ພິທີເຊັນສັນຍາ ໂຄງການຄຸ້ມຄອງປົກປັກຮັກສາມໍລະດົກວັດທະນະທຳ ແລະ ການສ້າງຄວາມດຶງດູດໃຫ້ແກ່ວຽກງານທ່ອງທ່ຽວຢູ່ແຂວງຈຳປາສັກ ແລະ ແຂວງສະຫວັນນະເຂດ (CHAMPA) ມູນຄ່າ 2.640.000 ເອີໂຣ ຫຼື ປະມານ 26,9 ຕື້ກີບ ຈັດຂຶ້ນວັນທີ 17 ມິຖຸນາ 2020 ຢູ່ກະຊວງແຜນການ ແລະ ການລົງທຶນ(ຜທ) ຮ່ວມລົງນາມລະຫວ່າງ ທ່ານ ກິແກ້ວ ຈັນທະບູຣີ ຮອງລັດຖະມົນຕີກະຊວງ ຜທ ແລະ ທ່ານ ມາເຈີໂບມີເຢ ຜູ້ອຳນວຍການອົງການຝຣັ່ງ ເພື່ອການພັດທະນາ ປະຈຳລາວ (AFD) ມີຕາງໜ້າຈາກສະຖານທູດຝຣັ່ງ ປະຈຳລາວ ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ອຳນາດການປົກຄອງແຂວງຈຳປາສັກ ແຂວງສະຫວັນນະເຂດ ແລະ ພະນັກງານທີ່ກ່ຽວຂ້ອງເຂົ້າຮ່ວມ.
ທ່ານ ກິແກ້ວ ຈັນທະບູຣີ ກ່າວວ່າ: ອົງການ AFD ເປັນຄູ່ຮ່ວມພັດທະນາທີ່ມີສາຍພົວພັນອັນຍາວນານກັບລັດຖະບານລາວ ເຊິ່ງໃຫ້ການສະໜັບສະໜູນຫຼາຍກວ່າ 150 ລ້ານເອີໂຣ ຫຼື ປະມານ 1.519 ຕື້ກີບ ນັບແຕ່ປີ 1994 ເປັນຕົ້ນມາ ໂຄງການ CHAMPA ເປັນອີກໜຶ່ງໂຄງການໃນຂອບການຮ່ວມມືສອງຝ່າຍທີ່ສະແດງໃຫ້ເຫັນບົດບາດອັນສຳຄັນຂອງອົງການ AFD ກໍຄື ລັດຖະບານຝຣັ່ງ ໃນການປະກອບສ່ວນເຂົ້າໃນວຽກງານພັດທະນາເສດຖະກິດ?ສັງຄົມຂອງລາວ ໂດຍສະເພາະ ໃນຂົງເຂດວຽກງານອະນຸຮັກວັດທະນະທຳ ແລະ ມໍລະດົກ.
ວັດພູຈຳປາສັກ ໄດ້ຮັບການຂຶ້ນທະບຽນຈາກອົງການອຸຍເນັສໂກ ໃຫ້ເປັນມໍລະດົກໂລກ ປີ 2001 ເປັນມໍລະດົກທີ່ມີຄວາມສຳຄັນຫຼາຍຢ່າງ ບໍ່ວ່າຈະເປັນມໍລະດົກທາງດ້ານູບຮານຄະດີ ມໍລະດົກທາງດ້ານສະຖາປັດຕະຍະກຳ ມໍລະດົກທາງດ້ານນາມມະທຳ ແລະ ມໍລະດົກທຳມະຊາດ ບັນດາປັດໄຈດັ່ງກ່າວປະກອບເປັນທ່າແຮງທີ່ສຳຄັນຕໍ່ວຽກງານທ່ອງທ່ຽວ ແຕ່ເຫັນວ່າຍັງບໍ່ທັນເປັນທີ່ຮັບຮູ້ ຫຼື ຍັງບໍ່ໄດ້ຮັບການສົ່ງເສີມ ແລະ ເຜີຍແຜ່ຢ່າງພໍພຽງໃຫ້ແກ່ນັກທ່ອງທ່ຽວພາຍໃນ ແລະ ຕ່າງປະເທດ ນັກທ່ອງທ່ຽວສ່ວນຫຼາຍທີ່ເຂົ້າມາຢ້ຽມຢາມເຂດມໍລະດົກ ໂດຍສະເພາະ ຢູ່ເມືອງຈຳປາສັກບໍ່ໄດ້ພັກຄ້າງຄືນຢູ່ທີ່ນັ້ນ ເຮັດໃຫ້ປະຊາຊົນຢູ່ທ້ອງຖິ່ນບໍ່ໄດ້ຮັບຜົນປະໂຫຍດ ຈາກທ່າແຮງການທ່ອງທ່ຽວດັ່ງກ່າວ ອີກດ້ານໜຶ່ງແຂວງສະຫວັນນະເຂດ ທີ່ມີປະຊາກອນຫຼາຍທີ່ສຸດໃນລາວ ເຖິງຈະມີທ່າແຮງດ້ານທ່ອງທ່ຽວຫຼາຍດ້ານແຕ່ປັດຈຸບັນ ວຽກງານການທ່ອງທ່ຽວກໍບໍ່ຄ່ອຍຄຶກຄື້ນເທົ່າທີ່ຄວນ ອີງໃສ່ທ່າແຮງທີ່ມີຢ່າງຫຼວງຫຼາຍບໍ່ວ່າຈະເປັນທີ່ຕັ້ງດ້ານຍຸດທະສາດ ໂດຍສະເພາະ ທາງດ້ານປະຫວັດສາດ ກໍຄື ທາງດ້ານວັດທະນະທຳທີ່ອຸດົມສົມບູນຮັ່ງມີ ລວມໄປເຖິງຊັບສົມບັດໃນສະໄໝຣາຊະອານາຈັກສີໂຄດຕະບອງ ທີ່ໄດ້ຮັບການຄົ້ນຄວ້າໃນໄລຍະທີ່ຜ່ານມາ ອົງການ AFD ແລະ ກະຊວງ ຖວທ ຈຶ່ງໄດ້ຮ່ວມກັນດຳເນີນການເກັບກຳຂໍ້ມູນ ແລະ ວ່າຈ້າງຊ່ຽວຊານເຮັດບົດວິພາກໂຄງການຮ່ວມມືໃນການປົກປັກຮັກສາ ແລະ ສົ່ງເສີມຄຸນຄ່າມໍລະດົກເພື່ອພັດທະນາໃຫ້ເປັນທ່າແຮງການທ່ອງທ່ຽວ ແລະ ການຮຽນຮູ້ ໂຄງການນີ້ ມີມູນຄ່າທັງໝົດ 6 ລ້ານເອີໂຣ ຫຼື ປະມານ 60,7 ຕື້ກີບ ແລະ ມີຊື່ໂຄງການວ່າ: ໂຄງການ CHAMPA ເຊິ່ງການຈັດຕັ້ງໂຄງການຈະມີອຳນາດການປົກຄອງຝ່າຍລາວທັງສອງແຂວງ ແລະ ສະຖາບັນຝຣັ່ງພາກພື້ນຕາເວັນອອກ ຫຼື EFEO ເປັນຜູ້ຈັດຕັ້ງປະຕິບັດຮ່ວມກັນ.
ພາຍໃຕ້ໂຄງການຈະມີການສ້າງແຜນພັດທະນາວຽກງານທ່ອງທ່ຽວ ການພັດທະນາແຫຼ່ງທ່ອງທ່ຽວຕ່າງໆ ໃຫ້ມີຄວາມຫຼາກຫຼາຍ ແລະ ສາມາດດຶງດູດນັກທ່ອງທ່ຽວຫຼາຍຂຶ້ນໃຫ້ນັກທ່ອງທ່ຽວພັກເຊົາ ແລະ ທ່ອງທ່ຽວໃນເຂດດັ່ງກ່າວໃຫ້ຫຼາຍຂຶ້ນ ເຊິ່ງເປັນການກະຕຸກຊຸກຍູ້ການພັດທະນາ ແລະ ສ້າງເສດຖະກິດທ້ອງຖິ່ນ ໂດຍສະເພາະ ການສ້າງວຽກເຮັດງານທຳໃຫ້ປະຊາຊົນໃນທ້ອງຖິ່ນນັ້ນຫຼາຍຂຶ້ນ ກ້າວໄປສູ່ການມີລາຍຮັບເພີ່ມຂຶ້ນເຊັ່ນດຽວກັນໃນອະນາຄົດ.