ທະນາຄານແຫ່ງ ສປປ ລາວ (ທຫລ) ຈັດພິທີມອບ-ຮັບໜ້າທີ່ປະທານສະພາບໍລິຫານ ທຫລ ຂຶ້ນວັນທີ 18 ມິຖຸນາ 2020 ຢູ່ ທຫລ ລະຫວ່າງທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ ປະທານສະພາບໍລິຫານ ທຫລ (ຜູ້ເກົ່າ) ແລະ ທ່ານ ສອນໄຊ ສິດພະໄຊ ຜູ້ວ່າການ ທຫລ ປະທານສະພາບໍລິຫານ ທຫລ (ຜູ້ໃໝ່) ໂດຍມີກໍາມະການສະພາບໍລິຫານ ທຫລ ຄະນະຜູ້ວ່າການ ທຫລ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ປະທານສະພາບໍລິຫານ ທຫລ ຜູ້ໃໝ່ ແລະ ກໍາມະການສະພາບໍລິຫານຊຸດໃໝ່ ປະກອບດ້ວຍບັນດາຄະນະນໍາທີ່ມາຈາກຂະແໜງການກ່ຽວຂ້ອງກັບການເຄື່ອນໄຫວຂອງທະນາຄານ ແລະ ກໍາມະການຊຸດນີ້ຍັງມາຈາກສະຖາບັນຄົ້ນຄ້ວາເສດຖະກິດແຫ່ງຊາດ ແລະ ມະຫາວິທະຍາໄລແຫ່ງຊາດ ໂດຍປະຕິບັດຕາມກົດໝາຍວ່າດ້ວຍ ທຫລ ດຳລັດຂອງນາຍົກລັດຖະມົນຕີ ວ່າດ້ວຍການແຕ່ງຕັ້ງສະພາບໍລິຫານ ທຫລ ເຊິ່ງເປັນການຈັດຕັ້ງບໍລິຫານສູງສຸດໃນການຕົກລົງ ແລະ ຮັບຮອງເອົາບັນຫາສຳຄັນຕ່າງໆທີ່ຕິດພັນກັບການເຄື່ອນໄຫວໜ້າທີ່ການເມືອງຂອງ ທຫລ ເປັນຕົ້ນແຜນເງິນຕາແຫ່ງຊາດ ເພື່ອສະເໜີລັດຖະບານພິຈາລະນາສະເໜີຕໍ່ສະພາແຫ່ງຊາດຮັບຮອງ ບົດລາຍງານການເຄື່ອນໄຫວວຽກງານປະຈຳປີ ແລະ ທິດທາງປີຕໍ່ໜ້າ ການຈັດຕັ້ງປະຕິບັດແຜນງົບປະມານລາຍຮັບ-ລາຍຈ່າຍປະຈໍາປີ ແລະ ທິດທາງປີຕໍ່ໜ້າ ເພື່ອສະເໜີນາຍົກລັດຖະມົນຕີພິຈາລະນາ ອະນຸມັດ ພ້ອມນີ້ ຍັງມີໜ້າທີ່ຮັບຮອງເອົານະໂຍບາຍ ແລະ ລະບຽບການສຳຄັນພາຍໃນຂອງ ທຫລ ຕື່ມອີກ.
ສະພາບໍລິຫານ ທຫລ ຊຸດປັດຈຸບັນ ໄດ້ເຄື່ອນໄຫວຕາມກົດໝາຍວ່າດ້ວຍ ທຫລ ແລະ ດໍາລັດແຕ່ງຕັ້ງສະພາບໍລິຫານ ທຫລ ເຊິ່ງປະກອບມີ 9 ທ່ານ ແລະ ພາຍຫຼັງໄດ້ຮັບການແຕ່ງຕັ້ງແຕ່ເດືອນຕຸລາ 2016 ສະພາບໍລິຫານ ທຫລ ໂດຍພາຍໃຕ້ການຊີ້ນຳຢ່າງໃກ້ຊິດ ແລະ ເປັນປະທານຂອງທ່ານ ສົມດີ ດວງດີ ໄດ້ເອົາໃຈໃສ່ປະຕິບັດສິດ ແລະ ໜ້າທີ່ຂອງຕົນຕາມກົດໝາຍກໍານົດໄດ້ເປັນຢ່າງດີ ໂດຍໄດ້ມີການຈັດກອງປະຊຸມເພື່ອຄົ້ນຄວ້າ ປຶກສາຫາລື ຮັບຮອງ ແລະ ຕົກລົງບັນຫາທີ່ສຳຄັນຕ່າງໆ ຕິດພັນກັບການຄຸ້ມຄອງມະຫາພາກເງິນຕາ ພ້ອມທັງຮັບຮອງນະໂຍບາຍ ແລະ ລະບຽບການພາຍໃນຂອງ ທຫລ ເພື່ອຮັບປະກັນໃຫ້ການເຄື່ອນໄຫວວຽກງານມີປະສິດທິຜົນ ແລະ ມີຜົນສຳເລັດຢ່າງບໍ່ຢຸດຢັ້ງ.
ໃນໄລຍະຜ່ານມາ ໄດ້ເອົາໃຈໃສ່ຊີ້ນໍາວຽກງານທະນາຄານຕາມກົດໝາຍ ແລະ ລະບຽບການທີ່ກຳນົດໄວ້ ຕາມມະຕິຂອງສະພາແຫ່ງຊາດ ແລະ ຕາມມະຕິກອງປະຊຸມສະພາບໍລິຫານ ທຫລ ຢ່າງເຂັ້ມງວດ ໂດຍລວມ ທຫລ ຍັງສືບຕໍ່ຮັກສາສະຖຽນລະພາບເງິນຕາແຫ່ງຊາດໄດ້ຢ່າງໝັ້ນທ່ຽງ ອັດຕາເງິນເຟີ້ຕ່ຳ ອັດຕາແລກປ່ຽນມີຄວາມສະຫງົບໂດຍພື້ນຖານ ຈຳນວນທະນາຄານ ແລະ ສະຖາບັນການເງິນທີ່ບໍ່ແມ່ນທະນາຄານ ມີການຂະຫຍາຍຕົວດ້ານປະລິມານ ແລະ ຄຸນນະພາບ ຮັກສາໄດ້ສະຖຽນລະພາບທາງການເງິນ ແລະ ຄຸ້ມຄອງການເຄື່ອນໄຫວຕາມລະບຽບກົດໝາຍ ການບໍລິຫານ ແລະ ການບໍລິການຂອງລະບົບ ທະນາຄານໄດ້ຫັນໄປສູ່ຄວາມທັນສະໄໝ ແລະ ມີຫຼາຍຜະລິດຕະພັນຮັບໃຊ້ສັງຄົມ ການເຄື່ອນໄຫວຂອງຕະຫຼາດຫຼັກຊັບມີຜົນສຳເລັດເປັນຢ່າງດີ ແລະ ການຮ່ວມມືກັບສາກົນກໍໄດ້ຮັບການເສີມຂະຫຍາຍຢ່າງຕັ້ງໜ້າ.
# ຂ່າວ & ພາບ: ສະບາໄພ