ສະຫະພັນບານເຕະອາຊີ Asian Football Confederation (AFC) ກຽມຈັບສະຫຼາກການແຂ່ງຂັນບານເຕະຊາຍ ຊີງແຊັມອາຊີ ຮຸ່ນອາຍຸບໍ່ເກີນ 19 ປີ ຈັດຂຶ້ນຢູ່ປະເທດອຸເບກິສຖານ ແລະ ການແຂ່ງຂັນບານເຕະຊາຍ ຊີງແຊັມອາຊີ ຮຸ່ນອາຍຸບໍ່ເກີນ 16 ປີ ຈັດຂຶ້ນຢູ່ປະເທດບາເຣນ (AFC U19 & AFC U16 CHAMPIONSHIP 2020 FINALS) ການຈັບສະຫຼາກແມ່ນຈະໄດ້ມີຂຶ້ນໃນວັນທີ 18 ມິຖຸນາ 2020 ຢູ່ທີ່ສຳນັກງານສະຫະພັນບານເຕະອາຊີ (AFC HOUSE) ນະຄອນຫຼວງກົວລາລຳເປີ ປະເທດມາເລເຊຍ.
ສຳລັບທີມຊາດລາວ ຮຸ່ນອາຍຸບໍ່ເກີນ 19 ປີ ແມ່ນຜ່ານເຂົ້າຮອບສຸດທ້າຍ ການແຂ່ງຂັນບານເຕະຊາຍ ຊີງແຊັມອາຊີ ຮຸ່ນອາຍຸບໍ່ເກີນ 19 ປີ ໃນຖານະອັນດັບ 2 ທີ່ມີຄະແນນດີທີ່ສຸດເປັນຮອງແຊັມກຸ່ມ H.
ສະຫຼຸບຜົນການແຂ່ງຂັນ ທີມຊາດລາວ ລົງສະໜາມ 3 ນັດ ຊະນະ 2 ສະເໝີ 1 ມີ 7 ຄະແນນ.
– ນັດທີ 1 ວັນທີ 6 ພະຈິກ 2019 ລາວ ສະເໝີ ອົດສະຕຣາລີ 2-2.
– ນັດທີ 2 ວັນທີ 8 ພະຈິກ 2019 ລາວ ຊະນະ ໄຕ້ຫວັນ 2-1.
– ນັດທີ 3 ວັນທີ 10 ພະຈິກ 2019 ລາວ ຊະນະ ມາເກົາ 6-0.
ຂະນະທີ່ 16 ທີມທີ່ຜ່ານເຂົ້າຮອບສຸດທ້າຍ ການແຂ່ງຂັນບານເຕະຊາຍ ຊີງແຊັມອາຊີ ຮຸ່ນອາຍຸບໍ່ເກີນ 19 ປີ ປະກອບມີ: ອີຣັກ ກາຕ້າ ທາຈີກິສຖານ ອີຣານ ບາເຣນ ຊາອຸດິ ອາຣັບບີ ມາເລເຊຍ ອົດສະຕຣາລີ ສ ເກົາຫຼີ ຍີ່ປຸ່ນ ອິນໂດເນເຊຍ ລາວ ຫວຽດນາມ ເຢເມນ ກຳປູເຈຍ ແລະ ອຸເບກິສຖານ (ເຈົ້າພາບ) ໂດຍທີມຊາດລາວ ຖືກຈັດວາງໃນໂຖທີ 4 ໃນນັ້ນປະກອບມີ ເຢເມນ ອີຣານ ບາເຣນ ແລະ ລາວ.