ໂຣກຄວາມດັນເລືອດສູງ ຄືສະພາວະຂອງລະດັບຄວາມດັນເລືອດສູງກວ່າລະດັບປົກກະຕິ ໂດຍທົ່ວໄປແລ້ວ ຜູ້ທີ່ມີຄວາມດັນເລືອດປົກກະຕິ ຈະວັດຄ່າຄວາມດັນໄດ້ 120/80 ມິນລິແມັດປຣອດ ແຕ່ຜູ້ທີ່ມີຄວາມດັນເລືອດສູງ ຈະວັດຄ່າຄວາມດັນໄດ້ຕັ້ງແຕ່ 140/90 ມິນລິແມັດປຣອດຂຶ້ນໄປ ແລະ ຖືວ່າເປັນສະພາວະທີ່ຕ້ອງໄດ້ຮັບການຄວບຄຸມຕັ້ງແຕ່ຕົ້ນໆ ເນື່ອງຈາກອາດນຳມາຊຶ່ງພາວະແຊກຊ້ອນ ແລະ ໂຣກຕ່າງໆຫຼວງຫຼາຍ ເຊັ່ນ ໂຣກຫົວໃຈຂາດເລືອດ ໂຣກຫົວໃຈຫຼົມແຫຼວ ໂຣກຫຼອດເລືອດໃນສະໝອງ ໂຣກໝາກໄຂ່ຫຼັງເສື່ອມ ແລະ ໂຣກເບົາຫວານ ເປັນຕົ້ນ.
ຄວາມດັນເລືອດສູງ ສາເຫດ ແລະ ປັດໄຈສ່ຽງ
ຄວາມໜ້າຢ້ານກົວຂອງໂຣກຄວາມດັນເລືອດສູງ ຄືຜູ້ເປັນສ່ວນໃຫຍ່ກວ່າ 90-95% ບໍ່ສາມາດກວດ ຫາສາເຫດທີ່ຊັດເຈນໄດ້ວ່າເກີດຂຶ້ນຈາກອັນໃດ ເຮັດໃຫ້ໂຣກຄວາມດັນເລືອດສູງຖືກຂະໜານນາມວ່າ “ໂຣກເພັດຊະຄາດງຽບ” ໂດຍທາງການແພດນັ້ນ ໄດ້ອະທິບາຍໂຣກຄວາມດັນເລືອດສູງນີ້ວ່າ ເປັນໂຣກທີ່ເກີດຂຶ້ນຈາກທຳມະຊາດຂອງມະນຸດ ເຊັ່ນ: ເກີດຈາກກຳມະພັນ ແລະ ອາຍຸທີ່ຫຼາຍຂຶ້ນ ໂດຍສ່ວນໃຫຍ່ຈະພົບໄດ້ຫຼາຍໃນຜູ້ຍິງທີ່ມີອາຍຸຕັ້ງແຕ່ 40-50 ປີຂຶ້ນໄປ ຫຼືໄວໝົດປະຈຳເດືອນ.
ວິທີປິ່ນປົວໂຣກຄວາມດັນເລືອດສູງ
ເຖິງແມ່ນໂຣກຄວາມດັນເລືອດສູງຈະເປັນໂຣກທີ່ອັນຕະລາຍ ແຕ່ກໍເປັນໂຣກທີ່ສາມາດຄວບຄຸມໄດ້ໃນໄລຍະຍາວ ຫາກໄດ້ຮັບການປິ່ນປົວທີ່ທັນເວລາ ໂດຍເບື້ອງຕົ້ນຈະປິ່ນປົວດ້ວຍວິທີການໃຫ້ຢາຫຼຸດຄວາມດັນເລືອດ ເພື່ອຮັກສາລະດັບຄວາມດັນໃຫ້ຢູ່ໃນເກນມາດຕະຖານ ນອກຈາກການຮັບປະທານຢາແລ້ວ ຜູ້ປ່ວຍຄວນປັບປ່ຽນພຶດຕິກຳ ເພື່ອໃຫ້ການປິ່ນປົວມີປະສິດທິພາບຫຼາຍຂຶ້ນດັ່ງນີ້.
ສິ່ງທີ່ຄວນເຮັດ
– ໝັ່ນກວດວັດແທກຄວາມດັນເລືອດຢ່າງໜ້ອຍປີລະ 1 ຄັ້ງ.
– ຮັບປະທານອາຫານໃຫ້ຄົບ 5 ໝູ່ ເນັ້ນຜັກ ແລະ ໝາກໄມ້ຊະນິດທີ່ບໍ່ຫວານ.
– ຄວບຄຸມນ້ຳໜັກຕົວໃຫ້ຢູ່ໃນເກນປົກກະຕິ.
– ອອກກຳລັງເປັນປະຈຳ.
– ພັກຜ່ອນໃຫ້ພຽງພໍ.
– ຮັກສາສຸຂະພາບຈິດໃຫ້ດີຢູ່ສະເໝີ ບໍ່ເຄັ່ງຄຽດ.
ສິ່ງທີ່ບໍ່ຄວນເຮັດ
– ງົດການສູບຢາ ເພາະສານພິດໃນຄວັນຢາສູບ ສົ່ງຜົນໃຫ້ເກີດການອັກເສບ ຕີບຕັນຂອງຫຼອດເລືອດຕ່າງໆ ລວມທັງຫຼອດເລືອດຫົວໃຈ ແລະ ຫຼອດເລືອດໝາກໄຂ່ຫຼັງ.
– ຫຼຸດການດື່ມເຄື່ອງດື່ມທາດເຫຼົ້າ ເພາະເຮັດໃຫ້ມີໂອກາດເປັນໂຣກຄວາມດັນເລືອດສູງເຖິງ 50%.
– ຫຼຸດອາຫານເຄັມ ຫຼືອາຫານທີ່ມີໂຊດຽມຫຼາຍເກີນໄປ ເຊັ່ນ: ກະປິ ນ້ຳປາ ສິ່ງໝັກດອງ.
– ຫຼຸດອາຫານທີ່ມີໄຂມັນສູງ ເຊັ່ນ: ຊີ້ນຕິດມັນ ໜັງສັດ ໄຂ່ແດງ ຫອຍນາງລົມ ອາຫານປະເພດຂົ້ວ ຫຼືຈືນ.
– ຫຼຸດນ້ຳຕານ ເຊັ່ນ: ນ້ຳຫວານ ອາຫານ ຫຼືເຂົ້າໜົມທີ່ມີລົດຊາດຫວານ.
ຊາວບ້ານ – ນຳສະເໜີ