ທ່ານ ອາລ໋ອບ ມະນີບົດ ປະທານສະໂມສອນ ລ໋ອບ ສະເຕດ້ຽມ ເອັຟເອ ໃຫ້ສຳພາດໃນທີ 15 ມິຖຸນາ 2020 ໃຫ້ຮູ້ວ່າ: ຫຼັງຈາກໄດ້ຮັບແຈ້ງການຈາກສະຫະພັນບານເຕະແຫ່ງຊາດລາວ (ສຕລ) ໃຫ້ຢຸດເຄື່ອນໄຫວກິດຈະກຳຊົ່ວຄາວ ໃນໄລຍະການແຜ່ລະບາດຂອງໂຄວິດ-19 ນັບຕັ້ງແຕ່ເດືອນມີນາເປັນຕົ້ນມາ ພວກເຮົາກໍໄດ້ສັ່ງໂຈະຢຸດການເຝິກຊ້ອມນັກກີລາຊົ່ວຄາວ ແລະ ແນະນຳວີທີໃຫ້ນັກກີລາ ໄດ້ມີການເຝິກຊ້ອມດ້ວຍຕົນເອງຢູ່ເຮືອນໃຜເຮືອນລາວ ໃນທຸກໆຕອນແລງຂອງວັນພຸດເປັນປະຈຳ ໂດຍຈະມີການໂທວີດີໂອຫາກັນ ຫຼື ເຝິກສອນທາງອອນລາຍ ເພື່ອໃຫ້ການສອນດຳເນີນໄປຢ່າງຕໍ່ເນື່ອງ ແລະ ຮັກສາຄວາມແຂງແຮງຂອງຮ່າງກາຍໃຫ້ນັກເຕະເປັນປະຈຳ ຈົນມາເຖິງວັນທີ 7 ມິຖຸນາ 2020 ພວກເຮົາກໍໄດ້ເລີ່ມກັບມາຊ້ອມເປັນປົກກະຕິທຸກໆວັນເສົາ ແລະ ວັນອາທິດ ເລີ່ມແຕ່ເວລາ 8:00-11:30 ໂມງ ເຊິ່ງໄລຍະ 2 ອາທິດ ກໍເນັ້ນເຝິກຊ້ອມໃຫ້ນັກກີລາ ເອົາທາງດ້ານພາລະກຳລັງ ແລະ ເທັກນິກຕ່າງໆ ເພື່ອຟື້ນຄວາມຊົງຈຳ ແລະ ວິທີການຫຼິ້ນກີລາບານເຕະໃຫ້ຫຼິ້ນຖືກວິທີ ສຳລັບນັກກີລາທີ່ສັງກັດໃນສະໂມສອນ ປັດຈຸບັນມີທັງໝົດ 56 ຄົນ ມີທັງຮຸ່ນອາຍຸ 17 ປີລົງມາຫາ 6 ປີ ໂດຍສະເພາະ ຮຸ່ນອາຍຸ 12 ປີ ທີ່ກຽມລົງແຂ່ງຂັນຮອບຮອງຊະນະເລີດລາຍການ ຊີງຂັນປະທານ ສຕລ ຈະເປີດສາກຂຶ້ນໃນທ້າຍເດືອນນີ້ ພົບກັບສະໂມສອນ ເຄເອັນຊີ ເອັຟຊີ ສ່ວນນັກກີລາຮຸ່ນອາຍຸ 15 ແລະ 17 ປີ ແມ່ນກຳລັງກະກຽມສ້າງທີມ ເພື່ອກຽມສົ່ງເຂົ້າຮ່ວມແຂ່ງຂັນລາຍການຊີງຂັນຂອງ ສຕລ ໃນທ້າຍປີນີ້ເຊັ່ນກັນ.
ທ່ານ ອາລ໋ອບ ກ່າວຕື່ມອີກ ວ່າ: ສຳລັບເປົ້າໝາຍໃນການສ້າງທີມ ລ໋ອບ ສະເຕດ້ຽມ ໃນຄັ້ງນີ້ ກໍເພື່ອເປັນການສ້າງໂອກາດໃຫ້ນ້ອງໆນັກກີລາໄດ້ຫຼິ້ນກີລາ ເພື່ອຕ້ານປາກົດການຫຍໍ້ທໍ້ຕ່າງໆທີ່ເກີດຂຶ້ນໃນສັງຄົມປັດຈຸບັນ ໂດຍສະເພາະ ບັນຫາຢາເສບຕິດ ແລະ ສົ່ງເສີມໃຫ້ມີທ່າກ້າວດີເດັ່ນເພື່ອຕິດທີມຊາດໃນອະນາຄົດ ໂດຍສະເພາະ ຂໍຊົມເຊີຍຜົນງານຂອງ ຢູ-12 ລ໋ອບ ສະເຕດ້ຽມ ທີ່ສາມາດທະລຸເຂົ້າຮອບຮອງຊະນະເລີດ ໃນການແຂ່ງຂັນບານເຕະເຍົາວະຊົນຮຸ່ນອາຍຸບໍ່ເກີນ 12 ປີ ຊີງຂັນປະທານ ສຕລ 2020 ເຊິ່ງຈະກັບມາແຂ່ງຂັນໃນວັນທີ 27 ມິຖຸນາ 2020 ພົບກັບສະໂມສອນ ເຄເອັນຊີ ປັດຈຸບັນແມ່ນເລີ່ມຊ້ອມແລ້ວ ແລະ ນັກກີລາທຸກຄົນ ກໍມີກຳລັງໃຈທີ່ດີ ແລະ ພ້ອມທີ່ຈະເຂົ້າຮ່ວມແຂ່ງຂັນ ແນວໃດກໍດີ ເຊື່ອໝັ້ນວ່າທີມຊຸດນີ້ ຈະສາມາດສ້າງຜົນງານມີໄຊເໜືອ ເຄເອັນຊີ ຜ່ານເຂົ້າຮອບຊີງຊະນະເລີດໄດ້ຢ່າງແນ່ນອນ.