ອີງຕາມບົດລາຍງານຂອງທ່ານນາງ ຖາວອນ ເມືອງປາກ ຕາງໜ້າບໍລິສັດ ຟູຈິວະຣະ ແລະ ບໍລິສັດ ດາວເຮືອງ ໃນກອງປະຊຸມໃຫຍ່ ຄັ້ງທີ VII ຂອງອົງຄະນະພັກເມືອງຈັນທະບູລີ ໃຫ້ຮູ້ວ່າ ການຈັດຕັ້ງປະຕິບັດໂຄງການ “ພັດທະນາແຫຼ່ງທ່ອງທ່ຽວ ຊົມທັດສະນີຍະພາບນ້ຳຂອງຍາມແລງ” ໂດຍອີງໃສ່ສັນຍາສຳປະທານລະຫວ່າງພະແນກແຜນການ ແລະ ການລົງທຶນນະຄອນຫຼວງວຽງຈັນ ກັບບໍລິສັດ ຟູຈິວະຣະ ແລະ ບໍລິສັດ ດາວເຮືອງ ໃນປີ 2011 ທັງສອງບໍລິສັດໄດ້ລົງເກັບກຳຂໍ້ມູນຈາກພາກສ່ວນກ່ຽວຂ້ອງ ຈາກນັ້ນ ກໍໄດ້ຂຽນບົດໂຄງການລະອຽດ ໂດຍຜ່ານຂະແໜງການກ່ຽວຂ້ອງທຸກຂັ້ນ ເພື່ອຂໍການອະນຸມັດ ເຊິ່ງການພັດທະນາເຂດດັ່ງກ່າວ ແມ່ນໄດ້ກຳນົດຍຸດທະສາດການພັດທະນາສວນສາທາລະນະ ຕ້ອງຕິດພັນກັບນະໂຍບາຍ 6ສ ຂອງນະຄອນຫຼວງວາງອອກ ຈັດສັນໃຫ້ມີຄວາມເປັນລະບຽບຮຽບຮ້ອຍ ສວນຫຍ້າ ແລະ ຕົ້ນໄມ້ສີຂຽວດອກໄມ້ປະດັບ ຈັດຕັ້ງປະຕິບັດໃຫ້ມີຜູ້ອະນາໄມ ບົວລະບັດຮັກສາ ປັບປຸງລະບົບໄຟຟ້າ ພາຍໃນສວນປ່ຽນມາເປັນລະບົບໄຟ LED ທັງໝົດ ຄຽງຄູ່ກັນນັ້ນ ຍັງໄດ້ຖືສຳຄັນໃນວຽກງານປ້ອງກັນຊາດ ປ້ອງກັນຄວາມສະຫງົບ ໂດຍໄດ້ແຕ່ງຕັ້ງໜ່ວຍປະຈຳການຕະຫຼອດ 24 ຊົ່ວໂມງ ສົມທົບກັບກອງຮ້ອຍ ກອງບັນຊາການຊາຍແດນ ປກສ ບ້ານ ກຸ່ມບ້ານ ຈັດຕັ້ງສະຖານທີ່ຈອດລົດທຸກຊະນິດ ດ້ວຍຫຼາຍວິທີເຮັດໃຫ້ສະຖານທີ່ດັ່ງກ່າວ ມີຄວາມປອດໄພ ສ້າງກົດລະບຽບໃຫ້ຊາວຄ້າຂາຍ ແຕ່ລະຮ້ານຕ້ອງມີຖົງຢາງໃສ່ຂີ້ເຫຍື້ອ ແຕ່ລະມື້ຕ້ອງເກັບມ້ຽນຂີ້ເຫຍື້ອໃຫ້ເປັນລະບຽບຮຽບຮ້ອຍ ພາຍຫຼັງເລີກຕະຫຼາດນັດ ຕ້ອງໄດ້ອະນາໄມສະຖານທີ່ດັ່ງກ່າວໃຫ້ສະອາດຈົບງາມ.
ປັດຈຸບັນ ທັງສອງບໍລິສັດໄດ້ຂຶ້ນແຜນພັດທະນາສວນເຈົ້າອະນຸວົງ ໃຫ້ມີໂສມໜ້າໃໝ່ ເຊັ່ນ: ພັດທະນາຮົ້ວສີຂຽວໃຫ້ມາເປັນສວນດອກໄມ້ ຫຼືກຳແພງວຽງຈັນເກົ່າ ພັດທະນາສວນຫຼີ້ນເດັກນ້ອຍ ເຄື່ອງອອກກຳລັງກາຍ ປັບປຸງສວນດອກໄມ້ໃຫ້ມີບ່ອນນັ່ງຫຼິ້ນ ດື່ມກາເຟ ອາຫານເບົາ ປັບປຸງຫ້ອງນ້ຳໃຫ້ໄດ້ມາດຕະຖານ ໂດຍຜູ້ສຳປະທານເປັນຜູ້ພັດທະນາເອງ ນອກຈາກນີ້ ກໍໄດ້ພັດທະນາຕອນດິນພັກລຸ່ມແຄມຂອງ ເຊິ່ງເອີ້ນວ່າ ສະຖານທີ່ທ່ອງທ່ຽວນາຄາຣາຊ ຊີຕີ້ ເຊິ່ງອອກແບບສະຖາປັດຕະຍາກຳລາວລວມສະໄໝປະກອບມີ ເຂດວາງສະແດງສິນຄ້າຜະລິດຕະພັນເຄື່ອງລາວ ຫັດຖະຫຳ ເຄື່ອງຕ່າງປະເທດຈຳນວນໜຶ່ງ ມີນ້ຳພຸ ຫ້ອງນ້ຳສະອາດ ສວນດອກໄມ້ ບ່ອນນັ່ງພັກຜ່ອນ ແລະ ອື່ນໆ ເຮັດໃຫ້ເຂດດັ່ງກ່າວ ມີຄວາມສວຍງາມສາມາດດຶງດູດນັກທ່ອງທ່ຽວ ທັງພາຍໃນ ແລະ ຕ່າງປະເທດນັບມື້ຫຼາຍຂຶ້ນ.
