ເປັນຫຍັງຈຶ່ງນອນບໍ່ຫຼັບ? ທັງໆທີ່ບໍ່ໄດ້ມີເລື່ອງເຄັ່ງຄຽດ ຫຼື ມີເລື່ອງອຸກໃຈໃຫ້ເກັບເອົາມາຄິດຫຼາຍ ແລະ ທ່ານກໍບໍ່ໄດ້ດື່ມກາເຟເກີນສອງຈອກ ຫຼືດື່ມເຄື່ອງດື່ມຊູກຳລັງແຕ່ຢ່າງໃດ ແລະ ບໍ່ວ່າດ້ວຍເຫດຜົນໃດ ວັນນີ້ ! “ວຽງຈັນໃໝ່” ຈະຊ່ວຍໃຫ້ນັກທຸລະກິດ ຄົນເຮັດວຽກທີ່ຕ້ອງຕື່ນແຕ່ເຊົ້າ ແລະ ຢາກນອນຫຼັບງ່າຍໆ ດ້ວຍ 4 ວິທີຕໍ່ໄປນີ້.
1. ຕື່ນນອນຕອນເຊົ້າດ້ວຍຕົວເອງ
ທ່ານສາມາດເລີ່ມຕົ້ນເຊົ້າວັນໃໝ່ທີ່ສົດໃສ ແລະ ສາມາດນອນຫຼັບໃນຕອນກາງຄືນໄດ້ງ່າຍຂຶ້ນ ພຽງແຕ່ທ່ານເຊົານິໄສກົດປຸ່ມ Snooze ເທິງສະມາດໂຟນຂອງທ່ານເພື່ອນອນຕໍ່ ເພາະການເຮັດເຊັ່ນນີ້ ຈະເຮັດໃຫ້ກົນໄກເວລາໃນການນອນຫຼັບຂອງທ່ານ ເສຍສິ່ງທີ່ທ່ານຄວນເຮັດເມື່ອຕື່ນນອນ ກໍຄື ໃຫ້ລຸກຂຶ້ນຈາກບ່ອນນອນທັນທີ! ຟັງເບິ່ງເໝືອນຈະເປັນເລື່ອງຍາກ ແຕ່ຫາກທ່ານຕັ້ງໃຈເຝິກໃຫ້ເປັນນິໄສ ໃນທຸກໆວັນແລ້ວ ກໍຈະຊ່ວຍໃຫ້ການລຸກອອກຈາກຕຽງຂອງທ່ານເປັນເລື່ອງທີ່ງ່າຍຂຶ້ນ.
2. ສົດຊື່ນໃນຕອນບ່າຍ
ຫຼັງຈາກຮັບປະທານອາຫານທ່ຽງສຳເລັດ ເອີ້ນໄດ້ວ່າເປັນໄລຍະເວລາທີ່ທຸກໆຄົນພ້ອມຈະຫຼັບຢູ່ຕະຫຼອດເວລາ ດັ່ງນັ້ນ ການເລືອກຮັບປະທານອາຫານທ່ຽງຂອງທ່ານ ຈະຕ້ອງຫຼີກລ່ຽງອາຫານທີ່ມີຄາຣ໌ໂບໄຮເດຣດຫຼາຍເກີນໄປ ເພາະຄາຣ໌ໂບໄຮເດຣດຄືຕົວການສຳຄັນ ທີ່ຈະເຮັດໃຫ້ທ່ານຮູ້ສຶກງ່ວງ ແລະ ລົບກວນການນອນຫຼັບຂອງທ່ານໃນຕອນກາງຄືນ ແຕ່ຫາກທ່ານຫຼຸດການກິນອາຫານຈຳພວກຄາຣ໌ໂບໄຮເດຣດໜ້ອຍລົງແລ້ວ ຍັງມີອາການງ່ວງຢູ່ ໃຫ້ລອງຫາກິດຈະກຳອື່ນໆເຮັດເຊັ່ນ ຍ່າງຫຼິ້ນບຶດໜຶ່ງກ່ອນກັບໄປເຮັດວຽກ ກາຍະບໍລິຫານດ້ວຍທ່າງ່າຍໆ ແທນການງີບຫຼັບເພື່ອບັນເທົາຄວາມງ່ວງ.
