ນັບຕັ້ງແຕ່ປີ 2015 ເປັນຕົ້ນມາ ກະຊວງສຶກສາທິການ ແລະ ກີລາ ໄດ້ຮັບການສະໜັບສະໜູນຈາກລັດຖະບານອົດສະຕຣາລີ ແລະ ສະຫະພາບເອີຣົບ ໃນການທົບທວນຄືນຫຼັກສູດຂັ້ນປະຖົມສຶກສາແຫ່ງຊາດ ຄ່ຽງຄູ່ກັບການພັດທະນາເຄື່ອງມືຊ່ວຍເຫຼືອການຮຽນ-ການສອນ ແລະ ການເຝິກອົບຮົມຄູ ການທົບທວນຄືນຫຼັກສູດໃໝ່ແມ່ນໄດ້ເລີ່ມຕົ້ນຂຶ້ນໃນປີຜ່ານມາ ສຳລັບຂັ້ນ ປ1 ແລະ ຈະທົບທວນໃນຂັ້ນຕໍ່ໄປ.
ຫຼ້າສຸດໃນຕົ້ນເດືອນມິຖຸນາ 2020 ໄດ້ຈັດເຝິກອົບຮົມໃຫ້ຄູເຝິກຫຼັກແຫຼ່ງກ່ຽວກັບການນຳໃຊ້ຫຼັກສູດຂັ້ນ ປ2 ສະບັບປັບປຸງໃໝ່ ຢູ່ທີ່ສູນເຝິກອົບຮົມແມ່ຍິງ ນະຄອນຫຼວງວຽງຈັນ ສຳລັບຈຸດພິເສດຂອງຫຼັກສູດ ປ2 ສະບັບປັບປຸງໃໝ່ນີ້ ແມ່ນຫຼັກສູດທີ່ເນັ້ນມາດຕະຖານຜົນສຳເລັດດ້ານການຮຽນ ນຳໃຊ້ວິທີສອນ ຮູບແບບ ແລະ ເຕັກນິກການສອນທີ່ຫຼາກຫຼາຍ ເພື່ອສົ່ງເສີມການຮຽນທີ່ເນັ້ນການປະຕິບັດຕົວຈິງ ຫຼຸດຜ່ອນການບັນຍາຍ ເພີ່ມການເຮັດກິດຈະກຳ ການຄິດວິເຄາະ ການແກ້ບັນຫາ ແລະ ການນຳໃຊ້ຄວາມຮູ້ທີ່ໄດ້ຮຽນມາເຂົ້າໃນສະຖານະການໃໝ່ໃນຊີວິດຕົວຈິງ.
ສຳລັບການເຝິກອົບຮົມໃຊ້ເວລາ 9 ວັນ ໂດຍທາງສະຖານທູດອົດສະຕຣາລີ ແລະ ສະຫະພາບເອີຣົບ ໄດ້ສະໜັບສະໜູນທຶນ ຜ່ານແຜນງານການປັບປຸງຄຸນນະພາບ ແລະ ຂະຫຍາຍໂອກາດເຂົ້າຮຽນສຳລັບການສຶກສາຂັ້ນພື້ນຖານໃນ ສປປ ລາວ (ບີຄວາ) Basic Education Quality and Access in Lao PDR ( BEQUAL) ເຊິ່ງມີຄູເຝິກມາຈາກບັນດາ ແຂວງ ນະຄອນຫຼວງ ເຂົ້າຮ່ວມເຝິກອົບຮົມຈຳນວນ 59 ທ່ານ ກ່ຽວກັບການສອນຂອງຄູ ວິທີການນຳໃຊ້ກິດຈະກຳ ແລະ ເນື້ອໃນຂອງຫຼັກສູດຂັ້ນ ປ2 ສະບັບປັບປຸງໃໝ່ ພາຍຫຼັງສຳເລັດການເຝິກອົບຮົມ ຜູ້ເຂົ້າຮ່ວມທັງໝົດຈະສາມາດນຳເອົາເນື້ອໃນບົດຮຽນທີ່ໄດ້ຈາກການເຂົ້າຮ່ວມເຝິກອົບຮົມໄປເຝິກອົບຮົມໃຫ້ແກ່ຄູເຝິກຂັ້ນແຂວງ ແລະ ນະຄອນຫຼວງຕໍ່ໄປ ໃນຈຳນວນ 9.843 ທ່ານ ແລະ ຄູສຶກສານິເທດ ຈຳນວນ 561 ທ່ານໃນຂອບເຂດທົ່ວປະເທດ.
