ເມືອງຈັນທະບູລີ ເປັນເມືອງໜຶ່ງທີ່ຕັ້ງຢູ່ໃຈກາງຂອງນະຄອນຫຼວງວຽງຈັນ ອີງໃສ່ສະພາບແວດລ້ອມໃນປັດຈຸບັນເຫັນວ່າມີຄວາມສັບສົນຫຼາຍພໍສົມຄວນ ໂດຍສະເພາະແມ່ນສະພາບການສັນຈອນໄປ-ມາໃນຊົ່ວໂມງເລັ່ງດ່ວນ ບາງເສັ້ນທາງແມ່ນມີຄວາມແອອັດ ອັ່ງອໍ ການໄປ-ມາ ບໍ່ສະດວກສະບາຍ ເຊັ່ນ: ຢູ່ຕາມເຂດຊຸມຊົນ ຕະຫຼາດ ໂຮງຮຽນ ແລະ ສຳນັກງານ-ອົງການຕ່າງໆ ຕໍ່ກັບບັນຫາດັ່ງກ່າວນີ້ ທາງເຈົ້າໜ້າທີ່ຈະລາຈອນເມືອງຈັນທະບູລີ ບໍ່ໄດ້ນິ້ງນອນໃຈ ໄດ້ຈັດກຳລັງພົນເຂົ້າປະຈຳຕາມຈຸດ ຕາມປ້ອມ 3 ແຍກ 4 ແຍກ ທີ່ເຫັນວ່າມີຄວາມແອອັດສັບສົນຢູ່ຫຼາຍຈຸດ ເພື່ອລະບາຍການສັນຈອນໃຫ້ພໍແມ່ປະຊາຊົນ ຜູ້ທີ່ໃຊ້ລົດ-ໃຊ້ຖະໜົນມີຄວາມສະດວກສະບາຍ ແລະ ຫຼຸດຜ່ອນບັນຫາການເກີດອຸບັດເຫດ.
ພັນໂທ ຫົງຄຳ ລັດຖະຟ້າສະຫວ່າງ ຫົວໜ້າກອງຮ້ອຍຈະລາຈອນເມືອງຈັນທະບູລີ ໃຫ້ຮູ້ວ່າ: ພາຍຫຼັງທີ່ລັດຖະບານໄດ້ມີການຜ່ອນຜັນມາດຕະການປ້ອງກັນ ການແຜ່ລະບາດພະຍາດໂຄວິດ-19 ໂດຍອະນຸຍາດໃຫ້ມີການສັນຈອນໄປ-ມາຕາມສະຖານທີ່ຕ່າງໆພາຍໃນແຂວງຕົນເອງ ໃນຕົ້ນເດືອນພຶດສະພາ 2020 ຜ່ານມາ ສະພາບການສັນຈອນຢູ່ເມືອງຈັນທະບູລີ ແມ່ນໄດ້ເພີ່ມຂຶ້ນເກືອບເທົ່າຕົວ ຖືວ່າມີຄວາມສັບສົນພໍສົມຄວນຕໍ່ບັນຫາດັ່ງກ່າວນີ້ ກອງຮ້ອຍຈະລາຈອນເມືອງຂອງພວກເຮົາ ໄດ້ມີການຄາດການ ແລະ ວາງແຜນການມາກ່ອນໜ້ານັ້ນແລ້ວ ແລະ ໄດ້ມີການຈັດຕັ້ງປະຕິບັດໃນການຈັດກຳລັງລົງປະຈຳການຢູ່ 10 ປ້ອມ ຕາມຈຸດ 3 ແຍກ ແລະ 4 ແຍກທີ່ເຫັນວ່າມີຄວາມແອອັດ ແລະ ສັບສົນໃນເວລາໂມງເລັ່ງດ່ວນ ນອກຈາກນັ້ນ ຍັງໄດ້ວາງກຳລັງຕື່ມອີກປະມານ 10 ກວ່າຈຸດ ທີ່ເຫັນວ່າການສັນຈອນມີຄວາມສັບສົນ ທັງນີ້ກໍເພື່ອອຳນວຍຄວາມສະດວກໃຫ້ແກ່ຜູ້ໃຊ້ລົດ-ໃຊ້ຖະໜົນ ການນຳພັກ-ລັດ ພໍ່ແມ່ປະຊາຊົນ ທະຫານ-ຕຳຫຼວດໄປ-ມາສະດວກ ແລະ ວ່ອງໄວ ກໍຄື ໃນຕອນເຊົ້າໂມງເຂົ້າການ ເລີ່ມແຕ່ເວລາ 7 ໂມງ ຫາ 8 ໂມງ ແລະ ຫຼັງເລີກວຽກ ເວລາ 16 ໂມງ ຫາ 17 ໂມງແລງ ຜ່ານການຈັດຕັ້ງປະຕິບັດວຽກງານ ທີ່ຜ່ານມາເຫັນວ່າການສັນຈອນມີຄວາມສະດວກດີພໍສົມຄວນ.
ຕໍ່ສະພາບການດັ່ງກ່າວ ກອງຮ້ອຍຈະລາຈອນເມືອງຈັນທະບູລີ ຈະສຸມໃສ່ວຽກງານໂຄສະນາ ຫຼຸດຜ່ອນການເກີດອຸບັດເຫດ ວຽກງານການຈັດສັນຄວາມເປັນລະບຽບຮຽບຕາມເສັ້ນທາງ ວຽກງານລະບາຍການສັນຈອນ ເພື່ອອຳນວຍຄວາມສະດວກໃຫ້ແກ່ພໍ່ແມ່ປະຊາຊົນໃນຊົ່ວໂມງເລັ່ງດ່ວນ ປະຈຳຈຸດຄອຍເຫດຕະຫຼອດ 24 ຊົ່ວໂມງ ເພື່ອແກ້ໄຂບັນຫາການເກີດອຸບັດເຫດ ແລະ ສຸມໃສ່ວຽກງານກວດກາການບັງຄັບໃຊ້ ກົດໝາຍທີ່ຢູ່ໃນໂຄງການຫຼຸດຜ່ອນອຸບັດເຫດ.
ໃນໂອກາດນີ້ ພັນໂທ ຫົງຄຳ ລັດຖະຟ້າສະຫວ່າງ ຍັງຮຽກຮ້ອງເຖິງບັນດາຜູ້ທີ່ໃຊ້ລົດ-ໃຊ້ຖະໜົນ ຈົ່ງປະຕິບັດກົດລະບຽບຈະລາຈອນທາງບົກຢ່າງເຂັ້ມງວດ ເພື່ອຄວາມເປັນລະບຽບຮຽບຮ້ອຍຂອງຕົວເມືອງ ຫຼຸດຜ່ອນບັນຫາການເກີດອຸບັດເຫດທີ່ຈະພາໃຫ້ເກີດຄວາມເສຍຫາຍທາງດ້ານຊັບສີນ ຮັບບາດເຈັບ ພິການ ແລະ ເສຍຊີວິດ.