3. ກຽມຕົວໃຫ້ພ້ອມກ່ອນນອນ
ກົດເຫຼັກສຳຄັນ ຖ້າທ່ານຢາກນອນຫຼັບງ່າຍໃນຕອນກາງຄືນ ກໍຄື ໃນທຸກໆຄາບອາຫານແລງ ທ່ານຄວນຫຼີກລ່ຽງການຮັບປະທານອາຫານທີ່ເຕັມໄປດ້ວຍໄຂມັນອິ່ມຕົວ ເພາະວ່າໄຂມັນຈະສົ່ງຜົນຕໍ່ການນອນຫຼັບໃນຕອນກາງຄືນຂອງທ່ານ ແລະ ເພື່ອໃຫ້ທ່ານນອນຫຼັບໄດ້ງ່າຍກວ່າເດີມ ການເຮັດສະມາທິກ່ອນເຂົ້ານອນ ຈະຊ່ວຍໃຫ້ຮ່າງກາຍຂອງທ່ານຜ່ອນຄາຍ ປາສະຈາກເລື່ອງລົບກວນໃຈ ແລະ ເຮັດໃຫ້ທ່ານໝົດບັນຫາເລື່ອງການນອນຫຼັບຍາກອີກດ້ວຍ.
4. ມີເຄັດລັບການນອນທີ່ດີ ຫຼັບງ່າຍຂຶ້ນ.
ຫຼັງຈາກທີ່ທ່ານລອງເຮັດຕາມທັງ 3 ວິທີໃນຂ້າງຕົ້ນແລ້ວ ແຕ່ຍັງບໍ່ຊ່ວຍໃຫ້ທ່ານນອນຫຼັບໄດ້ງ່າຍຂຶ້ນ ທ່ານອາດຈະລອງລົງທຶນຊື້ຜ້າຫົ່ມທີ່ມີນ້ຳໜັກມາໃຊ້ ຫຼືປ່ຽນຕຳແໜ່ງການນອນຂອງທ່ານ ກໍຖືວ່າມີສ່ວນຊ່ວຍບໍ່ໜ້ອຍເລີຍ ເຊັ່ນ ການນອນຫຼັບຕະແຄງຊ້າຍ ຈະຊ່ວຍໃຫ້ທ່ານນອນຫຼັບງ່າຍຂຶ້ນອີກ ທັງຍັງຊ່ວຍໃນເລື່ອງຂອງລະບົບທາງເດີນອາຫານ ຫຼື ແມ່ນແຕ່ການນອນຫຼັບໂດຍບໍ່ໃສ່ເສື້ອຜ້າ ນອກຈາກຈະຊ່ວຍໃຫ້ທ່ານຫຼັບສະບາຍ ຍັງຊ່ວຍຫຼຸດອັດຕາການສ່ຽງເປັນພະຍາດມະເຮັງ ແລະ ຫຼຸດຄວາມສ່ຽງຕໍ່ພະຍາດເບົາຫວານ.
ທ້າຍທີ່ສຸດນີ້ ສຳລັບນັກທຸລະກິດ ແລະ ຄົນເຮັດວຽກທີ່ມີບັນຫາເລື່ອງການນອນຫຼັບ ເມື່ອໄດ້ນຳທັງ 4 ວິທີຈາກເຮົາໄປໃຊ້ແລ້ວ ເຮົາຫວັງວ່າ ໝັ່ນເຮັດຄວາມສະອາດຜ້າປູບ່ອນນອນໝອນ ແລະ ຜ້າຫົ່ມຢູ່ເປັນປະຈຳໃນແຕ່ລະອາທິດ ກໍຈະຊ່ວຍໃຫ້ທ່ານຫຼັບໄດ້ງ່າຍ ແຖມຍັງມີສຸຂະພາບ ແລະ ພະລານາໄມທີ່ແຂງແຮງ.
ຊາວບ້ານ-ນຳສະເໜີ