ວິທະຍາໄລລາວ-ອາເມຣິກາ ເປີດການຮຽນ-ການສອນຄືນໃໝ່ ພ້ອມວາງມາດຕະການໃນການປ້ອງກັນ ການຕິດເຊື້ອໂຄວິດ-19 ຢ່າງເຄັ່ງຄັດ ແລະ ຮັບປະກັນມີຫ້ອງຮຽນ ແລະ ຄູອາຈານ ພຽງພໍ ເພື່ອຮັກສາໄລຍະຫ່າງ ແນໃສ່ສະກັດກັ້ນ ແລະ ຕ້ານພະຍາດດັ່ງກ່າວ ບໍ່ໃຫ້ກັບຄືນມາແຜ່ລະບາດອີກເປັນຄັ້ງທີສອງ.
ທ່ານ ວົງສາທິດ ສຸວໍລະວົງ ຜູ້ອຳນວຍການ ວິທະຍາໄລລາວ-ອາເມຣິກາ ໄດ້ລາຍງານໃຫ້ຮູ້ວ່າ: ໃນໄລຍະການເປີດການຮຽນ-ການສອນຄືນໃໝ່ ເຖິງແມ່ນວ່າສະພາບການແຜ່ລະບາດຂອງພະຍາດໂຄວິດ-19 ຢູ່ ສປປ ລາວ ຈະຜ່ອນຄາຍລົງ ແລະ ສາມາດປິ່ນປົວຜູ້ຕິດເຊື້ອຫາຍດີໝົດທຸກຄົນແລ້ວກໍ່ຕາມ ວິທະຍາໄລລາວ-ອາເມຣິກາ ຍັງໄດ້ສືບຕໍ່ປະຕິບັດມາດຕະການປ້ອງກັນການຕິດເຊື້ອ ຕາມແຈ້ງການ ຄຳແນະນຳ ຂອງກະຊວງສຶກສາທິການ ແລະ ກີລາ ກໍຄື ຄະນະສະເພາະກິດ ວາງອອກຢ່າງເຄັ່ງຄັດ ໂດຍສະເພາະ ການຮັກສາໄລຍະຫ່າງ 1-2 ແມັດຂຶ້ນໄປ ການຮຽນ-ການສອນ ແມ່ນໃຫ້ນັ່ງໂຕະລະຄົນ ຫຼີກລ່ຽງການຍ່າງສວນກັນ ໂດຍໃຫ້ປະຕິບັດຕາມປ້າຍບອກທາງ (ເຂົ້າທາງດຽວ-ອອກທາງດຽວ) ຕໍ່ແຖວຕາມລຳດັບທີ່ເວັ້ນໄລຍະຫ່າງ ມີການວັດແທກອຸນຫະພູມ ຂ້າເຊື້ອ ອະນາໄມຫ້ອງຮຽນ ແລະ ອ້ອມຮອບບໍລິເວນໂຮງຮຽນ ຫຼີກລ່ຽງການອອກນອກຮົ້ວໂຮງຮຽນ ໃນໄລຍະພັກຮຽນ 15 ນາທີ ບໍ່ໃຫ້ກິນດື່ມຮ່ວມກັນ ແລະ ໃຊ້ອຸປະກອນຮ່ວມກັນ ຫຼິກລ່ຽງການຊຸມນຸມ ຫຼື ຢູ່ກັນເປັນກຸ່ມ ຕ້ອງໃສ່ຜ້າອັດປາກ ຖົງມືທຸກຄັ້ງ ໃນເວລາຢູ່ໃນໂຮງຮຽນ ຕ້ອງລ້າງມືໃສ່ສະບູ ຫຼື ເຈວລ້າງມືທຸກຄັ້ງກ່ອນ ຫຼັງຊົ່ວໂມງຮຽນ ພ້ອມນີ້ ທາງໂຮງຮຽນຍັງໄດ້ເຜີຍແຜ່ຜົນຮ້າຍ ແລະ ວິທີການປ້ອງກັນ ການຕິດເຊື້ອໂຄວິດ-19 ໃຫ້ກັບນັກຮຽນ-ນັກສຶກສາ ເປັນປະຈຳທຸກໆວັນ.
ທ່ານ ວົງສາທິດ ສຸວໍລະວົງ ຍັງໃຫ້ຮູ້ອີກວ່າ: ໃນໄລຍະເປີດການຮຽນ-ການສອນຄືນໃໝ່ ທາງວິທະຍາໄລ ຍັງໄດ້ມີນະໂຍບາຍຕໍ່ກັບນັກຮຽນ-ນັກສຶກສາ ເປັນຕົ້ນ ເລື່ອນຊຳລະຄ່າຮຽນ ແລະ ອື່ນໆ ພ້ອມນັ້ນ ທ່ານຍັງຝາກເຖິງສັງຄົມ ກໍຄື ພໍ່ແມ່ຜູ້ປົກຄອງ ຂອງນັກຮຽນ-ນັກສຶກສາ ໃຫ້ມີຄວາມໝັ້ນໃຈ ຕໍ່ການປະຕິບັດມາດຕະການປ້ອງກັນການຕິດເຊື້ອໂຄວິດ-19 ເພາະທາງວິທະຍາໄລ ໄດ້ປະຕິບັດຕາມຄຳສັ່ງ ຄຳແນະນຳ ຂອງລັດຖະບານ ວາງອອກຢ່າງເຄັ່ງຄັດ.
