ສະຖາບັນບຸນເກີດສຶກສາ ແລະ ບໍລິສັດ ແອວຊີ ເຊີວິດ ຕິດຕັ້ງ ແລະ ຈຳໜ່າຍຫຍ້າທຽມໃນ ສປປ ລາວ ຮ່ວມມືກັນລົງນາມເຊັນສັນຍາບົດບັນທຶກຄວາມເຂົ້າໃຈ ກ່ຽວກັບການກໍ່ສ້າງສະໜາມກີລາບານເຕະຫຍ້າທຽມແຫ່ງໃໝ່ ຂຶ້ນວັນທີ 17 ມິຖຸນາ 2020 ຢູ່ສະຖາບັນບຸນເກີດສຶກສາ ເມືອງນາຊາຍທອງ ນະຄອນຫຼວງວຽງຈັນ ລະຫວ່າງທ່ານ ບຸນເກີດ ສີສຸພັນທອງ ປະທານສະຖາບັນບຸນເກີດສຶກສາ ແລະ ທ່ານນາງ ມະນີພອນ ນົນທະໄຊ ຮອງປະທານບໍລິສັດ ແອວຊີ ເຊີວິດ ຕິດຕັ້ງ ແລະ ຈຳໜ່າຍຫຍ້າທຽມໃນ ສປປ ລາວ ມີຄະນະຜູ້ອຳນວຍການສະຖາບັນວິທະຍາໄລ ໂຮງຮຽນ ພະນັກງານ ທັງສອງພາກສ່ວນທີ່ກ່ຽວ ແລະ ພະນັກງານຄູ-ອາຈານ ຕະຫຼອດຮອດນັກກີລາ ແລະ ນັກຮຽນເຂົ້າຮ່ວມເປັນສັກຂີພິຍານ.
ທ່ານ ບຸນເກີດ ສີສຸພັນທອງ ໃຫ້ສຳພາດວ່າ: ເຫດຜົນທີ່ລົງທຶນປັບປຸງ ແລະ ກໍ່ສ້າງສະໜາມແຫ່ງນີ້ຂຶ້ນໃໝ່ ກໍຍ້ອນມີເຫດຜົນດຽວ ຫວັງຢາກຈະສົ່ງເສີມການຫຼິ້ນກີລາບານເຕະໃຫ້ນ້ອງໆເຍົາວະຊົນ ຜູ້ທີ່ມີພອນສະຫວັນ ເພື່ອກ້າວຂຶ້ນໄປຮັບໃຊ້ທີມຊາດໃນອະນາຄົດ ອີກດ້ານໜຶ່ງກໍເປັນການຈັດຕັ້ງປະຕິບັດຕາມຫຼັກມູນການສຶກສາ ຕາມແນວທາງນະໂຍບາຍຂອງກະຊວງສຶກສາທິການ ແລະ ກີລາວາງອອກ ໃຫ້ປາກົດຜົນເປັນຈິງ ສຳລັບການປັບປຸງກໍ່ສ້າງສະໜາມດັ່ງກ່າວ ແມ່ນໄດ້ເລີ່ມຕົ້ນລົງມືກໍ່ສ້າງໃນເດືອນມັງກອນຜ່ານມາ ກ່ອນທີ່ຈະມາເຊັນສັນຍາ ເພື່ອຕົກລົງໃຫ້ເປັນລາຍລັກອັກສອນ ໂດຍສະໜາມແຫ່ງນີ້ມີຂະໜາດ 60,5X84 ແມັດ ສາມາດນຳໃຊ້ເຂົ້າໃນການແຂ່ງຂັນເດີ່ນໃຫຍ່ 11 ຄົນໄດ້ ແລະ ສາມາດຈັດແບ່ງເປັນເດີ່ນນ້ອຍແຂ່ງຂັນໄດ້ 2 ເດີ່ນໄດ້.
ປະທານສະຖາບັນບຸນເກີດສຶກສາ ກ່າວຕື່ມອີກວ່າ: ຕະຫຼອດໄລຍະທີ່ຜ່ານມາ ທີ່ໄດ້ມີການກໍ່ສ້າງທີມບານເຕະສະຖາບັນບຸນເກີດສຶກສາ ແຕ່ປີ 2008 ເປັນຕົ້ນມາ ພວກເຮົາກໍໄດ້ວາງແນວທາງນະໂຍບາຍໃຫ້ແກ່ນັກກີລາ ໂດຍສະເພາະແມ່ນຜູ້ທີ່ມີພອນສະຫວັນ ພອນສະແຫວງ ບໍ່ຈຳກັດເພດ ເລີ່ມແຕ່ອາຍຸ 10 ຫາ 16 ປີ ທີ່ກຳລັງຢູ່ໃນໄວຮຽນ ໃນສາຍສາມັນສຶກສາ ໃນທົ່ວນະຄອນຫຼວງ ແລະ ຕ່າງແຂວງ ຖ້າຫາກນັກກີລາຢູ່ໃນເງື່ອນໄຂເປົ້າໝາຍ ກໍຈະໃຫ້ບຸລິມະສິດພິເສດ ເພື່ອເບົາບາງການໃຊ້ຈ່າຍຕ່າງໆ ໃຫ້ແກ່ຄອບຄົວນັກກີລາ ເຊັ່ນ: ໃຫ້ຮຽນ ແລະ ທີ່ພັກໂດຍບໍ່ເສຍຄ່າ ສ່ວນການກິນແຕ່ລະຄາບແມ່ນກຸ້ມຕົນເອງ ສ່ວນຜົນງານຕະຫຼອດໄລຍະຜ່ານມາ ກໍສາມາດສ້າງຜົນງານຄວ້າແຊັມໄດ້ເຖິງຫຼາຍລາຍການ ແລະ ເຄີຍສົ່ງທີມເຂົ້າຮ່ວມແຂ່ງຂັນບານເຕະລາວລີກ 2 ເມື່ອລະດູການ 2017 ປັດຈຸບັນກໍໄດ້ຕາງໜ້າທີມເຍົາວະຊົນ ຮຸ່ນອາຍຸ 12 ປີ ທີມມະຫາວິທະຍາໄລແຫ່ງຊາດ ສາມາດທະລຸເຂົ້າເຖິງຮອບ 4 ທີມສຸດທ້າຍ ລາຍການຊີງຂັນປະທານສະຫະພັນບານເຕະແຫ່ງຊາດ ປະຈຳປີ 2020 ເຊິ່ງຈະກັບມາແຂ່ງຂັນກັນຄືນໃໝ່ໃນວັນທີ 27 ມິຖຸນານີ້.