ໃນລະຫວ່າງການເຝິກອົບຮົມນີ້ ຜູ້ເຂົ້າຮ່ວມທຸກທ່ານນອກຈາກໄດ້ຮັບການເຝິກກ່ຽວກັບເຄື່ອງມືນຳໃຊ້ໃນຫຼັກສູດຂັ້ນ ປ2 ສະບັບປັບປຸງໃໝ່ແລ້ວ ຍັງຈະໄດ້ລົງເລິກເນື້ອໃນລະອຽດ ມີການທົບສອບ ແລະ ວິເຄາະ ກິດຈະກຳທີ່ຈະນຳໄປໃຊ້ໃນຫ້ອງຮຽນຂັ້ນຕ່າງໆ ເນື້ອໃນການອົບຮົມຈະໄດ້ລວມເອົາຜົນໄດ້ຮັບຈາກການຈັດອົບຮົມຄູຂັ້ນ ປ1 ທີ່ຜ່ານມາ ນຳສະເໜີພາບລວມຂອງເນື້ອໃນວິຊາໃນຫຼັກສູດຂັ້ນ ປ2 ວິທີການສອນວິຊາພາສາລາວ ແລະ ເຕັກນິກຕ່າງໆ ທີ່ນຳໃຊ້ເຂົ້າໃນການຮຽນ-ການສອນ ຜູ້ເຂົ້າຮ່ວມທຸກທ່ານຈະໄດ້ຮັບການເຝິກວິທີການນຳໃຊ້ປຶ້ມແບບຮຽນ ແລະ ປຶ້ມອ່ານເສີມ ການສອນຫ້ອງຄວບ ແລະ ນຳໃຊ້ ວິດີໂອການພັດທະນາວິຊາຊີບຄູແບບຕໍ່ເນື່ອງ ເປັນເຄື່ອງມືໃນການຊ່ວຍເຫຼືອ ເພື່ອເພີ່ມທັກສະຂອງຕົນເອງໃຫ້ດີຂຶ້ນກວ່າເກົ່າ.
ສຳລັບການອົບຮົມໃນຂັ້ນແຂວງ ຄາດວ່າຈະຈັດຂຶ້ນລະຫວ່າງວັນທີ 22 ເດືອນມິຖຸນາ ຫາ ວັນທີ 12 ກໍລະກົດ 2020 ໂດຍນຳໃຊ້ມາດຕະການດຽວກັນສຳລັບຜູ້ເຂົ້າຮ່ວມ 29
ກຸ່ມຍ່ອຍໃນທົ່ວປະເທດ ເພື່ອຈຳກັດຜູ້ເຂົ້າຮ່ວມ ບໍ່ໃຫ້ມີການເດີນທາງຂອງຜູ້ເຂົ້າຮ່ວມຫຼາຍເກີນໄປ ຈຳນວນຄູເຝິກຂັ້ນແຂວງທີ່ຈະເຂົ້າຮ່ວມອົບຮົມແມ່ນເພີ່ມຂຶ້ນ 122 ທ່ານ ຈາກ 477 ທ່ານ ມາເປັນ 599 ທ່ານ ເພື່ອໃຫ້ພຽງພໍສຳລັບການອົບຮົມໃຫ້ແກ່ຄູ ເນື່ອງຈາກວ່າຄູທີ່ເຂົ້າເຝິກຈະຖືກແບ່ງອອກເປັນກຸ່ມຍ່ອຍເຊັ່ນກັນ ການອົບຮົມຄູສອນແມ່ນມີການປ່ຽນແປງເວລາ ເພື່ອໃຫ້ສອດຄ້ອງກັບການເປີດຮຽນພາກທີ 2 ສືບເນື່ອງມາຈາກການໂຈະຮຽນຊົ່ວຄາວ ເນື່ອງຈາກການແຜ່ລະບາດຂອງພະຍາດ ໂຄວິດ-19.
