ພິທີເຊັນສັນຍາຮ່ວມມືລະຫວ່າງພະແນກຍຸຕິທຳ ນະຄອນຫຼວງວຽງຈັນ (ນວ) ກັບ ສະມາຄົມເພື່ອພັດທະນາແມ່ຍິງ ແລະ ສຶກສາກົດໝາຍ ແລະ ພິທີເປີດໂຄງການສົ່ງເສີມແມ່ຍິງເຂົ້າເຖິງກົດໝາຍ ແລະ ຄວາມຍຸຕິທຳຢູ່ 10 ບ້ານ ແລະ 7 ໂຮງຮຽນເປົ້າໝາຍຢູ່ເມືອງສັງທອງ ຈັດຂຶ້ນວັນທີ 17 ມິຖຸນາ 2020 ທີ່ຫ້ອງການ ປກສ ເມືອງສັງທອງ ຮ່ວມລົງນາມຂອງທ່ານ ບົວເກດ ພົມມະຈັນ ສະມາຊິກສະພາແຫ່ງຊາດ ສະມາຊິກສະພາປະຊາຊົນ ນວ ຮອງຫົວໜ້າພະແນກຍຸຕິທຳ ນວ ແລະ ທ່ານ ນາງ ອິນທະນາ ບຸບພາສະຫວັນ ອຳນວຍການສະມາຄົມເພື່ອພັດທະນາແມ່ຍິງ ແລະ ສຶກສາກົດໝາຍ ມີທ່ານ ນາງ ແກ້ວ ພົມມະລາດ ຮອງເຈົ້າເມືອງສັງທອງ ທ່ານ ນາງ ທິບພາວັນ ແສງລິນທອງ ຜູ້ຕາງໜ້າສະຖານທູດເຢຍລະມັນປະຈຳລາວ ບັນດາຫົວໜ້າຫ້ອງການ ກອງບັນຊາການ ປກຊ-ປກສ ເລຂາພັກບ້ານ ອຳນວຍການໂຮງຮຽນ ແລະ ພະນັກງານວິຊາການກ່ຽວຂ້ອງເຂົ້າຮ່ວມ.
ໂຄງການສົ່ງເສີມແມ່ຍິງໃຫ້ສາມາດເຂົ້າເຖິງກົດໝາຍ ແລະ ຄວາມຍຸຕິທຳ ທີ່ເມືອງສັງທອງ ເພື່ອເສີມສ້າງໃຫ້ແມ່ຍິງມີຄວາມເຂັ້ມແຂງ ມີຄວາມສາມາດໃນການຕັດສິນໃຈ ແລະ ຮ່ວມມືກັບພາກສ່ວນຮັບຜິດຊອບຕ່າງໆ ເພື່ອນຳໃຊ້ກົດໝາຍ ແລະ ມີຄວາມເຂົ້າໃຈຄວາມລະອຽດອ່ອນຂອງບົດບາດຍິງ-ຊາຍຢ່າງຖືກຕ້ອງ ແລະ ສ້າງຄວາມເຂັ້ມແຂງໃຫ້ພະນັກງານບັງຄັບໃຊ້ກົດໝາຍ ແລະ ຄະນະແກ້ໄຂຂໍ້ຂັດແຍ່ງຂັ້ນບ້ານໃນການຈັດຕັ້ງປະຕິບັດກົດໝາຍ ແລະ ການນຳໃຊ້ກົດໝາຍໃຫ້ເໝາະສົມກັບຄວາມລະອຽດອ່ອນ ຂອງຄວາມສະເໝີພາບລະຫວ່າງຍິງ-ຊາຍ ເພີ່ມຄວາມເຂົ້າໃຈໃຫ້ປະຊາຊົນ ແລະ ນັກຮຽນໃນເຂດເປົ້າໝາຍກ່ຽວກັບຄວາມຮຸນແຮງບົນພື້ນຖານທາງເພດ ແລະ ຄອບຄົວ ສິດທິເດັກ ຄວາມສະເໝີພາບລະຫວ່າງຍິງ-ຊາຍ ແລະ ການເຂົ້າເຖິງກົດໝາຍສຳລັບກິດຈະກຳໂຄງການ ປະກອບມີເກັບກຳຂໍ້ມູນເພື່ອເລືອກບ້ານເປົ້າໝາຍ ແລະ ໂຮງຮຽນຢູ່ເມືອງສັງທອງ ເຊັນບົດບັນທຶກການຮ່ວມມື ຈັດກອງປະຊຸມເປີດໂຄງການຢູ່ເມືອງສັງທອງ ຈັດພິມປື້ມຕຳລາຮຽນກົດໝາຍ 45 ວັນ ເຝິກອົບຮົມພາລະບົດບາດ ສິດ ແລະ ໜ້າທີ່ໃຫ້ຄະນະແກ້ໄຂຂໍ້ຂັດແຍ່ງຂັ້ນບ້ານ ຈັດເຝິກອົບຮົມທັກສະການຂຶ້ນຫ້ອງສອນ ໃຫ້ບັນດາຄູອາຈານຂຶ້ນຫ້ອງສອນກົດໝາຍ 45 ວັນ ລົງໂຄສະນາເຜີຍແຜ່ກົດໝາຍໃນ 10 ບ້ານ ແລະ 7 ໂຮງຮຽນເປົ້າໝາຍຢູ່ເມືອງສັງທອງ ຕິດຕາມ ແລະ ປະເມີນຜົນໂຄງການໃນເດືອນພະຈິກ ແລະ ຈັດກອງປະຊຸມປິດໂຄງການເດືອນທັນວາ 2020.