ແຂວງບໍລິຄຳໄຊ ມີຄວາມພ້ອມເຕັມຮ້ອຍ ໃນການເຂົ້າຮ່ວມງານມະຫະກຳກີລາແຫ່ງຊາດ ຄັ້ງທີ XI ຫຼື ຊຽງຂວາງ ເກມ ທີ່ແຂວງຊຽງຂວາງເປັນເຈົ້າພາບ ໃນລະຫວ່າງວັນທີ 22 ມີນາ ຫາ ວັນທີ 1 ເມສາ 2020 ໂດຍຈະສົ່ງຄະນະນຳ ຄູເຝິກ ແລະ ນັກກີລາ ເຂົ້າຮ່ວມ 170 ກວ່າຄົນ ໃນ 7 ປະເພດກີລາຄື: ແລ່ນ-ລານ ເຮືອຊ່ວງ ໝາກເສິກ ເປຕັງ ເທຄວັນໂດ ກ໊ອຟ ມວຍລາວ.
ທ່ານ ຄຳມອນ ອ້ວນວິໄລ ຫົວໜ້າຂະແໜງກີລາລະດັບສູງ ພະແນກສຶກສາທິການ ແລະ ກີລາ ແຂວງບໍລິຄຳໄຊ ໃຫ້ຮູ້ວ່າ: ນັກກີລາທັງ 7 ປະເພດແມ່ນເລີ່ມເຂົ້າສູນເກັບໂຕເຝິກຊ້ອມ ໃນວັນທີ 17 ເດືອນກຸມພາ 2020 ເປັນຕົ້ນມາ ເຫັນໄດ້ວ່ານັກກີລາຂອງພວກເຮົາແມ່ນມີຄວາມກະຕືລືລົ້ນ ແລະ ເອົາໃຈໃສ່ມຸ້ງໝັ້ນໃນການເຝິກຊ້ອມຢ່າງຫ້າວຫັນ ເຊິ່ງພວກເຮົາຕັ້ງເປົ້າຄວ້າຫຼຽນຄຳໃນງານກີລາແຫ່ງຊາດຄັ້ງນີ້ ແມ່ນໃຫ້ໄດ້ 5 ຫຼຽນຄຳຂຶ້ນໄປ.
ສຳລັບກີລາປາຍແຫຼມທີ່ຫວັງຫຼຽນຄຳແມ່ນກີລາ ແລ່ນ-ລານ ເຮືອຊ່ວງ ແລະ ໝາກເສິກ ການສົ່ງກີລາຈຳນວນບໍ່ຫຼາຍໃນຄັ້ງນີ້ ແມ່ນອີງໃສ່ທ່າແຮງ ແລະ ສະພາບເງື່ອນໄຂ ດ້ານງົບປະມານຍັງມີຄວາມຈຳກັດ ແຕ່ຈະພະຍາຍາມສູ້ຊົນໃຫ້ບັນລຸເປົ້າໝາຍ ເຊິ່ງນັກກີລາຈຳນວນນີ້ ແມ່ນຄັດເລືອກເອົານັກກີລາຢູ່ພາຍໃນແຂວງເປັນຫຼັກ ແລະ ລູກຫຼານຂອງແຂວງທີ່ກຳລັງສຶກສາຢູ່ນະຄອນຫຼວງຈຳນວນໜຶ່ງ.
ສຳລັບຜົນງານກີລາແຫ່ງຊາດ ຄັ້ງທີ X ຢູ່ແຂວງອຸດົມໄຊ ປີ 2014 ຂອງແຂວງບໍລິຄຳໄຊ ຍາດໄດ້ 17 ຫຼຽນຄຳ 9 ຫຼຽນເງິນ ແລະ 17 ຫຼຽນທອງ ລວມ 43 ຫຼຽນ ໄດ້ອັນດັບທີ 7 ຈາກ 25 ພາກ ສ່ວນເຂົ້າຮ່ວມ.