ສຳລັບການກຳນົດເຝິກອົບຮົມຄູຂັ້ນ ປ2 ໃນຄັ້ງຕໍ່ໄປ ແມ່ນຈະກຳນົດເອົາພາຍຫຼັງສຳເລັດການເສັງຈົບຊັ້ນຂອງນັກຮຽນຂັ້ນ ປ5 ເພື່ອໃຫ້ໝັ້ນໃຈວ່າຄູສາມາດເຂົ້າຮ່ວມເຝິກໄດ້ຢ່າງສະໝ່ຳສະເໝີ ເຊິ່ງຄາດວ່າຈະສຳເລັດການສອບເສັງຂັ້ນ ປ5 ໃນວັນທີ 17 ກໍລະກົດ 2020 ພິເສດຄູ ເຝິກທີ່ເຂົ້າຮ່ວມການເຝິກອົບຮົມຄັ້ງນີ້ ຈະໄດ້ຮັບຂໍ້ມູນຢ່າງລະອຽດກ່ຽວກັບການປ້ອງກັນການແຜ່ລະບາດຂອງເຊື້ອພະຍາດໂຄວິດ-19 ຂໍ້ມູນວິທີການຫຼີກລ່ຽງຈາກເຊື້ອພະຍາດ ໂຄວິດ-19 ເຊິ່ງຄູເຝິກ ຈະອະທິບາຍ ພ້ອມສາທິດວິທີການປະຕິບັດຢ່າງຖືກຕ້ອງ ເພື່ອເປັນຕົວຢ່າງ ແລະ ຈະມີການຢ້ຳຄືນຢ່າງຕໍ່ເນື່ອງ ພ້ອມດຽວກັນຜູ້ເຂົ້າຮ່ວມເຝິກອົບຮົມ ຈະໄດ້ເຂົ້າໃຈວິທີການປະຕິ ບັດຢ່າງຈະແຈ້ງ ສົ່ງເສີມມາດຕະການ ການປ້ອງກັນເຊື້ອພະຍາດ ໂຄວິດ-19 ເພື່ອນຳໄປເຜີຍແຜ່ໃຫ້ນັກຮຽນໃນຫ້ອງຮຽນຂອງຕົນ ການອົບຮົມຄູເຝິກຄັ້ງນີ້ ຖືວ່າເປັນການອົບຮົມຂັ້ນເບື້ອງຕົ້ນ ທີ່ມີຄວາມສຳຄັນຫຼາຍຕໍ່ກັບການເຝິກໃນຂັ້ນຕໍ່ໄປ ເພື່ອໃຫ້ຄູສອນຂັ້ນ ປ2 ຮຽນຮູ້ທັກສະ ແລະ ເຕັກນິກຕ່າງໆທີ່ຈຳເປັນ ເພື່ອນຳໄປໃຊ້ໃນຕົວຈິງ ເວລາຈັດຕັ້ງປະຕິບັດຫຼັກສູດສະບັບປັບປຸງໃໝ່ໃນສົກຮຽນໜ້າ ໃນເດືອນກັນຍາ 2020 ທີ່ຈະມາເຖິງ.
ນຳສະເໜີໂດຍ: ແວ່ນຂາວ