ວັນທີ 11 ມິຖຸນາ ຜ່ານມາ ເມືອງຫົງສາ ແຂວງໄຊຍະບູລີ ສຳເລັດແຂ່ງຂັນກີລາປະຈຳປີ 2020 ເປັນປະທານຂອງທ່ານ ຈັນເພັງ ອູ່ທອງຄຳ ຮອງເຈົ້າເມືອງຫົງສາ ປະທານຄະນະກຳມະການແຂ່ງຂັນກີລາປະຈຳປີ 2020 ມີທ່ານ ຄຳຫຼ້າ ຜິວວັນນາ ເຈົ້າເມືອງຫົງສາ ທ່ານ ທອງສຸກ ປ້ອງຄຳ ຫົວໜ້າຫ້ອງການສຶກສາທິການ ແລະ ກີລາເມືອງ ພ້ອມດ້ວຍການນຳຂອງເມືອງ ຫົວໜ້າຫ້ອງການ ແລະ ຕົວແທນນັກກີລາແຕ່ລະປະເພດ ເຂົ້າຮ່ວມ.
ທ່ານ ຂາວພອນ ທຳມະໂນລາ ຮອງຫົວໜ້າຫ້ອງການສຶກສາທິການ ແລະ ກີລາເມືອງຫົງສາ ໄດ້ຜ່ານບົດສະຫຼຸບການແຂ່ງຂັນກີລາປະຈຳປີ 2020 ໄດ້ເລີ່ມໃນວັນທີ 26 ກຸມພາຫາວັນທີ 12 ມິຖຸນາ 2020 ມີປະເພດກີລາບານເຕະ 4 ລາຍການເຂົ້າຮ່ວມ ຄື: ບານເຕະອານຸຊົນຊາຍ 7 ທີມ ບານເຕະຊາວໜຸ່ມຊາຍ 10 ທີມ ບານເຕະຊາວໜຸ່ມຍິງ 5 ທີມ ບານເຕະອາວຸໂສຊາຍ 5 ທີມ ການແຂ່ງຂັນແມ່ນພົບກັນ ໝົດພາຍໃນສາຍ.
ຜ່ານການແຂ່ງຂັນ ທີມບານເຕະອານຸຊົນ ຊະນະເລີດທີມໂຮງຮຽນປະຖົມສົມບູນບ້ານໃຫຍ່ ທີ 2 ໂຮງຮຽນປະຖົມສົມບູນບ້ານນາປຸ່ງ ແລະ ທີ 3 ໂຮງຮຽນປະຖົມສົມບູນຫົງສາ ບານເຕະຊາວໜຸ່ມຊາຍ ຊະນະເລີດທີມນ້ຳມັນເຊື້ອໄຟ ທີ 2 ທີມຄຳໂກ້ການພີມ ແລະ ທີ 3 ທີມກຸ່ມການເມືອງ-ວັດທະນະທຳສັງຄົມ ທີມບານເຕະຊາວໜຸ່ມຍິງ ຊະນະເລີດທີມຮ້ານຂາຍລົດຊັນເດີ ທີ 2 ທີມ ໂຮງຮຽນ ມສ ຫົງສາ ແລະ ທີ 3 ທີມບ້ານ FC ທີມບານເຕະອາວຸໂສຊາຍ ຊະນະເລີດທີມກຸ່ມທຸລະກິດ ທີ 2 ກຸ່ມການເມືອງ-ວັດທະນະທຳສັງຄົມ ທີ 3 ທີມກຸ່ມເສດຖະກິດ.
ໂອກາດນີ້ ອົງການປົກຄອງເມືອງຫົງສາ ໄດ້ມອບໃບຍ້ອງຍໍໃຫ້ນັກກີລາ ແລະ ບຸກຄົນຜູ້ທີ່ມີຜົນງານດີເດັ່ນ ມີພອນສະຫັວນ ພິກໄຫວ ມີຄວາມສາມາດ ມີນ້ຳໃຈນັກກີລາ ຖືກຄັດເລືອກເປັນຕົວແທນທີມນັກກີລາຂອງເມືອງ ສາມາດເຄື່ອນໄຫວພາຍໃນເມືອງ ຕ່າງເມືອງ ພາຍໃນແຂວງ ແລະ ລະດັບຕ່າງໆ.