ພິທີປະກາດແຕ່ງຕັ້ງຄະນະບໍລິຫານງານ ສະຫະພັນໝາກເສິກນະຄອນຫຼວງວຽງຈັນ (ນວ) ຊຸດ ໃໝ່ ຈັດຂຶ້ນວັນທີ 25 ກຸມພາ 2020 ຢູ່ຫ້ອງການພະແນກສຶກສາທິການ ແລະ ກີລາ ນວ ບ້ານບຶງຂະຫຍອງ ເມືອງສີສັດຕະນາກ ມີທ່ານ ສົມພອນ ສອນດາລາ ຮອງຫົວໜ້າພະແນກສຶກສາທິການ ແລະ ກີລາ ນວ ທ່ານ ກອງແກ້ວ ແຫ່ງດາວົງໄຊ ຫົວໜ້າຂະແໜງກີລາລະດັບສູງ ແລະ ທ່ານ ຄຳພັນ ພັນທຸລັກ ຫົວໜ້າສ່ວຍສາອາກອນ ນວ ທັງເປັນປະທານສະຫະພັນໝາກເສິກ ນວ ຊຸດໃໝ່ ພ້ອມດ້ວຍຄະນະບໍລິຫານງານສະຫະພັນ ແລະ ພະນັກງານທີ່ກ່ຽວຂ້ອງເຂົ້າຮ່ວມ.
ໂອກາດນີ້ ທ່ານ ຄຳພັນ ພັນທຸລັກ ກ່າວວ່າ: ຮູ້ສຶກເປັນກຽດຢ່າງສູງທີ່ໄດ້ໜ້າທີ່ທີ່ມີກຽດອັນສະຫງ່າຄັ້ງນີ້ ເພື່ອເຮັດໃຫ້ຄວາມໄວ້ເນື້ອເຊື່ອໃຈຂອງທ່ານເຈົ້າຄອງ ນວ ເພື່ອສ້າງຜົນສຳເລັດໃນງານມະຫະກຳກີລາແຫ່ງຊາດ ຄັ້ງທີ XI ຫຼື ຊຽງຂວາງເກມ ພວກເຮົາຄະນະບໍລິຫານງານຊຸດໃໝ່ ຈະພະຍາຍາມສູ້ຊົນຢ່າງສຸດຄວາມສາມາດ ເພື່ອນຳພາຄູເຝິກ ແລະ ນັກກີລາເຂົ້າຮ່ວມສ້າງຜົນງານຮັກສາມູນເຊື້ອໃຫ້ໄດ້ 5 ຫຼຽນຄຳ ເພື່ອຮັບປະກັນໃຫ້ໄດ້ຄືແນວນັ້ນ ສະຫະພັນໄດ້ມີການປຸກລະດົມຂົນຂວາຍຈາການຊ່ວຍເຫຼືອ ບັນດາພາກສ່ວນບໍລິສັດຫ້າງຮ້ານຈຳນວນໜຶ່ງ ເພື່ອມາເປັນນະໂຍບາຍພິເສດຊຸກຍູ້ນັກກີລາ ພ້ອມທັງຈັດເຝິກອົບຮົມສ້າງຄວາມຮູ້ຄວາມສາມາດໃຫ້ນັກກີລາ 8 ຄົນ ຍິງ 4 ຄົນ ສາມາດພັດທະນາຕົນເອງຢ່າງມີຄວາມເຂັ້ມແຂງ ແລະ ຄວາມພ້ອມຮອບດ້ານ ນອກນັ້ນໄດ້ມີການລົງຕິດຕາມຢ້ຽມຢາມຢ່າງໃກ້ສິດ ເພື່ອເປັນກຳລັງໃຈໃຫ້ນັກກີລາໃນເວລາເກັບໂຕເຝິກຊ້ອມ.
ສຳລັບນັກກີລາໝາກເສິກ ນວ ຊຸດນີ້ລ້ວນແຕ່ເປັນນັກກີລາຊຸດເກົ່າທີ່ເຄີຍສ້າງຜົນງານຍາດໄດ້ 5 ຫຼຽນຄຳ 3 ຫຼຽນເງິນ ແລະ 2 ຫຼຽນທອງ ໃຫ້ທີມນັກກີລາ ນວ ໃນອຸດົມໄຊເກມ ປີ 2014 ທຸກຄົນເກັບຕົວເຝິກຊ້ອມຢູ່ທີ່ໂຮງຮຽນມັດທະຍົມສຶກສາສົມບູນອານຸວົງ ເລີ່ມເຝິກແອບມາແຕ່ເດືອນພະຈິກ 2019 ໂດຍເຝິກຊ້ອມສະເພາະແຕ່ຕອນແລງ ເນື່ອງຈາກນັກກີລາສ່ວນໃຫຍ່ເປັນພະນັກງານ ແລະ ນັກຮຽນ-ນັກສຶກສາ ເລີ່ມເວລາ 17:30-20:30 ໂມງ.
ການແຂ່ງຂັນກີລາໝາກເສິກໃນງານມະຫະກຳກີລາແຫ່ງຊາດ ຄັ້ງທີ XI ທີ່ແຂວງຊຽງຂວາງ ເປັນເຈົ້າ ພາບຈະດຳເນີນການແຂ່ງຂັນວັນທີ 23-27 ມີນາ 2020 ທີ່ສະໂມສອນພະແນກກະສິກກຳ ແລະ ປ່າໄມ້ແຂວງຊຽງຂວາງ ມີການຊີງໄຊທັງໝົດ 9 ຫຼຽນຄຳ 9 ຫຼຽນເງິນ ແລະ 9 ຫຼຽນທອງ ໃນ 9 ລາຍການຄື: ປະເພດຊາຍ 4 ລາຍການ ປະເພດຍິງ 4 ລາຍການ ແລະ ຄູ່ປະສົມ 1 ລາຍການ.