ໃນບົດປະຈຳວັນນີ້ ຜູ້ຂຽນໄດ້ສັງລວມເອົາເລື່ອງຄວາມວິຕົກກັງວົນຂອງຫຼາຍປະເທດ ກ່ຽວກັບພະຍາດຕຸ້ຍ ຫຼື ນ້ຳໜັກຕົວເກີນກຳນົດ ຈາກເຄື່ອງດື່ມອາຫານທີ່ຫວານ ມີກາລໍຣີຫຼາຍເກີນໄປ ການມີນ້ຳໜັກຕົວກາຍຂີດກຳນົດນັ້ນ ມີຄວາມສ່ຽງສູງທີ່ຈະເກີດພະຍາດນາໆຊະນິດ ພິເສດແມ່ນພະຍາດເບົາຫວານ ແລະ ພະຍາດຫົວໃຈ.
ທີ່ ອິນເດຍ: ເມື່ອປະມານ 5 ປີຜ່ານມາ ທາງການຂອງປະເທດອິນເດຍ ໄດ້ຮຽກຮ້ອງໃຫ້ບໍລິສັດນ້ຳຫວານ ເຊັ່ນ: ເປບຊີ ເຊເວັນອັບ ມີຣິນດາ ຫຼຸດປະລິມານນ້ຳຕານໃນເຄື່ອງດື່ມເຫຼົ່ານີ້ລົງ ພາຍຫຼັງໄດ້ພົບວ່າພະຍາດເບົາຫວານ ແລະ ພະຍາດຕຸ້ຍ ໄດ້ເພີ່ມຂຶ້ນສູງໃນໝູ່ປະຊາຊົນໃນປັດຈຸບັນກຸ່ມຄົນ ຊົນຊັ້ນກາງຢູ່ອິນເດຍ ມີລາຍຮັບສູງຂຶ້ນ ແລະ ຫັນໄປບໍລິໂພກນ້ຳຫວານສຳເລັດຮູບ ແລະ ອາຫານຈານດ່ວນຫຼາຍຂຶ້ນ ເຊິ່ງເປັນຕົ້ນເຫດຂອງພະຍາດເບົາຫວານ ແລະ ພະຍາດຕຸ້ຍ ສະຖິຕິເມື່ອຫ້າປີຜ່ານມາ ໃຫ້ຮູ້ວ່າ ບໍລິສັດ ເປບຊີໂກ ມີໂຮງງານນ້ຳຫວານບັນຈຸໃສ່ຕຸກ 38 ແຫ່ງ ແລະ ໂຮງງານອາຫານຈານດ່ວນ 3 ແຫ່ງ ໃນອິນເດຍ.
ທີ່ ເມັກຊິກ (ຫຼື ເມັກຊິກໂກ): ຂ່າວຕ່າງປະເທດໄດ້ໃຫ້ຮູ້ວ່າ: ທາງກະຊວງສາທາລະນະສຸກຂອງປະເທດເມັກຊິກ ໄດ້ອອກຂໍ້ກຳນົດຫ້າມໂຄສະນາອາຫານ ແລະ ເຄື່ອງດື່ມທີ່ເຮັດໃຫ້ນ້ຳໜັກຂອງຄົນເພີ່ມຂຶ້ນ ຄຳສັ່ງຫ້າມດັ່ງກ່າວ ໄດ້ເລີ່ມມີຜົນສັກສິດ ແຕ່ກາງປີ 2014 ເປັນຕົ້ນມາ ເວລາທີ່ກຳນົດຫ້າມ ໂຄສະນາຜ່ານເຄືອຄ່າຍສື່ຕ່າງໆນັ້ນ ແມ່ນແຕ່ 14:30-21:30 ໂມງຕາມວັນລັດຖະການ ແລະ ແຕ່ 7:00-19:30 ໂມງ ສຳລັບວັນເສົາ ແລະ ວັນອາທິດ ອາຫານ ແລະ ເຄື່ອງດື່ມທີ່ເປັນເປົ້າຫ້າມໂຄສະນານັ້ນ ໄດ້ແກ່ອາຫານທີ່ມີກາລໍຣີ (Calorie) ສູງ ແລະ ເຄື່ອງດື່ມປະເພດນ້ຳອັດລົມ ມາດຕະການຫ້າມດັ່ງກ່າວ ໄດ້ເຮັດໃຫ້ການໂຄສະນາອາຫານ ແລະ ນ້ຳອັດລົມ ຫາຍຈາກໜ້າຈໍໂທລະພາບເຖິງ 40% ໃນໄລຍະກ່ອນໜ້ານັ້ນ ລັດຖະບານເມັກຊິກ ໄດ້ຮຽກຮ້ອງໃຫ້ເກັບພາສີເຄື່ອງດື່ມ ແລະ ອາຫານທີ່ມີສ່ວນເພີ່ມນ້ຳໜັກແກ່ຜູ້ບໍລິໂພກ ຢູ່ເມັກຊິກ ຄົນໃນໄວຜູ້ໃຫຍ່ ຈຳນວນ 70% ມີນ້ຳໜັກເກີນກຳນົດ ສ່ວນເດັກທີ່ຕຸ້ຍເກີນໄປນັ້ນ ກວມອັດຕາ 30% ໂດຍສະເລ່ຍຄົນເມັກຊິກ ຜູ້ໜຶ່ງບໍລິໂພກເຄື່ອງດື່ມປະສົມນ້ຳຕານຕໍ່ປີ ເຖິງ 163 ລິດ/ຄົນ ຊຶ່ງຫຼາຍເປັນອັນດັບທີ 1 ຂອງໂລກ ສ່ວນອາຫານນັ້ນ ກໍນິຍົມກິນປະເພດຈືນເປັນຕົ້ນຕໍ ພະຍາດທີ່ເກີດຈາກການມີນ້ຳໜັກເກີນນັ້ນ ໄດ້ເຮັດໃຫ້ລັດຕ້ອງໄດ້ເສຍຄ່າປິ່ນປົວ ສຳລັບພົນລະເມືອງຕຸ້ຍເຖິງ 11.700 ລ້ານໂດລາສະຫະລັດ (ສະຖິຕິປີ 2017).
ອາຟຣິກາໃຕ້: ໃນເດືອນພະຈິກ ປີ 2017 ສະພາແຫ່ງຊາດ ອາຟຣິກາໃຕ້ ໄດ້ຮັບຮອງເອົາກົດໝາຍພາສີເຄື່ອງດື່ມທີ່ມີສ່ວນປະສົມຂອງນ້ຳຕານ ຊຶ່ງເລີ່ມມີຜົນສັກສິດໃນເດືອນເມສາ 2018 ໃນເບື້ອງຕົ້ນ ກົດໝາຍສະບັບນີ້ ໄດ້ປະເຊີນກັບການຄັດຄ້ານຈາກພາກສ່ວນອຸດສາຫະກຳນ້ຳຕານ ແລະ ເຄື່ອງດື່ມປະເພດນ້ຳຫວານ ເພາະເຫັນວ່າ ມາດຕະການເກັບພາສີນີ້ ຈະຈຳກັດການພັດທະນາອຸດສາຫະກຳຂະແໜງນີ້ ຈະເຮັດໃຫ້ມີບັນຫາວ່າງງານ ແຕ່ສຸດທ້າຍກໍສູ້ເຫດຜົນຂອງເບື້ອງລັດ ທີ່ຮັບຜິດຊອບເລື່ອງສຸຂະພາບຂອງປະຊາຊົນ ເພາະວ່າກົດໝາຍມີເປົ້າໝາຍແກ້ໄຂພະຍາດຕຸ້ຍທີ່ເປັນບໍ່ເກີດຂອງພະຍາດອື່ນໆ ເຊັ່ນ: ເບົາຫວານ ແລະ ໂຣກຫົວໃຈ ອາຟຣິກາໃຕ້ ມີຄົນນ້ຳໜັກເກີນອັດຕາຄວາມພໍດີຫຼາຍລະດັບຫົວແຖວຂອງໂລກ.