ປັດຈຸບັນ ກ້າວເຂົ້າສູ່ລະດູຝົນແຕ່ລະບ້ານທົ່ວນະຄອນຫຼວງວຽງຈັນ ໄດ້ພ້ອມກັນເອົາໃຈໃສ່ເພີ່ມທະວີການເຝົ້າລະວັງພະຍາດຕາມລະດູການ ໂດຍສະເພາະພະຍາດໄຂ້ຍຸງລາຍ ເຊິ່ງບ້ານຮ່ອງແກ ເມືອງໄຊເຊດຖາ ນະຄອນຫຼວງວຽງຈັນ ເປັນບ້ານໜຶ່ງທີ່ໄດ້ເອົາໃຈໃສ່ແນະນຳ ເນັ້ນໜັກໃຫ້ປະຊາຊົນພາຍໃນບ້ານຮັກສາຄວາມສະອາດ ປະຕິບັດຫຼັກການ 5ປ ທີ່ກະຊວງສາທາລະນະສຸກວາງອອກ ພ້ອມທັງຊຸກຍູ້ສົ່ງເສີມໃຫ້ເຂົາເຈົ້າລ້ຽງປາຫາງນົກຍູງ ເພື່ອກິນໜອນນ້ຳຍຸງລາຍ.
ທ່ານ ສິງສຸພົມ ໂຄດປັນຍາ ນາຍບ້ານຮ່ອງແກ ໃຫ້ສຳພາດວັນທີ 18 ມິຖຸນາ 2020 ທີ່ຫ້ອງການປົກຄອງບ້ານຮ່ອງແກວ່າ: ບ້ານຮ່ອງແກມີ 624 ຫຼັງຄາເຮືອນ 428 ຄອບຄົວ ແບ່ງອອກເປັນ 40 ໜ່ວຍ ມີພົນລະເມືອງທັງໝົດ 2.340 ຄົນ ຍິງ 1.241 ຄົນ ເຊິ່ງປະຊາຊົນພາຍໃນບ້ານໄດ້ຊົມໃຊ້ນ້ຳປະປາ ດື່ມນ້ຳສະອາດ ແລະ ມີວິດຖ່າຍຖາວອນ ພ້ອມນັ້ນ ອຳນາດການປົກຄອງບ້ານ ແລະ ອາສາສະໜັກບ້ານ (ອສບ) 17 ທ່ານ ຍິງ 12 ທ່ານ ໄດ້ເພີ່ມທະວີການເຝົ້າລະວັງພະຍາດໄຂ້ຍຸງລາຍເປັນປົກກະຕິ ນັບແຕ່ປີ 2019 ເປັນຕົ້ນມາຮອດປັດຈຸບັນ ບ້ານຮ່ອງແກ ຍັງບໍ່ທັນມີຜູ້ຕິດເຊື້ອພະຍາດໄຂ້ຍຸງລາຍ ແຕ່ອຳນາດການປົກຄອງບ້ານ ແລະ ອສບ ບໍ່ໄດ້ຫຼຸດລະໃນການເອົາໃຈໃສ່ໃນການເຝົ້າລະວັງພະຍາດດັ່ງກ່າວ ໂດຍໄດ້ມີການແບ່ງທີມລົງໄປສຳຫຼວດ ພ້ອມທັງແນະນຳໃຫ້ແຕ່ລະຄົວເຮືອນ ເອົາໃຈໃສ່ຮັກສາຄວາມສະອາດ ເປັນຕົ້ນ ປັດກວາດ ຕັດຫຍ້າທີ່ຮົກເຮື້ອ ຂວ້ຳກະໂປະກະປ໋ອງບໍ່ໃຫ້ນ້ຳອັ່ງຂັງ ກວດກາພາຊະນະຖາດຮອງຕີນຕູ້ພາຍໃນເຮືອນໃຫ້ສະໝ່ຳສະເໜີ ໜັ່ນປ່ຽນນ້ຳຕະຫຼອດເວລາ ແລະ ອະນາໄມບໍລິເວນຮົ້ວດ້ານໃນ ແລະ ດ້ານນອກຂອງເດີ່ນເຮືອນໃຫ້ມີຄວາມສະອາດ ໄປຄຽງຄູ່ກັນນັ້ນ ໄດ້ແນະນຳໃຫ້ແຕ່ລະຄົວເຮືອນລ້ຽງປາຫາງນົກຍູງໃສ່ອ່າງ ເຊິ່ງທົ່ວບ້ານມີອ່າງປາຫາງນົກຍູງທັງໝົດ 368 ອ່າງ ໃນນີ້ ຢູ່ຫ້ອງການປົກຄອງບ້ານມີ 5 ອ່າງ ໂດຍໄດ້ເປັນທະນາຄານປາຫາງນົກຍູງ ໃຫ້ກັບພໍ່ແມ່ປະຊາຊົນພາຍໃນບ້ານໄດ້ເອົາໄປລ້ຽງ ນອກນັ້ນ ຍັງມີຄອບຄົວແບບຢ່າງສາທາລະນະສຸກຂັ້ນຕົ້ນ 416 ຄອບຄົວ.