ສຳລັບແຜນພັດທະນາພັກລຸ່ມກັນຕາຝັ່ງເຈື່ອນດ້ານເທິງ ແຕ່ຜາມໄຊຫາອົງການແມ່ນ້ຳຂອງ ເຊິ່ງເປັນເຂດສຳປະທານຂອງບໍລິສັດ ດາວເຮືອງ ກໍໄດ້ສືບຕໍ່ພັດທະນາ ເພື່ອໃຫ້ເກາະກ່າຍກັນກັບແຜນພັດທະນາພັກລຸ່ມກັນຕາຝັ່ງເຈື່ອນຂອງນາຄາຣາຊ ຊີຕີ້ ເຊິ່ງໄດ້ມີການອອກແບບທີ່ມີຄວາມແຕກຕ່າງກັນ ໂດຍເນັ້ນໃຫ້ເປັນຮ້ານກາເຟ ຮ້ານອາຫານ ຂາຍຜະລິດຕະພັນສົ່ງເສີມການຜະລິດພາຍໃນ ສ້າງເປັນບ່ອນຈັດກິດຈະກຳ ເທສະການຕ່າງໆ ສະຫຼັບວ່າງໄປດ້ວຍຕົ້ນໄມ້ສີຂຽວໃຫ້ເກາະກ່າຍເປັນສະຖານທີ່ຮົ່ມເຢັນ ເພື່ອນັ່ງພັກຜ່ອນໃນໄລຍະຜ່ານມາ ບໍລິສັດ ດາວເຮືອງ ໄດ້ເອົາແບບແຜນລວມໄປຜ່ານຄະນະກຳມະການ ແລະ ໄດ້ຮັບການແນະນຳ ເພື່ອໃຫ້ແບບແຜນດັ່ງກ່າວສົມບູນ ພາຍຫຼັງທີ່ໄດ້ຮັບອະນຸຍາດ ກໍຈະໄດ້ເລີ່ມປຸກສ້າງເປັນແຕ່ລະໄລຍະຕາມແຜນຜັງ ລວມຄື ສວນເຈົ້າອະນຸວົງ ນາຄາຣາຊ ຊີຕີ້ ແລະ ພັກລຸ່ມຈະເປັນບ່ອນວາງສະແດງສິນຄ້າທີ່ເປັນເອກະລັກຂອງລາວ ຊື້ຂາຍ-ແລກປ່ຽນກັບນັກທ່ອງທ່ຽວ ສ້າງວຽກເຮັດງານທຳເປັນບ່ອນຄ້າຂາຍ ໃຫ້ແກ່ຜູ້ລິດກະສິກຳ ຫັດຖະກຳ ກໍຄືຜູ້ປະກອບການທຸລະກິດຂະໜາດນ້ອຍ ເປັນບ່ອນພັກຜ່ອນຕ່າງໆ ຊົມທິວທັດແມ່ນ້ຳຂອງ ເບິ່ງແສງຕາເວັນລັບຂອບຟ້ານ້ຳຂອງຍາມແລງ.
ນອກຈາກນີ້ ທັງສອງບໍລິສັດກໍໄດ້ເອົາໃຈໃສ່ໃນການປະຕິບັດນະໂຍບາຍ ເສຍພັນທະອາກອນ ປະກອບສ່ວນຊ່ວຍເຫຼືອສັງຄົມ ພັດທະນາບ້ານອ້ອມຂ້າງງານສັງສັນສັງຄົມຕ່າງໆ ນັບແຕ່ມື້ເລີ່ມ ຕົ້ນຈົນເຖິງປັດຈຸບັນໄດ້ລົງທຶນພັດທະນາສວນແຫ່ງນີ້ມູນຄ່າຫຼາຍຕື້ກີບ ພ້ອມນີ້ກໍໄດ້ປະຕິບັດນະໂຍບາຍຂອງພັກ-ລັດຕາມທິດສາມສ້າງຢ່າງແທ້ຈິງ ພ້ອມທັງປະຕິບັດນະໂຍບາຍ 6ສ ເຊິ່ງເປັນຄວາມຈຳເປັນຈະຕ້ອງໄດ້ພັດທະນາ ນວ ໃຫ້ກາຍເປັນເມືອງໜ້າຢູ່ເມືອງແຫ່ງສຸຂະພາບ.