ພິທີມອບ-ຮັບໜ້າທີ່ຫົວໜ້າຄະນະໂຄສະນາອົບຮົມ ນະຄອນຫຼວງວຽງຈັນ (ນວ) ຜູ້ເກົ່າທ່ານ ເຂັມເພັດ ແພງດວງຈັນ ແລະ ຜູ້ໃໝ່ ທ່ານ ພູວົງ ວົງຄຳຊາວ ຈັດຂຶ້ນວັນທີ 16 ມິຖຸນາ 2020 ຢູ່ຫ້ອງວ່າການປົກຄອງ ນວ ມີທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ບັນດາເຈົ້າເມືອງ ຮອງເຈົ້າເມືອງ ຫົວໜ້າ ຮອງຫົວໜ້າພະແນກການ ຫົວໜ້າຄະນະໂຄສະນາອົບຮົມເມືອງ 9 ເມືອງ ແລະ ແຂກທີ່ຖືກເຊີນເຂົ້າຮ່ວມ.
ໂດຍອີງຕາມມະຕິຕົກລົງຂອງຄະນະເລຂາທິການສູນກາງພັກ ວ່າດ້ວຍການອະນຸມັດໃຫ້ພະນັກງານອອກພັກຜ່ອນຮັບອຸດໜູນບຳນານ ຄຳສັ່ງຂອງຄະນະປະຈຳພັກ ນວ ວ່າດ້ວຍການຍົກຍ້າຍພະນັກງານ ແລະ ອີງຕາມມະຕິຕົກລົງ ສະບັບເລກທີ 387/ຄພ ນວ ວ່າດ້ວຍການແຕ່ງຕັ້ງຫົວໜ້າຄະນະໂຄສະນາອົບຮົມ ນວ ດັ່ງນັ້ນ ຄະນະປະຈຳພັກ ນວ ຕົກລົງແຕ່ງຕັ້ງທ່ານ ພູວົງ ວົງຄຳຊາວ ຄະນະພັກ ນວ ຫົວໜ້າຫ້ອງວ່າການ ນວ ເປັນຫົວໜ້າຄະນະໂຄສະນາອົບຮົມ ນວ ຜູ້ໃໝ່ ແລະ ຕົກລົງໃຫ້ທ່ານ ເຂັມເພັດ ແພງດວງຈັນ ຄະນະພັກ ນວ ຫົວໜ້າຄະນະໂຄສະນາອົບຮົມ ນວ ຜູ້ເກົ່າ ອອກພັກການຮັບອຸດໜູນບຳນານ.
ຄະນະໂຄສະນາອົບຮົມ ນວ ແມ່ນອົງການຈັດຕັ້ງໜຶ່ງຂອງພັກ ມີຖານະທຽບເທົ່າກັບບັນດາພະແນກການ ແລະ ອົງການຕ່າງໆຂັ້ນ ນວ ປະຕິບັດພາລະບົດບາດເປັນເສນາທິການ ແລະ ເປັນອົງການວິຊາສະເພາະໃຫ້ແກ່ຄະນະປະຈຳພັກ ແລະ ຄະນະບໍລິຫານງານພັກ ນວ ທາງດ້ານວຽກງານໂຄສະນາອົບຮົມ ກໍຄື ວຽກງານການເມືອງ-ແນວຄິດ ປັດຈຸບັນທົ່ວ ນວ ມີພະນັກງານເຮັດວຽກໂຄສະນາອົບຮົມທັງໝົດ 139 ຄົນ ຍິງ 42 ຄົນ ໃນນີ້ ຄະນະໂຄສະນາອົບຮົມ ນວ ມີ 18 ຄົນ ຍິງ 9 ຄົນ ເມືອງ 44 ຄົນ ຍິງ 21 ຄົນ ແລະ ພະ ແນກການອົງການທຽບເທົ່າອ້ອມຂ້າງ 77 ຄົນ ຍິງ 12 ຄົນ.