸລະກິດປະຕິບັດການຕໍ່ໄປໄດ້ເຖິງແມ່ນເກີດວິກິດ”.
ສຳລັບການກຽມຕົວຮັບຄວາມບໍ່ແນ່ນອນ ສິງກະໂປມີແຜນປັບປຸງເສດຖະກິດ ລົງທຶນເຝິກອົບຮົມພະນັກງານເຮັດພາກລັດ ແລະ ພາກເອກະຊົນໃຫ້ເປັນດິຈິຕອນ ສ້າງນະວັດຕະກຳ ແລະ ຄວາມສາມາດດ້ານວິໄຈ ແລະ ພັດທະນາ.
+ໂລກະທັດ-ນຳສະເໜີ